ترامپ گارۆارد ۋنيۆەرسيتەتىنىڭ اۋزىنان جىرعان قارجىنى كاسىپتىك مەكتەپتەرگە بەرمەكشى
استانا. KAZINFORM - ا ق ش پرەزيدەنتى دونالد ترامپ دۇيسەنبى كۇنى گارۆارد ۋنيۆەرسيتەتىمەن قاقتىعىستا جەڭىسكە جەتۋگە ۋادە بەرىپ، الەمدەگى ەڭ بەدەلدى وقۋ ورىندارىنىڭ بىرىنەن ميللياردتاعان دوللار كولەمىندەگى قارجىنى الىپ قوياتىنىن العا تارتىپ، تاعى دا قورقىتتى. بۇل تۋرالى NDTV سايتى ترامپتىڭ مالىمدەسىنە سىلتەمە جاساپ، جازدى.
- مەن وتە انتيسەميتتىك گارۆاردتان ءۇش ميلليارد دوللار كولەمىندەگى گرانتتى الىپ، ونى ەلىمىزدەگى كاسىپتىك مەكتەپتەرگە بەرۋدى قاراستىرىپ جاتىرمىن، - دەدى ترامپ دۇيسەنبى كۇنى، ا ق ش- تاعى ەسكە الۋ كۇنىندە، ءوزىنىڭ Truth Social پلاتفورماسىندا جاريالاعان جازباسىندا.
ول سونداي-اق گارۆاردتان شەتەلدىك ستۋدەنتتەردى شىعارۋ ماسەلەسىن كوتەردى - بۇل ا ق ش- تاعى ەڭ كونە ۋنيۆەرسيتەت ءۇشىن نەگىزگى تىرەك بولىپ سانالادى، ويتكەنى شەتەلدىك ستۋدەنتتەردەن الىناتىن وقۋ اقىسى ۋنيۆەرسيتەتتىڭ ماڭىزدى كىرىس كوزى. ترامپ گارۆاردتان وسى ستۋدەنتتەردىڭ ءتىزىمىن ۇسىنۋدى تالاپ ەتىپ وتىر.
ترامپ بۇل ءتىزىمدى «ميللياردتاعان دوللاردىڭ بوسقا جۇمسالعانىن انىقتاۋ ءۇشىن» قاجەت دەپ سانايدى جانە «راديكالدانعان ەسسىزدەر مەن بۇلىكشىلەردىڭ» ەلگە قايتا ورالۋىنا جول بەرمەۋ ءۇشىن قاجەت ەكەنىن ايتتى.
ول ءسوزىن: «قورىقپاڭىزدار، ۇكىمەت سوڭىندا جەڭىسكە جەتەدى!» - دەپ تۇيىندەدى.
بۇعان دەيىن حابارلانعانداي، گارۆاردتىڭ ترامپقا قارسى تارتىسىندا سوت شەتەلدىك ستۋدەنتتەردىڭ مۇددەسىن قورعايتىن ۋنيۆەرسيتەتتى قولداعان بولاتىن.
