تۇركى الەمىنىڭ ورتاق ءالىپبيى كوميسسياسى 34 ارىپتەن تۇراتىن ۇلگى ۇسىندى
باكۋ. قازاقپارات - 9-11 - قىركۇيەك كۇندەرى ازەربايجان استاناسىندا تۇركى الەمى ورتاق ءالىپبيى كوميسسياسىنىڭ ءۇشىنشى وتىرىسى ءوتتى. بۇل تۋرالى حالىقارالىق تۇركى اكادەمياسى حابارلادى.
جيىننىڭ نەگىزگى ماقساتى - ەكى جىلدىق بىرلەسكەن جۇمىس ناتيجەسىندە جيناقتالعان ءبىلىم مەن تاجىريبەنى پايدالانىپ، تۇركى تىلدەرىنە ورتاق ءالىپبي ۇلگىسىن ازىرلەۋ بولعان.
«عالىمدار 1991 -جىلى ۇسىنىلعان لاتىن قارىپى نەگىزىندەگى «ورتاق تۇركى ءالىپبيى» جوباسىن جان-جاقتى قاراستىردى. كوميسسيا مۇشەلەرى اتالعان جوبانى جەتىلدىرە ءتۇسۋدى كوزدەيتىن ۇسىنىستاردى تالقىلاپ، قاجەتتى قورىتىندىلار جاسادى. وسى قاجىرلى جۇمىستىڭ ناتيجەسىندە 34 ارىپتەن تۇراتىن ورتاق تۇركى ءالىپبي ۇلگىسى تۋرالى ۇسىنىس بويىنشا كەلىسىمگە قول جەتكىزىلدى»، - دەپ جازىلعان اكادەميا حابارلاماسىندا.
ءار ءارىپ تۇركى تىلدەرىندە كەزدەسەتىن ءارتۇرلى فونەتيكالىق دىبىستى بىلدىرەدى.
«بۇل باسقوسۋدىڭ وسىلايشا تابىستى اياقتالۋىن تاريحي ءسات رەتىندە باعالاۋعا بولادى. ورتاق تۇركى ءالىپبيى باعىتىنداعى جۇمىستاردىڭ ىلگەرلەۋى تۇركى حالىقتارىنىڭ تىلدىك مۇرالارىن ساقتاپ، ءوزارا تۇسىنىستىك پەن ىنتىماقتاستىقتى نىعايتا تۇسۋگە ىقپال ەتەدى. بارلىق ءتيىستى مەكەمە ۇسىنىلىپ وتىرعان ورتاق تۇركى ءالىپبيى ۇلگىسىن جۇزەگە اسىرۋعا بەلسەندى قولداۋ كورسەتۋگە شاقىرىلادى»، - دەيدى حالىقارالىق تۇركى اكادەمياسى.
اۆتور
ايجان سەرىكجان قىزى
