تۇركيا Meta كومپانياسىن سوتقا بەرمەك
استانا. kazinform — تۇركيانىڭ ۇلتتىق ءبىلىم مينيسترلىگى Meta كومپانياسىنا قارسى سوتقا تالاپ- ارىز ءتۇسىرۋدى جوسپارلاپ وتىر، دەپ حابارلايدى Report.
بۇل تۋرالى تۇركيانىڭ ۇلتتىق ءبىلىم ءمينيسترى يۋسۋف تەكين مالىمدەدى.
ونىڭ ايتۋىنشا، الەۋمەتتىك جەلىلەردە بالالاردىڭ جاسىنا سايكەس كەلمەيتىن كونتەنتتىڭ جاريالانۋى ولاردىڭ وقۋ ۇلگەرىمى مەن تۇلعالىق دامۋىنا كەرى اسەر ەتەدى.
— باسقا ەلدەردەگىدەي، ءبىز دە وسى نەگىزدەر بويىنشا سوت پروتسەسىن باستايمىز، — دەدى مينيستر.
ايتا كەتەيىك، بۇعان دەيىن Meta كومپانياسىنا 1,4 تريلليون دوللار ايىپپۇل سالىنۋى مۇمكىن ەكەنىن جازعان بولاتىنبىز.
كاليفورنيا سوتى Meta كورپوراتسياسىن Facebook پەن Instagram الەۋمەتتىك جەلىلەرىنىڭ جۇمىس ىستەۋ ءتاسىلىن وزگەرتۋگە مىندەتتەۋى مۇمكىن. ا ق ش- تىڭ ءتورت شتاتى كومپانيانى جاستاردى الەۋمەتتىك جەلىلەرگە تاۋەلدى ەتەتىن پلاتفورمالار قۇرىپ، ولاردىڭ زيانى تۋرالى بەلگىلى بولعان اقپاراتتى جاسىردى دەپ ايىپتاپ وتىر.
18 -امىزدا كاليفورنيا شتاتىنىڭ وكلەند قالاسىنداعى فەدەرالدىق سوتتا Meta كومپانياسىنا قارسى ماڭىزدى سوت پروتسەسى باستالدى. كەنتۋككي شتاتىنىڭ باس پروكۋرورى بۇل ءىستى ا ق ش تاريحىنداعى تۇتىنۋشىلاردىڭ قۇقىقتارىن قورعاۋعا قاتىستى ەڭ ءىرى سوت پروتسەسى دەپ اتادى.
بۇل ءىس بويىنشا قابىلداناتىن شەشىم Facebook پەن Instagram-نىڭ جۇمىس ىستەۋ تارتىبىنە، سونداي- اق جالپى الەۋمەتتىك جەلىلەردى قولدانۋ تاسىلىنە وزگەرىس ەنگىزۋى مۇمكىن.
سوتقا تالاپ ارىزدى كاليفورنيا، كولورادو، كەنتۋككي جانە نيۋ- دجەرسي شتاتتارى بەردى. ولار 29 شتاتتان تۇراتىن كەڭ اۋقىمدى كواليتسيانىڭ اتىنان ارەكەت ەتىپ وتىر.
تالاپ ارىزدا Meta كومپانياسى Facebook پەن Instagram-دى جاس قولدانۋشىلاردىڭ الەۋمەتتىك جەلىدە مۇمكىندىگىنشە ۇزاق ۋاقىت وتىرۋىنا جانە تاۋەلدى بولۋىنا ىقپال ەتەتىندەي ەتىپ ادەيى جاساعانى ايتىلعان. سونداي-اق كومپانيا وزىنە بالالار مەن جاسوسپىرىمدەردىڭ پسيحيكالىق دەنساۋلىعىنا كەلەتىن زيان تۋرالى بەلگىلى بولعان اقپاراتتى جاسىردى دەگەن ايىپ تاعىلىپ وتىر.
Meta كومپانياسى تاعىلعان ايىپتاردى جوققا شىعارادى. كومپانيا وكىلىنىڭ ايتۋىنشا، شتاتتار ەشكىمنىڭ الدانعانىن نەمەسە كومپانيا ارەكەتىنەن زيان شەككەنىن دالەلدەيتىن ناقتى دەرەك ۇسىنباعان. سونداي-اق ول شتاتتاردى فاكتىلەرگە سۇيەنۋدىڭ ورنىنا «وراسان زور وتەماقىعا قول جەتكىزۋگە ۇمتىلىپ وتىر» دەپ ايىپتادى.
كومپانيانىڭ مالىمەتىنشە، شتاتتار Meta-دان 1,4 تريلليون دوللارعا دەيىن ايىپپۇل ءوندىرىپ الۋدى تالاپ ەتىپ وتىر. بۇل سوما كورپوراتسيانىڭ نارىقتاعى جالپى قۇنىنا شامالاس.
سونداي-اق Meta بالالاردىڭ قاۋىپسىزدىگىنە قاتىستى تالاپتاردى رەتتەۋ ءۇشىن 17 ميلليارد دوللار تولەۋگە كەلىستى.
ال كەشە ا ق ش- تىڭ نيۋ-مەكسيكو شتاتىنىڭ سوتى Facebook پايدالانۋشىلارىن جەكە دەرەكتەرىن قورعاۋ ماسەلەسىندە جاڭىلىستىرعانى ءۇشىن Meta Platforms كومپانياسىن 25 ميلليارد دوللار تولەۋگە مىندەتتەدى.
