ترامپ داللاستاعى كىسى ولتىرۋدەن كەيىن يمميگراتسيالىق ساياساتتى كۇشەيتپەك
استانا. KAZINFORM – ا ق ش پرەزيدەنتى دونالد ترامپ تەحاس شتاتىنىڭ داللاس قالاسىندا چاندرا مۋلي ناگاماللايانىڭ ءولتىرىلۋىن «سۇمدىق» قىلمىس جانە يمميگراتسيالىق قاتەلىكتەردىڭ سالدارى دەپ اتادى، دەپ حابارلايدى FOX News.
- مەن تەحاس شتاتىنداعى داللاس قالاسىنىڭ قۇرمەتتى تۇرعىنى چاندرا ناگاماللايانىڭ ولتىرىلگەنى تۋرالى جانتۇرشىگەرلىك حاباردى ەستىدىم، ءبىزدىڭ ەلىمىزدە ەشقاشان بولماۋى ءتيىس كۋبادان كەلگەن زاڭسىز يمميگرانت ونى ايەلى مەن ۇلىنىڭ كوزىنشە قاستاندىقپەن ءولتىردى، - دەپ جازدى دونالد ترامپ Truth Social الەۋمەتتىك جەلىسىندە.
شابۋىل جاساعان 37 جاستاعى كۋبا ازاماتى يوردانيس كوبوس- مارتينەس قالا ورتالىعىنداعى موتەلدە ناگامالاياعا قانجارمەن شابۋىل جاساپ، ايەلى مەن ۇلىنىڭ كوزىنشە وعان جاراقات سالىپ، باسىن كەسىپ تاستاعان.
كۋاگەرلەردىڭ ايتۋىنشا، زورلىق- زومبىلىق سىنعان كىر جۋعىش ماشينا مەن تىلدىك كەدەرگىگە قاتىستى داۋدان كەيىن باستالعان. كوبوس- مارتينەس وقيعا ورنىندا قاماۋعا الىنىپ، اۋىر قىلمىس جاساعانى ءۇشىن ايىپتالدى.
- بۇل ادام بۇرىن بالالاردى جىنىستىق زورلىق- زومبىلىق، كولىك ۇرلاۋ جانە بوستاندىقتان زاڭسىز ايىرۋ سياقتى جانتۇرشىگەرلىك قىلمىستارى ءۇشىن قاماۋعا الىنعان، ءبىراق كۋبا ءوز ەلىندە مۇنداي جاۋىزدىڭ بولۋىن قالاماۋى سەبەبىمەن قابىلەتسىز دجو بايدەن كەزىندە بوساتىلدى. سەنىمدى بولىڭىز، بۇل زاڭسىز قىلمىستىق يمميگرانتتارعا جۇمساقتىق تانىتاتىن ۋاقىت اياقتالدى، - دەپ حابارلادى ا ق ش پرەزيدەنتى.
ترامپ قاماۋداعى كۇدىكتىنىڭ زاڭ بويىنشا جاۋاپقا تارتىلاتىنىن حابارلادى. وعان ءبىرىنشى دارەجەدىگى كىسى ءولتىرۋ ارەكەتى بويىنشا ايىپ تاعىلادى.
بۇعان دەيىن ترامپ ۋكرايندىق بوسقىندى ولتىرگەن ادامدى ءولىم جازاسىنا كەسۋگە شاقىرعانىن جازعان بولاتىنبىز.
