ترامپقا قاتىستى سوت وتىرىسى اياقتالدى، ەندى القابيلەر ۇكىم شىعارادى

استانا. KAZINFORM -نيۋ- يوركتە 2016 -جىلعى سايلاۋ الدىندا پورنواكتريسا ستورمي دەنيەلسكە قاتىستى تولەماقىنى سايلاۋشىلاردان جاسىرۋ ءۇشىن قارجى ەسەبىن بۇرمالادى دەپ ايىپتالعان ا ق ش- تىڭ بۇرىنعى پرەزيدەنتى دونالد ترامپتىڭ تاريحي قىلمىستىق سوتىنىڭ تىڭداۋى اياقتالدى، دەپ جازادى ВВС.

سوت ءبىر جارىم ايعا جۋىق ۋاقىتقا سوزىلدى.

ءىستىڭ بۇكىل جاي-جاپسارىن انىقتاۋ ءۇشىن سوتقا نەگىزگى كۋاگەرلەر شاقىرىلدى (سونىڭ ىشىندە دەنيەلستىڭ ءوزى دە)، ولاردان پروكۋرورلار دا، ەكس-پرەزيدەنتتىڭ ادۆوكاتتارى دا جاۋاپ الدى. ترامپ بارلىق وتىرىسقا قاتىستى.

سەيسەنبى كۇنى سوت تاراپتاردىڭ سوڭعى سوزدەرىن تىڭدادى. ادەتتە 16:30- دا اياقتالاتىن تىڭداۋ بۇل جولى كەشكى ساعات 8-گە دەيىن سوزىلدى.

ترامپتىڭ ادۆوكاتى تودد بلانش جالپى العاندا ءۇش ساعاتقا جۋىق، ال مانحەتتەن اۋداندىق پروكۋراتۋراسىنىڭ وكىلى دجوشۋا ستەينگلاسس بەس ساعاتتان استام ۋاقىت سويلەدى.

ولاردىڭ مىندەتى - پروكۋرورلار ترامپتىڭ سايلاۋعا دەيىن بيزنەس جازبالارىن بۇرمالاۋداعى كىناسىن دالەلدەي الدى ما دەگەن باستى سۇراققا جاۋاپ بەرۋ.

ايىپتى نەمەسە ايىپتى ەمەس دەپ تانۋ ءۇشىن بۇكىل القابيلەردىڭ ءبىراۋىزدان شەشىمى قاجەت.

ترامپ تاعىلعان 34 ايىپتىڭ ەشقايسىسى بويىنشا كىناسىن مويىندامادى، سونىمەن قاتار دەنيەلسپەن جىنىستىق قاتىناسقا تۇسپەگەنىن ايتتى.

بلانش ترامپتىڭ كىناسىز ەكەنىن، ال پروكۋرورلار ەشتەڭە دالەلدەي المايتىنىن ايتتى.

پروكۋرور دجوشۋا ستەينگلاسس ەكس- پرەزيدەنتتىڭ ادۆوكاتتارىنا بۇل ءىس بويىنشا مايكل كوەننىڭ بەرگەن ايعاقتارىنان بولەك ترامپتىڭ كىناسىن راستايتىن «كوپتەگەن دالەلدەر» بار دەپ قارسىلىق ءبىلدىردى.

ستەينگلاسس سونىمەن قاتار ستورمي دەنيەلس وتىرىك ايتادى دەگەن قورعاۋشى تاراپتىڭ مالىمدەمەسىن جوققا شىعاردى.

ونىڭ ايتۋىنشا، بۇرىنعى پرەزيدەنتتىڭ ادۆوكاتتارى پورنو اكتريسانى «وزگەرتىپ» قويعان.

اۆتور

ەركەجان سماعۇلوۆا