تۇركى الەمىنىڭ جۇلدىزدارى انكارادا ونەر كورسەتتى

تۇركيا استاناسىندا العاش رەت تۇركى الەمىنىڭ تانىمال ونەرپازدارىنىڭ باسىن قوسقان اۋقىمدى كونسەرت ءوتتى. ءىس-شارا تۇركيا رەسپۋبليكاسىنىڭ كۇنىنە جانە تۇركى مەملەكەتتەرى ۇيىمىنىڭ (ت م ۇ) الداعى سامميتىنە وراي ۇيىمداستىرىلدى. ساحناعا ءار ەلدىڭ وكىلدەرى شىعىپ، باۋىرلاس حالىقتاردىڭ مۋزىكالىق جانە مادەني مۇراسىن پاش ەتتى.

كونسەرتكە 500-گە جۋىق ونەرپاز قاتىسىپ، 10 مىڭعا جۋىق كورەرمەن جينالدى. باعدارلاماعا ۇلتتىق مۋزىكا تۋىندىلارى، وپەرالىق شىعارمالار مەن ءداستۇرلى بيلەر ەندى. ونەرپازداردىڭ ونەرىن تۇركيا پرەزيدەنتىنىڭ سيمفونيالىق وركەسترى سۇيەمەلدەدى.

كەشتىڭ باستى قوناعى - قازاقستاننىڭ حالىق ءارتىسى ديماش قۇدايبەرگەن بولدى. ونىڭ ونەرىن تاماشالاۋ ءۇشىن الەمنىڭ تۇكپىر-تۇكپىرىنەن جانكۇيەرلەرى ارنايى كەلگەن. كورەرمەندەر انشىگە قوسىلا ءان شىرقاپ، ەرەكشە قوشەمەت ءبىلدىردى.

تۇركيا پرەزيدەنتتىك سيمفونيالىق وركەسترىنىڭ باس مۋزىكالىق جەتەكشىسى ءارى ديريجەرى دجەمي دجان دەليورمان تۇركيا مەن تۇركى الەمى ءۇشىن ماڭىزدى وقيعالار قارساڭىندا كونسەرت ۇيىمداستىرۋدىڭ ءوزى زور مارتەبە بولعانىن اتاپ ءوتتى. ونىڭ ايتۋىنشا، مۋزىكا - حالىقتاردى جاقىنداستىراتىن كۇش، ال تۇركى ەلدەرى ونەرپازدارىنىڭ شىعارمالارى وركەستر رەپەرتۋارىنان ورىن العان. سونداي-اق ول ديماش قۇدايبەرگەننىڭ كونسەرتكە قاتىسۋىنىڭ ايرىقشا ماڭىزىن اتاپ، ءانشىنى قازاقستاننىڭ عانا ەمەس، تۇتاس تۇركى الەمىنىڭ ماقتانىشى دەپ باعالادى.

ديماش قۇدايبەرگەن مادەنيەت پەن ونەردى ديپلوماتيانىڭ ماڭىزدى قۇرالى دەپ سانايدى. ونىڭ پىكىرىنشە، بىرلەسكەن شىعارماشىلىق جوبالار ەلدەر اراسىنداعى دوستىقتى نىعايتىپ، حالىقتاردىڭ ءوزارا تۇسىنىستىگىن ارتتىرۋعا ىقپال ەتەدى. ءانشى تۇرىك ونەرپازدارىمەن ءبىر ساحنادا ونەر كورسەتىپ، قازاق مۋزىكاسىن شەتەلدىك تىڭدارمانعا تانىتۋعا ءاردايىم ءمان بەرەتىنىن جەتكىزدى.

كونسەرتكە ديماشتىڭ الەمنىڭ ءار تۇكپىرىنەن كەلگەن جانكۇيەرلەرى قاتىستى. رەسەيلىك تىڭدارماندارىنىڭ ءبىرى انشىگە جانە ونىڭ شىعارماشىلىعىنا ارنالعان ولەڭدەر جيناعىن كوپشىلىككە تانىستىردى. ول ديماشتىڭ ونەر جولىن جەتى جىلدان بەرى باقىلاپ كەلە جاتقانىن جانە وسى ۋاقىت ىشىندە وعان ارناپ كوپتەگەن ولەڭ جازعانىن ايتتى. جيناق بيىل جازدا جارىق كورىپ، بۇگىندە ماسكەۋدەگى 17 كىتاپحانانىڭ قورىنا ەنگەن.

قازاقستان اتىنان وپەرا انشىلەرى سالتانات داۋلەتحانوۆا مەن زارينا التىنبايەۆا ونەر كورسەتتى. زارينا التىنبايەۆا تۇركيالىق سوليست مۋرات كاراحانمەن بىرگە بىرنەشە شىعارما ورىندادى. ءانشى كونسەرتكە قاتىسۋدى ۇلكەن مارتەبە سانايتىنىن ايتىپ، مۇنداي شارالار باۋىرلاس ەلدەر اراسىنداعى بايلانىستى نىعايتۋعا ىقپال ەتەتىنىن اتاپ ءوتتى.

كونسەرت تۇركى حالىقتارىنىڭ ورتاق مۋزىكالىق مۇراسىن تانىتىپ، ونەر ارقىلى مادەني بايلانىستى نىعايتتى.