ۇلتتىق بانك تەڭگە باعامىن تۇراقتاندىۋ ءۇشىن ينتەرۆەنتسيا جۇرگىزگەنىن ءمالىم ەتتى

استانا. KAZINFORM - ۇلتتىق بانك ەلدىڭ ۆاليۋتا نارىعىنداعى احۋالعا بايلانىستى رەسمي مالىمەت تاراتتى.

«ءبىرقاتار ىرگەلى فاكتورلاردىڭ ناشارلاۋى سالدارىنان تەڭگەنىڭ ايىرباس باعامى ا ق ش دوللارى ءۇشىن 500 تەڭگە بەلگىسىن ەڭسەردى. قازىرگى ۋاقىتتا بيرجالىق ساۋدا- ساتتىق ءبىر ا ق ش دوللارى ءۇشىن 518-519 تەڭگە ارالىعىندا وتەدى. 28-قاراشاداعى تەڭگەنىڭ ورتاشا سارالانعان باعامى ا ق ش دوللارى ءۇشىن 512,58 تەڭگە بولىپ تۇر. كەشەدەن باستاپ %2,4 السىرەدى.

ۆاليۋتا باعامىنا سىرتقى جانە ىشكى فاكتورلار تەرىس اسەر ەتەدى»، - دەپ جازىلعان ۇلتتىق بانك مالىمەتىندە.

رەسمي مالىمەتتە قازاقستاننىڭ ۆاليۋتا نارىعىنداعى احۋالعا ۇقساس جاعداي دامۋشى نارىقتاردىڭ بارىندە بايقالىپ تۇرعانى ايتىلعان.

«ۇلتتىق بانك تۇراقسىزداندىراتىن اۋىتقۋلاردى بولدىرماۋ ءۇشىن، تەڭگەنىڭ ايىرباس باعامىنىڭ ارتىق قۇبىلمالىلىعىن تەگىستەۋ ءۇشىن جانە شەتەل ۆاليۋتاسىنىڭ ۇسىنىسىن قامتاماسىز ەتۋ ءۇشىن ۆاليۋتالىق ينتەرۆەنتسيالار جۇرگىزەدى.

ۇلتتىق بانك ۆاليۋتا نارىعىنداعى احۋالعا تۇراقتى مونيتورينگ جۇرگىزەدى. ەركىن باعام قۇرۋ رەجيمى جاعدايىندا ۇلتتىق بانك ايىرباس باعامىنىڭ قانداي دا ءبىر دەڭگەيىنە باعىتتالمايدى جانە ونىڭ ترەندىنە كەدەرگى كەلتىرمەيدى. ونىڭ قالىپتاسۋى ىرگەلى فاكتورلارعا سايكەس ودان ءارى جۇزەگە اسىرىلادى.

قارجىلىق تۇراقتىلىق تاۋەكەلدەرى جانە ىرگەلى فاكتورلارعا سايكەس كەلمەيتىن ايىرباس باعامىنىڭ شامادان تىس قۇبىلمالىلىعى تۋىنداعان جاعدايدا، ۇلتتىق بانك ءادىل باعام ءتۇزىلۋىن قالپىنا كەلتىرىپ، ۆاليۋتا نارىعىنىڭ قالىپتى جۇمىس ىستەۋىن قامتاماسىز ەتۋ ءۇشىن ۆاليۋتالىق ينتەرۆەنتسيالار جۇرگىزۋدى جالعاستىرۋعا دايىن»، - دەپ جازىلعان ۇلتتىق بانك مالىمەتىندە.

اۆتور

ەسىمجان ناقتىباي