ترامپ يرانعا قارسى اسكەري وپەراتسيانى قايتا باستاۋ ازىرگە ەكىتالاي ەكەنىن ايتتى

ونىڭ ايتۋىنشا، پارسى شىعاناعىنداعى ءبىرقاتار ەل دە قازىرگى بلوكادانىڭ جالعاسۋىن قالايدى. سونداي-اق اڭگىمە بارىسىندا يران يسلام رەسپۋبليكاسىنا قاتىستى كوپتەگەن ماسەلە تالقىلانعان.

- قاتار، ساۋد ارابياسى، ب ا ءا، باحرەين، كۋۆەيت جانە باسقا دا ەلدەر قازىرگى جاعدايدىڭ ساقتالعانىن، ياعني تاريحتاعى ەڭ ءىرى تەڭىز بلوكاداسىنىڭ جانە جاڭا «تەمىر قاقپا» وپەراتسياسىنىڭ - قۇرلىق پەن تەڭىزدەگى شارالاردىڭ جالعاسقانىن قالايتىنى ەڭ ماڭىزدى ماسەلە بولدى، - دەپ جازدى ا ق ش پرەزيدەنتى.

ترامپ يراننىڭ يادرولىق قارۋعا يە بولماۋى كەرەكتىگى جونىندە بارلىق تاراپتىڭ ورتاق پىكىرگە كەلگەنىن اتاپ ءوتتى.

- بارلىعى يراننىڭ يادرولىق قارۋى بولماۋى كەرەك دەگەن پىكىرگە كەلىستى. بۇل ماسەلە تالقىلاۋعا جاتپايدى! ەگەر تاياۋ شىعىستاعى جاعداي وزگەرسە، امەريكا قۇراما شتاتتارى ارەكەت ەتۋگە تولىق دايىن. الايدا قازىرگى ۋاقىتتا مۇنداي جاعدايدىڭ تۋىنداۋى ەكىتالاي سياقتى. يزرايل مەن بۇكىل تاياۋ شىعىس يراننان تونەتىن قاۋىپ-قاتەردەن قورعالعان، - دەپ جازدى ول.

سونداي-اق ا ق ش پرەزيدەنتى قاقتىعىستى توقتاتۋ باعىتىندا وڭ وزگەرىستەر بايقالىپ وتىرعانىن جانە امەريكا مۇددەسى ءاردايىم قورعالاتىنىن مالىمدەدى.

- ءبىز بۇل قاقتىعىستى توقتاتۋ باعىتىندا وڭ ديناميكانى بايقاپ وتىرمىز جانە امەريكانىڭ مۇددەسى ءاردايىم قورعالاتىنىنا كەپىلدىك بەرەمىز. بۇل اسكەري تەكەتىرەس اياقتالعاننان كەيىن امەريكا حالقى مەن بۇكىل الەم الدەقايدا قاۋىپسىز جاعدايدا بولادى، - دەدى ترامپ.

Reuters اگەنتتىگىنە بەرگەن سۇحباتىندا ا ق ش پرەزيدەنتى قاتار مەن ساۋد ارابياسىنىڭ يرانمەن قاقتىعىستى بەيبىت جولمەن شەشۋگە مۇددەلى ەكەنىن ايتقان. سونىمەن بىرگە ۆاشينگتون قاجەت بولعان جاعدايدا اسكەري سوققىلاردى قايتا باستاۋعا دايىن ەكەنىن ەسكەرتكەن.

- قاتار بەيبىت شەشىم بولعانىن قالايدى. ساۋد ارابياسى دا بەيبىت شەشىمدى ءجون كورەدى. ءبىراق ءبىز كەز كەلگەن ۋاقىتتا ارەكەت ەتۋگە دايىنبىز، - دەگەن ترامپ اگەنتتىككە بەرگەن تەلەفون سۇحباتىندا.

ونىڭ ايتۋىنشا، ازىرگە ا ق ش يرانعا قارسى جاڭا سوققىلار جاساۋعا اسىقپايدى. ۆاشينگتون ورمۋز بۇعازىنداعى تەڭىز بلوكاداسىن ساقتاۋدى كوزدەپ وتىر. «جاعدايدىڭ قالاي ءوربيتىنىن كورەيىك. مەن دايىنمىن»، - دەگەن ول.

Associated Press اگەنتتىگىنىڭ حابارلاۋىنشا، ترامپ قاتار پرەمەر-مينيسترىمەن كەزدەسكەننەن كەيىن اق ۇيدە جۋرناليستەرگە يرانمەن سوعىس اسكەري تۇرعىدان ءىس جۇزىندە اياقتالعانىن مالىمدەگەن.

- يراننىڭ اسكەري الەۋەتى ءىس جۇزىندە جويىلدى. ءبىز قازىرگى جاعدايدى ساقتاپ وتىرمىز، - دەدى ا ق ش پرەزيدەنتى.

ونىڭ ايتۋىنشا، يراننىڭ اسكەري باسشىلىعى مەن باسقارۋ قۇرىلىمىنا اۋىر سوققى بەرىلگەن. دەگەنمەن ۆاشينگتون تەگەراننىڭ يادرولىق باعدارلاماسىن ۇزاق مەرزىمدى پەرسپەكتيۆادا بەيتاراپتاندىرۋعا كەپىلدىك بەرەتىن كەلىسىمگە قول جەتكىزۋدى كوزدەيدى.

ايتا كەتەيىك، بۇعان دەيىن ا ق ش پەن يران ۋران بايىتۋ دەڭگەيىن تومەندەتۋ جونىندە كەلىسۋى مۇمكىن ەكەنىن جازدىق.

سونداي-اق ا ق ش يراننىڭ يادرولىق باعدارلاماسى تۋرالى اقپارات ءۇشىن 20 ميلليون دوللار ۇسىنىپ وتىر.