تراكتور مەن كومبايندى 6 پايىزبەن الۋعا بولادى: ءوتىنىم قابىلداۋ قايتا باستالدى

«ءوز جەم- ءشوبىمىز» باعدارلاماسى

باعدارلاما مال شارۋاشىلىعىن جەم-ءشوپ بازاسىمەن قامتاماسىز ەتۋگە، اۋىل شارۋاشىلىعى جانۋارلارىنىڭ ونىمدىلىگىن ارتتىرۋعا جانە مال شارۋاشىلىعى ءونىمىنىڭ كولەمىن ۇلعايتۋعا باعىتتالعان. باعدارلاما بويىنشا قازاقستاندىق جانە شەتەلدىك وندىرىستەگى اۋىل شارۋاشىلىعى تەحنيكاسىن، جەم-ءشوپ دايىنداۋ تەحنيكاسىن جانە جىلجىمالى سۋارۋ جۇيەلەرىن ساتىپ الۋعا بولادى.

سىياقى مولشەرلەمەسى جىلدىق %6، ليزينگ مەرزىمى 10 جىلعا دەيىن، العاشقى جارنا كەمىندە %15.

باعدارلاما بيولوگيالىق اكتيۆتەردى وسىرۋمەن، كۇتىپ- باعۋمەن نەمەسە بورداقىلاۋمەن اينالىساتىن، جەر ۋچاسكەلەرىنىڭ قۇرىلىمىندا جايىلىمدارى جانە (نەمەسە) شابىندىقتارى بار جانە جەم ءوندىرۋدى نەمەسە دايىنداۋدى قۇجاتپەن راستاي الاتىن اۋىل شارۋاشىلىعى تاۋار وندىرۋشىلەرىنە ارنالعان. ليزينگالۋشى ءۇشىن قارسى مىندەتتەمە بەلگىلەنگەن: قارجىلاندىرۋ الىنعان قارجى جىلىنان كەيىنگى ەكى جىل ىشىندە ەڭبەكاقى قورىن جانە سالىقتىق تۇسىمدەردى %10- عا ارتتىرۋ.

«جەڭىلدىكتى ليزينگ %6»

باعدارلاما وتاندىق وندىرىستەگى جانە قۇراستىرۋداعى وزدىگىنەن جۇرەتىن اۋىل شارۋاشىلىعى تەحنيكاسىن جەڭىلدىكتى جاعدايدا قارجىلىق ليزينگكە بەرۋدى كوزدەيدى. فەرمەرلەر تەحنيكانى العاشقى جارناسىز، 10 جىلعا دەيىنگى مەرزىمگە، جىلدىق %6 مولشەرلەمەمەن ساتىپ الا الادى.

«قازاقستاندا جاسالعان»

بۇل باعدارلاما بويىنشا اگرارشىلار ىلمەلى، تىركەمەلى جانە وزدىگىنەن جۇرەتىن اۋىل شارۋاشىلىعى تەحنيكاسىن، سونداي-اق اۋىل شارۋاشىلىعى جانە بالىق ونىمدەرىن، بيولوگيالىق اكتيۆتەردى تاسىمالداۋعا ارنالعان كولىك قۇرالدارىن ساتىپ الا الادى. باعدارلاما شارتى: تەحنيكا وتاندىق وندىرىستە جاسالعان نەمەسە قۇراستىرىلعان بولۋى ءتيىس. مولشەرلەمە جىلدىق %6، مەرزىمى 10-جىلعا دەيىن، العاشقى جارنا ليزينگ نىسانى قۇنىنىڭ كەمىندە %15- ى.

وسىعان دەيىن دەپۋتات اۋىل شارۋاشىلىعى تەحنيكالارىنىڭ باعاسىن تومەندەتۋ ماسەلەسىن كوتەرگەنىن جازعانبىز.