ترامپ قايتادان بيلىك باسىنا كەلدى
استانا. KAZINFORM - دونالد ترامپ 20- قاڭتار، دۇيسەنبى كۇنى جەرگىلىكتى ۋاقىت بويىنشا تۇسكى ساعات 12:00-دە ا ق ش كاپيتولييىنىڭ روتونداسىندا انت بەرىپ، تاعى دا امەريكا قۇراما شتاتتارىنىڭ پرەزيدەنتى بولادى.
بۇل كۇن اۋليە يواننا ەپيسكوپ شىركەۋىندە 92 جىلدان بەرى داستۇرگە اينالعان تاڭعى دۇعا ەتۋ داستۇرىمەن باستالادى. ترامپ پەن جاڭادان سايلانعان ۆيتسە-پرەزيدەنت دجەي ۆەنس لافايەت الاڭىنىڭ ءدال قارسى جاعىنداعى شاعىن شىركەۋدە ءدىندار روبەرت فيشەر دۇعاسى كەزىندە كەزدەسۋ وتكىزدى.
سودان كەيىن ترامپ ا ق ش كاپيتولييىنە بارار الدىندا اقۇيدە پرەزيدەنت دجو بايدەنمەن شاي ىشەدى.
ول 1985 -جىلى رونالد رەيگاننان كەيىن ءوزىنىڭ يناۋگۋراتسياسىن سۋىق اۋا رايىنا بايلانىستى كاپيتوليي عيماراتىنا كوشىرگەن ەكىنشى پرەزيدەنت بولدى.
يناۋگۋراتسيا ادەتتە پرەزيدەنت پەن ۆيتسە-پرەزيدەنتتىڭ، جوعارعى سوت سۋديالارىنىڭ، بۇرىنعى پرەزيدەنتتەردىڭ، ديپلوماتيالىق كورپۋستىڭ، كونگرەسس پەن مينيسترلەر كابينەتىنىڭ مۇشەلەرىنىڭ، گۋبەرناتورلاردىڭ، بىرىككەن شتاب باسشىلارىنىڭ جانە باسقا دا قوناقتاردىڭ وتباسىلارىنا ارنالاتىن.
سونداي- اق شاراعا Tesla-نىڭ باس ديرەكتورى يلون ماسك، Meta باس ديرەكتورى مارك سۋكەربەرگ، Amazon نەگىزىن قالاۋشى دجەفف بەزوس، TikTok باس ديرەكتورى شوۋ جۋ چۋ، OpenAI باسشىسى سەم التمان جانە قىتاي حالىق رەسپۋبليكاسىنىڭ ۆيتسە-پرەزيدەنتى حان جىن قاتىسادى.
انت بەرگەننەن كەيىن ترامپ روتوندادا ءوزىنىڭ يناۋگۋراتسياعا ارنالعان ءسوزىن سويلەيدى. سودان كەيىن ول ا ق ش كاپيتولييىنەن شىعىپ، جەرگىلىكتى ۋاقىت بويىنشا ساعات 15:00-دە باستالاتىن پرەزيدەنتتىك پارادقا قاتىسۋ ءۇشىن Capital One ارەناسىنا بارادى.
كەش ءۇش يناۋگۋراتسيالىق بالمەن اياقتالادى. ترامپ وعان دا قاتىسىپ، ءسوز سويلەيدى.
كۇندىزگى ءىس-شارالاردا بىرنەشە تانىمال ءارتىس ونەر كورسەتەدى.
وسىعان دەيىن ترامپتىڭ يناۋگۋراتسيادان كەيىن بىردەن 100-گە جۋىق جارلىققا قول قويۋدى جوسپارلاپ وتىرعانى تۋرالى جازدىق.
اۆتور
ەركەجان سماعۇلوۆا
