ترامپ گۋانتانامودا دەپورتاتسيالانعان يمميگرانتتارعا لاگەر سالۋعا بۇيرىق بەردى
استانا. KAZINFORM - ا ق ش پرەزيدەنتى دونالد ترامپ سارسەنبى كۇنى زاڭسىز يمميگراتسيامەن كۇرەسۋ تۋرالى بۇيرىق شىعارۋدى جالعاستىردى، دەپ جازادى ВВС.

ول كۋبانىڭ گۋانتاناموسىندا يمميگرانتتار ءۇشىن 30 مىڭ ادامعا ارنالعان لاگەر سالۋ تۋرالى بۇيرىققا قول قويدى.
ترامپ بۇل لاگەرگە «امەريكا حالقىنا قاۋىپ توندىرەتىن زاڭسىز شەتەلدىكتەر اراسىنداعى ەڭ قاۋىپتى قىلمىسكەرلەر» جىبەرىلەتىنىن ايتتى.
گۋانتاناموداعى ا ق ش بازاسى سوڭعى ەكى ونجىلدىقتا امەريكالىقتار جيھادشى- تۇتقىنداردى ۇستايتىن اسكەري تۇرمە رەتىندە تانىمال بولدى، ءبىراق BBC- ءدىڭ ورتالىق امەريكاداعى ءتىلشىسى ۋيلل گرانت اتاپ وتكەندەي، بازا سونىمەن قاتار ونداعان جىلدار بويى اسكەري بازادان بولەك ميگراتسيالىق ورتالىق قىزمەتىن اتقاردى.
ترامپ اكىمشىلىگىنىڭ شەكارا جانە يمميگراتسيا جونىندەگى جوعارى لاۋازىمدى قىزمەتكەرى توم حومان جۋرناليستەرگە ءدال وسى ورتالىق 30000 توسەككە دەيىن كەڭەيتىلەتىنىن ايتتى. حومان ونداعى قاماۋ شارتتارى ەڭ جوعارى ستاندارتتارعا ساي بولادى دەپ سەندىردى.
ۋيلل گرانت وسى ۋاقىتقا دەيىن ورتالىقتا نەگىزىنەن ا ق ش-قا تەڭىز ارقىلى زاڭسىز كىرمەك بولعاندار ورنالاسقانىن اتاپ ءوتتى.
بۇل اسكەري تۇرمەدە 2002 -جىلى قۇرىلعاننان بەرى يراك پەن اۋعانستانداعى جانە باسقا جەرلەردەگى اسكەري جورىقتار كەزىندە امەريكالىقتاردىڭ قولىنا تۇسكەن 800-گە جۋىق تۇتقىن بولعان.
امەريكا باسپا ءسوزىنىڭ حابارلاۋىنشا، قازىر ول جەردە بار بولعانى 15 تۇتقىن بار.
ايتا كەتەيىك، دونالد ترامپ بيلىكتەگى ءۇشىنشى كۇنىندە ا ق ش-تىڭ وڭتۇستىك شەكاراسىن زاڭسىز يمميگرانتتار ءۇشىن جابۋعا جانە ولاردى دەپورتاتسيالاۋدى ارتتىرۋعا باعىتتالعان بۇيرىقتارعا قول قويعان بولاتىن.
26 -قاڭتاردا 956 ادام قاماۋعا الىندى.
27- قاڭتاردا ا ق ش- تىڭ يمميگراتسيا جانە كەدەندىك باقىلاۋ پوليتسياسى 1179 ادامدى ۇستادى.
ايتا كەتەيىك، ترامپ ميگرانتتاردى قابىلداۋدان باس تارتقان كولۋمبياعا سانكسيا سالدى.
اۆتور
ەركەجان سماعۇلوۆا