تۇركيا قولما-قول اقشاسىز تولەم جۇيەسىنە كوشتى
استانا. KAZINFORM - وتكەن جىلدىڭ قورىتىندىسى بويىنشا تۇركيادا قولما-قول اقشانى پايدالانۋ ايتارلىقتاي قىسقاردى، دەپ حابارلايدى Kazinform.

تۇركيادا 2024 -جىلى دەبەتتىك جانە نەسيەلىك كارتالاردى پايدالانۋ 86 پايىزعا ارتىپ، 14,87 تريلليون تۇرىك ليراسىنا (شامامەن 420 ميلليارد دوللار) جەتتى.
بەلگىلى بولعانداي، تولەمدەردىڭ نەگىزگى ءوسىمى سۋپەرماركەتتەردەگى، ساۋدا ورتالىقتارى مەن ينتەرنەت-دۇكەندەردەگى ساتىپ الۋلاردان تۇسكەن.
بارلىق تولەمنىڭ 29 پايىزىن ونلاين ترانزاكسيالار قۇراعان، بۇل ەلدەگى ەلەكتروندى كوممەرتسيانىڭ قارقىندى دامىعانىن كورسەتەدى. بۇعان 2020 -جىلى COVID-19 پاندەمياسى اسەر ەتتى، ول قولما-قول اقشاسىز تولەمدەرگە كوشۋدى جىلدامداتتى.
ەلدەگى بەلسەندى تولەم كارتالارىنىڭ سانى وتكەن جىلدىڭ سوڭىندا رەكوردتىق دەڭگەيگە جەتكەن. 2024 -جىلدىڭ قاراشا ايىنداعى جاعداي بويىنشا اينالىستا 128,93 ميلليون نەسيە كارتاسى جانە 193,45 ميلليون دەبەتتىك كارتا بولدى.
تۇرىك تۇتىنۋشىلارى ىڭعايلىلىق، قاۋىپسىزدىك جانە بانكتەر ۇسىناتىن كوپتەگەن بونۋستىڭ ارقاسىندا كوبىرەك ەلەكتروندى تولەم ادىستەرىن تاڭداعان.
قولما-قول اقشانى پايدالانۋدى ازايتۋعا باعىتتالعان بۇل ءۇردىس تۇرىك قوعامىنىڭ جاھاندىق قارجىلىق وزگەرىستەرگە بەيىمدەلۋگە جانە سيفرلىق ەكونوميكانى قۇرۋعا دەگەن ۇمتىلىسىن كورسەتەدى.
بۇعان دەيىن تۇركيانىڭ ورتالىق بانكى ۇزاق ۋاقىتتان بەرى العاش رەت پايىزدىق مولشەرلەمەلەردى تومەندەتكەنىن جازعان بولاتىنبىز.
سونىمەن قاتار، تۇركيانىڭ ورتالىق بانكى جالعان شەتەل ۆاليۋتاسى اينالىمىنا جول بەرمەۋ ءۇشىن جاڭا تەحنيكالىق شارالار ەنگىزىپ، قۇقىق قورعاۋ ورگاندارىمەن ىنتىماقتاستىقتى نىعايتىپ جاتىر.
اۆتور
جاراسقان نۇرىبايەۆ