تۇركسوي ۇيىمى سۋ تاسقىنىنان زارداپ شەككەن قازاقستان حالقىنا كومەك كورسەتپەك

استانا. KAZINFORM - تۇركى مادەنيەتىنىڭ حالىقارالىق ۇيىمى تۇركسوي ەلىمىزدىڭ ءبىرقاتار وڭىرىندە قاتتى سۋ تاسقىنىنان زارداپ شەككەن قازاقستان ازاماتتارىنا قولداۋ كورسەتۋگە نيەتتى.

تۇركسوي ۇيىمىنىڭ باس حاتشىسى سۇلتان رايەۆتىڭ ايتۋىنشا، حالىقارالىق تۇركى مادەنيەتى ۇيىمى قازاقستانداعى سۋ تاسقىنىنان زارداپ شەككەندەرگە قارجىلاي كومەك كورسەتەدى.

ونىڭ ايتۋىنشا، 2023 -جىلى اقپاندا تۇركيادا بولعان جەر سىلكىنىسىنەن كەيىن تۇركسوي ۇيىمىنىڭ «ءبىز بىرگەمىز» («Biz Birgemiz» ) باستاماسى بۇكىل تۇركى الەمىندە ءساتتى ىسكە قوسىلدى. بۇل تۇركى حالىقتارىنىڭ بىرلىگى مەن ىنتىماعىن ايعاقتايدى.

«تۇركى الەمىنىڭ قيىن- قىستاۋ كۇندەردە بىرلىگى ودان ءارى ارتىپ، باۋىرلاس ەلدەردىڭ قايعى-قاسىرەتىن جەڭىلدەتۋ ءۇشىن بارلىق جاعىنان كومەكتەسۋگە دايىن. وسى قيىن كەزەڭدە ءبىز دە قازاقستانعا، ەل حالقىنا كومەكتەسكىمىز كەلەدى. ءبىز قازاقستانمەن بىرگەمىز! بۇگىندە قازاقستان قيىن كەزەڭدەردى باستان وتكەرىپ جاتىر. سولتۇستىك قازاقستاننىڭ كەيبىر اۋداندارىن قاتتى سۋ باستى. بۇل اپاتتان ەل ەكونوميكاسى زارداپ شەكتى. ءسىزدىڭ قاسىرەتىڭىز - ءبىزدىڭ قاسىرەتىمىز. بارشا تۇركى الەمىنىڭ اتىنان سىزدەرگە كۇش- قۋات تىلەيمىز»، - دەدى تۇركسوي باس حاتشىسى.

ۇيىم اتاپ وتكەندەي، قازاقستاندا سۋ تاسقىنىنان زارداپ شەككەندەرگە قارجىلاي كومەك كورسەتۋ باستاماسى وتە ماڭىزدى. ول باۋىرلاس حالىقتار اراسىنداعى ىنتىماق رۋحىن كورسەتەدى. تۇركى حالقى قيىن-قىستاۋ كەزەڭدە ءبىر-بىرىنە قولداۋ كورسەتۋ ءۇشىن بىرىگۋگە دايىن.

اۆتور

ەركەجان سماعۇلوۆا