ترامپ كونگرەستە ينفلياتسيامەن كۇرەس جوسپارىن جاريالادى

استانا. KAZINFORM - دونالد ترامپ ءوزىنىڭ سوزىندە باستى باسىمدىقتارىنىڭ ءبىرى ا ق ش ەكونوميكاسىن قۇتقارۋ، جۇمىس ىستەيتىن وتباسىلارعا جەدەل ءارى قوماقتى كومەك كورسەتۋ ەكەنىن اتاپ ءوتتى، دەپ حابارلايدى Kazinform ءتىلشىسى KDH News - كە سىلتەمە جاساپ.

ول بۇرىنعى اكىمشىلىكتەن اپاتتى جاعدايداعى ەكونوميكا، الاپات ينفلياتسيا قالعانىن ايتتى. بايدەن اكىمشىلىگىنىڭ ساياساتى ەنەرگوتاسىمالداۋشىلارعا باعانى ءوسىرىپ، ازىق-تۇلىك پەن تاماققا دەگەن شىعىندى كوبەيتتى. سونداي-اق ءبىرىنشى كەزەكتە قاجەتتى زاتتاردى ميلليلونداعان امەريكالىقتار ءۇشىن قولجەتىمسىز ەتتى. ا ق ش 48 جىل ىشىندە، ءتىپتى ەل ومىرىندە دەسە دە بولادى - ەڭ كۇشتى ينفلياتسيانى باستان وتكەردى.

ترامپ پرەزيدەنت رەتىندە وسى شىعىنداردى جويىپ، امەريكانى باياعىداي قولجەتىمدى ەتۋگە كۇندە كۇش سالىپ جاتقانىن ايتتى.

قازىر ينفلياتسيامەن كۇرەستە باستى نازار ەنەرگيانىڭ باعاسىن كۇرت تۇسىرۋگە اۋدارىلىپ وتىر. بىزگە دەيىنگى اكىمشىلىك جاڭا مۇناي جانە گاز ارەندالارىن %95 قىسقارتىپ، قۇبىر جەلىلەرىنىڭ قۇرىلىسىن بارىنشا باياۋلاتقان، سونداي-اق 100-دەن استام ەلەكتر ستانسالارىن جاۋىپ تاستاعان.

- ءبىز قازىر وسى ستانسالاردىڭ كوپشىلىگىن اشىپ جاتىرمىز، - دەدى ا ق ش پرەزيدەنتى.

ترامپ پرەزيدەنتتىك قىزمەتتىڭ ءبىرىنشى كۇنى «بۇرعىلا جانە بۇرعىلا» دەگەن ۇرانمەن كومىرتەگىلەردى ءوندىرۋ جونىندە جارلىق شىعارعانىن اتاپ ءوتتى.

ترامپ اكىمشىلىگى الياسكاداعى الىپ گاز قۇبىرىمەن دە جۇمىس ىستەپ جاتىر. ول جاپونيا، وڭتۇستىك كورەيا سىندى وزگە دە ەلدەردىڭ ءارقايسىسى تريلليونداعان دوللار ينۆەستيتسيا قۇيىپ، امەريكانىڭ سەرىكتەسى بولعىسى كەلەتىن الەمدەگى ەڭ ءىرى نىسانداردىڭ ءبىرى. بارلىعى دا ىسكە قوسۋعا دايىن. رۇقسات الىندى، ەندى ترامپ وسى اپتانىڭ سوڭىندا ا ق ش- تا اسا قاجەتتى مينەرالدار مەن سيرەك كەزدەسەتىن مەتالل ءوندىرىسىن كۇرت كەڭەيتۋ باعىتىندا تاريحي شارا قابىلدايدى.

ا ق ش ينفلياتسيامەن ودان ءارى كۇرەسۋ باعىتىندا ەنەرگيا باعاسىن ءتۇسىرىپ قانا قويماي، سالىق تولەۋشىلەردىڭ اقشاسىن بەتالدى شاشۋدى توقتاتادى.

ترامپ بۇل ماقسات ءۇشىن ۇكىمەتتەن تيىمدىلىك دەپارتامەنتىن (DOGE) قۇرعانىن ايتا كەتتى جانە ونىڭ جەتەكشىسى يلون ماسككە اتقارعان اۋقىمدى جۇمىسى ءۇشىن العىس ءبىلدىردى.

ينفلياتسيانى جەڭۋ ءۇشىن ترامپ اكىمشىلىگى يپوتەكا بويىنشا ستاۆكالاردى ازايتپاق. سونداي-اق اۆتونەسيە ءۇشىن تولەمدەردى جانە ازىق-تۇلىك باعاسىن تۇسىرەدى. قارت ادامداردى قورعاۋعا قاجەتتى شارالاردى قولعا الىپ، امەريكالىق وتباسىلارعا قوماقتى قارجى بولەدى.

وسى باعىتتاعى تاعى ءبىر شارانىڭ ءبىرى جاقىندا 5 ميلليون دوللارعا ساتىلا باستايتىن «التىن كارتا» بولادى. ولار ا ق ش- قا سالىق تولەپ، جۇمىس ورىندارىن اشاتىن باقۋاتتى ادامدارعا بەرىلەدى.

ترامپ جوسپارىنىڭ كەلەسى كەزەڭى كونگرەسس قابىلدايتىن بارشاعا ارنالعان سالىق جەڭىلدىكتەرىمەن بايلانىستى تاريحي ەكونوميكانى قۇرۋ بولىپ تابىلادى.

ترامپ باج سالىعىن سالۋدى، كەي جاعدايدا مول كولەمدە سالۋدى ۋادە ەتتى.

- وزگە ەلدەر ونداعان جىلدار بويى باج سالىعىن بىزگە قارسى قولداندى، ەندى ولاردى وزگە ەلدەرگە ءبىز سالامىز. ەۋروپالىق وداق، قىتاي، برازيليا، ءۇندىستان، مەكسيكا، كانادا مەن وزگە دە كوپتەگەن ەلدەر بىزدىكىمەن سالىستىرعاندا شەكتەن تىس جوعارى سالىق الادى. بۇل - ادىلەتسىز. ءۇندىستان بىزدەن كولىك سالىعىن %100 پايىزدان جوعارى الادى. قىتايدىڭ ونىمدەرگە ورتاشا تاريفى بىزدىكىنەن ەكى ەسە كوپ. ال وڭتۇستىك كورەيانىڭ ورتاشا تاريفى ءتورت ەسە جوعارى. سونىمەن بىرگە ءبىز وڭتۇستىك كورەياعا اسكەري جانە باسقا دا كومەكتەر كورسەتەمىز، - دەپ مالىمدەدى ترامپ.

2 -ساۋىردە ءوزارا باج سالىعى كۇشىنە ەنەدى. تاريفتەر امەريكاعا جەتكىزىلەتىن اۋىل شارۋاشىلىعى ونىمدەرىنە جۇرەدى. «تاريفتەر امەريكانى قايتادان باي ءارى ۇلى ەتەدى».

ا ق ش بۇدان بىلاي كانادا مەن مەكسيكاعا جۇزدەگەن ميلليون دوللارعا سۋبسيديا بەرمەيدى.

ترامپ كوممەرتسيالىق جانە اسكەري كەمە قۇرىلىسىن قوسا العاندا امەريكالىق كەمە قۇراستىرۋ ونەركاسىبىن جانداندىراتىنىن مالىمدەدى.

وسى ماقسات ءۇشىن ول اق ۇيدە كەمە قۇرىلىسىنىڭ جاڭا كەڭسەسى قۇرىلاتىنىن ايتىپ، وسى سالانى امەريكاعا قايتارۋ ءۇشىن ارنايى سالىق جەڭىلدىكتەرىن ۇسىندى.

وسىعان دەيىن ترامپ كونگرەستىڭ بىرلەسكەن وتىرىسىندا نە تۋرالى ايتقانىن جازدىق.