ترامپتىڭ تاريفتەرى قور نارىقتارىن قۇلدىراتتى
استانا. قازاقپارات - ترامپتىڭ تاريفتەرىنەن كەيىن بۇگىن ازيا مەن اۆستراليانىڭ قور نارىقتارى قۇلدىرادى، دەپ حابارلايدى 24kz.
ينۆەستورلار ا ق ش باسشىسىنىڭ ساياساتى جاھاندىق ساۋدا سوعىسى مەن رەتسەسسياعا الىپ كەلە مە دەپ الاڭداۋلى. اق ءۇي قوجايىنىڭ شەشىمىنە بايلانىستى كەي ەلدەر قارسى شارالاردى قولعا السا، ەندى ءبىرى ماسەلەنى رەتتەۋ ءۇشىن كەلىسسوز جۇرگىزۋگە دايىن ەكەنىن ءبىلدىرىپ جاتىر.
ازيا قور نارىعى اشىلا سالىسىمەن دۇربەلەڭ باستالدى. جاپونيانىڭ جەتەكشى 225 كومپانياسىن قامتيتىن «نيككەي 225» يندەكسى العاشقى ساعاتتاردا-اق %9- كە ارزاندادى. بۇل كەيىنگى ءبىر جارىم جىلدا بولماعان جاعداي. وڭتۇستىك كورەيانىڭ «كوسپيىندە» ءتىپتى ساۋدا-ساتتىق ۋاقىتشا توقتاتىلدى. ال گونكونگ بيرجاسىنىڭ نەگىزگى يندەكسى HSI بولسا 9 پايىزعا، تايۆانداعى «تايەكس» شامامەن %10- كە تومەندەدى. قىتايدىڭ مەملەكەتتىك وبليگاتسيالارىنىڭ تابىستىلىعى بۇرىن-سوڭدى بولماعان كورەتكىشكە دەيىن ءتۇستى.
روبەرت برۋكس، موناش ۋنيۆەرسيتەتىنىڭ پروفەسسورى:
- نارىقتاعى جاعداي وسىنداي بولادى دەپ كۇتىلگەن. ويتكەنى ترامپتىڭ باج سالىقتارىنا بايلانىستى جاھاندىق ماكروەكونوميكالىق جاعداي ناشارلاپ، ينفلياتسيا قايتا كۇشەيەدى دەگەن كۇدىك بار. ەكىنشىدەن، قازىر احۋالدى بولجاۋ قيىن. ياعني، ساۋدا سوعىسى قالاي ءوربيتىنى بەلگىسىز.
دونالد ترامپ جاپونيادان ەكسپورتتالاتىن ونىمدەرگە %24- تىك باج سالىعىن ەنگىزدى. تاريفتەردەن، اسىرەسە، جاپونيانىڭ كولىك سالاسى قاتتى زارداپ شەگەيىن دەپ تۇر. ەلدەگى ەكى ءىرى اۆتو ءوندىرۋشى Nissan مەن Mitsubishi اكتسيالارى 10%- كە ارزاندادى. ويتكەنى قوس كومپانيا ءۇشىن سولتۇستىك امەريكا نەگىزگى نارىق بولىپ سانالادى.
سيگەرۋ يسيبا، جاپونيا پرەمەر- ءمينيسترى:
- ءبىز دونالد ترامپتان جاپونياعا سالعان باج سالىعىن ازايتۋدى سۇراۋىمىز كەرەك. ارينە، اق ءۇي باسشىسى كەلىسكەننىڭ كۇننىڭ وزىندە ونىڭ ناتيجەسى بىردەن بايقالا قويماس. سوندىقتان جاعداي وڭالعانشا ەكونوميكامىزدى قورعاۋ ءۇشىن باسقا شارالاردى دا قاراستىرۋىمىز كەرەك.
اۆسترالياداعى احۋال دا وسىعان ۇقساس. جەرگىلىكتى قور نارىعى بۇگىن 160 ميلليارد دوللاردان ايىرىلدى. مۇندا نەگىزگى يندەكس سانالاتىن S/ P/ASX 200 بولسا %6 كە قۇلدىرادى. ال جەرگىلىكتى ۆاليۋتانىڭ ا ق ش دوللارىنا قاتىستى باعامى كوروناۆيرۋس كەزىنەن بولماعان دەڭگەيدە دەيىن تومەندەدى. اق ءۇي باسشىسى اۆستراليادان يمپورتقا تومەنگى %10- تىك سالىق ەنگىزسە دە جەرگىلىكتى بيلىك ترامپتىڭ شەشىمى ەكىجاقتى ستراتەگيالىق سەرىكتەستىك ۇستانىمىنا قايشى دەپ وتىر. «دەسە دە، ساۋدا ەرەجەلەرىن ەش جەڭىلدەتپەيمىز»، - دەپ كەسىپ ايتتى.
