ترامپ يلون ماسكقا كەشىرىم بەرۋگە دايىن ەكەنىن مالىمدەدى

تاسس اگەنتتىگىنىڭ مالىمەتىنشە، New York Post گازەتىنىڭ Pod Force One پودكاستىندا ترامپ جۋرناليست ميراندا ديۆايننىڭ دەموكراتيالىق پارتيا وكىلدەرى يلون ماسكتىڭ SpaceX كومپانياسىن مەملەكەت مەنشىگىنە الۋعا ارەكەت جاساۋى مۇمكىن دەگەن بولجامىن جوققا شىعاردى. الايدا قاجەت بولعان جاعدايدا كاسىپكەر مەن ونىڭ جاقىن كومەكشىلەرىن قورعاۋعا دايىن ەكەنىن ايتتى.

- ءبىز بۇل ادامداردى قورعاۋىمىز كەرەك، - دەدى ترامپ.

ا ق ش باسشىسىنان مۇنى قالاي جۇزەگە اسىرماق ەكەنىن جانە الدىن الا كەشىرىم بەرۋ قۇقىعىن پايدالاناتىنىن سۇراعاندا، ول بۇل قادامعا بارۋعا دايىن ەكەنىن راستادى.

- ارينە، قاجەت بولسا، سولاي ىستەيمىن، - دەپ جاۋاپ بەردى ول.

ا ق ش- تىڭ قازىرگى پرەزيدەنتى وزىنە ءالى ەشقانداي ايىپ تاعىلماعان ادامدارعا دا الدىن الا كەشىرىم بەرە الادى. مۇنداي شەشىم فەدەرالدىق بيلىك ورگاندارىنىڭ ولاردى قىلمىستىق جاۋاپكەرشىلىككە تارتۋىن ايتارلىقتاي قيىنداتادى نەمەسە مۇلدە مۇمكىن ەمەس ەتەدى.

ا ق ش-تا ارالىق سايلاۋ 3 -قاراشادا وتەدى. سايلاۋ بارىسىندا سەناتتىڭ ۇشتەن ءبىرى مەن وكىلدەر پالاتاسىنىڭ بارلىق مۇشەسى، سونداي-اق 36 شتات پەن اۋماقتىڭ گۋبەرناتورلارى قايتا سايلانادى. قازىرگى ۋاقىتتا كونگرەستىڭ قوس پالاتاسىندا دا رەسپۋبليكاشىلدار باسىمدىققا يە.

ەسكە سالايىق، دونالد ترامپ پەن يلون ماسك اراسىنداعى كەلىسپەۋشىلىك 2025 -جىلعى ماۋسىمدا ا ق ش اكىمشىلىگىنىڭ سالىق جانە مەملەكەتتىك شىعىندارعا قاتىستى نەگىزگى زاڭ جوباسى توڭىرەگىندە تۋىنداعان ەدى.

بيىل 6 -قازاندا يلون ماسكتىڭ دونالد ترامپ اكىمشىلىگىمەن قايتادان ىنتىماقتاسا باستاعانى بەلگىلى بولدى. ول پەنتاگوننىڭ «مەريديان» اتتى جاڭا جوباسىنا پالمەر لاكي جانە نيۋت گينگريچپەن بىرگە تەڭ ءتوراعا بولىپ تاعايىندالدى.

ال 16- قازاندا ماسك سەناتتاعى سايلاۋدا رەسپۋبليكاشىلداردىڭ جەڭىسىنە قولداۋ كورسەتۋ ءۇشىن 158 ميلليون دوللار كولەمىندە قاراجات بولگەنى حابارلاندى.