تۇركيا پرەزيدەنتى گرەكيا پرەمەر-مينيسترىمەن كەزدەستى

استانا. KAZINFORM - تۇركيا مەن گرەكيا بەلگىلى ءبىر كۇردەلى قارىم-قاتىناس كەزەڭىنەن كەيىن ەكىجاقتى بايلانىس ورناتۋدا. بۇل مەملەكەتتەر ناتو- عا مۇشە بولعانىنا قاراماستان، ەگەي تەڭىزىندەگى شەكارالار، كيپردىڭ اۋماقتىق ءبولىنۋى جانە ايماقتاعى زاڭسىز كوشى-قون جاعدايى تۋرالى ۇزاق ۋاقىت داۋلاسىپ كەلەدى.

 گرەك پرەمەر- ءمينيسترى كيرياكوس ميتسوتاكيس انكاراعا بارىپ، تۇركيا پرەزيدەنتى رەجەپ تايىپ ەردوعانمەن كەزدەستى. بۇعان دەيىن ەكى ەلدىڭ كوشباسشىلارى 2023 -جىلدىڭ جەلتوقسانىندا ر. ت. ەردوعاننىڭ افيناعا ساپارىندا كەزدەسكەن ەدى. جالپى، ءبىر جىل ىشىندە بۇل - ولاردىڭ ءتورتىنشى كەزدەسۋى.

ەردوعاننىڭ شاقىرۋىمەن انكاراعا كەلگەن ميتسوتاكيستىڭ ساپارىندا تۇركيا مەن گرەكيا اراسىنداعى ءتۇرلى سالالارداعى ەكىجاقتى قاتىناستار قاراستىرىلدى. تاراپتار ىنتىماقتاستىقتى دامىتۋ ءۇشىن قابىلدانۋى مۇمكىن الداعى قادامداردى تالقىلادى. سونىمەن بىرگە، ەكى تاراپ وزەكتى وڭىرلىك جانە جاھاندىق ماسەلەلەر بويىنشا پىكىر الماستى. كۇن تارتىبىندە قوس مەملەكەت قاتىناستارىنىڭ شارتتىق نەگىزىن نىعايتۋعا ىقپال ەتەتىن كەلىسىمدەرگە قول قويۋ ماسەلەسى دە بولعان.

كوشباسشىلاردىڭ ايتۋىنشا، ىنتىماقتاستىق ەكونوميكا، ساۋدا، تۋريزم، دەنساۋلىق ساقتاۋ جانە كولىك سياقتى سالالاردا تەرەڭدەي تۇسەدى.

تۇرىك شولۋشىلارىنىڭ باعالاۋىنشا، انكاراداعى ەكىجاقتى بايلانىستار ەردوعاننىڭ 7-جەلتوقسانداعى افيناعا ساپارىنىڭ جالعاسى رەتىندە قاراستىرىلادى. سودان كەيىن قول قويىلعان «افينا دوستىق جانە تاتۋ كورشىلىك دەكلاراتسياسى» دا بۇگىن انكارادا بولىپ جاتقان كەلىسسوزدەردىڭ نەگىزى بولىپ سانالادى.

وسى قۇجاتقا قول قويىلعان سوڭ ەكى تاراپ دوستىق قارىم- قاتىناستى، ءوزارا سىيلاستىقتى، بەيبىت قاتار ءومىر ءسۇرۋدى جانە ءوزارا تۇسىنىستىكتى دامىتۋعا كەلىستى. بۇل رەتتە تاراپتار اراسىنداعى بارلىق داۋلاردى حالىقارالىق قۇقىققا سايكەس بەيبىت ۋاعدالاستىقتار ارقىلى شەشۋ ايتىلعان.

اۆتور

ايجان سەرىكجان قىزى