ترامپ سايلاۋداعى بۇرمالاۋشىلىقتى اشكەرەلەگەندەرگە 1 ميلليون دوللار ۇسىندى

— وتكەن سايلاۋدا نەمەسە 2026 -جىلعى الداعى ارالىق سايلاۋدا داۋىستاردى بۇرمالاۋ فاكتىلەرى تۋرالى حابارلاعان ءار ادامعا مۇنداي ارەكەتتەرگە قاتىسى بار ادامدار قاماۋعا الىنىپ، سوتتالعاننان كەيىن 1 ميلليون دوللار تولەنەدى، — دەپ جازدى ترامپ Truth Social الەۋمەتتىك جەلىسىندە.

الايدا ول مۇنداي اقپاراتتى قايدا جانە قالاي جىبەرۋ كەرەگىن، سونداي- اق سىياقى قاي قاراجات ەسەبىنەن تولەنەتىنىن ناقتىلامادى.

ترامپ پەن رەسپۋبليكالىق پارتيانىڭ وزگە دە وكىلدەرى 2020 -جىلعى پرەزيدەنت سايلاۋىندا زاڭبۇزۋشىلىقتار بولعانىن بىرنەشە رەت مالىمدەگەن ەدى. سول سايلاۋدا دەموكراتيالىق پارتيانىڭ وكىلى دجو بايدەن جەڭىسكە جەتكەن. رەسپۋبليكاشىلدار، اتاپ ايتقاندا، پوشتا ارقىلى بەرىلگەن بيۋللەتەندەر مەن داۋىستاردى ساناۋ ماشينالارىنىڭ قولدانىلۋىنا كۇمان كەلتىرىپ، داۋىس بەرۋ قورىتىندىسىن مويىنداماعان.

رەسپۋبليكاشىلدار سايلاۋ ناتيجەسى بويىنشا سوتقا بىرنەشە رەت شاعىمدانعانىمەن، داۋىس بەرۋ قورىتىندىسىن جويۋ ارەكەتتەرى ىسكە اسپادى. سايلاۋ ناتيجەسىنە اسەر ەتە الاتىنداي اۋقىمدى بۇرمالاۋشىلىقتار بولعانىن راستايتىن سەنىمدى دالەلدەر ۇسىنىلمادى.

سوڭعى جىلدارى رەسپۋبليكاشىلدار باسقاراتىن ءبىرقاتار شتاتتا داۋىس بەرۋ تارتىبىنە باقىلاۋدى كۇشەيتۋ جونىندە باستامالار كوتەرىلدى. دەموكراتتار بۇل شارالاردىڭ كەيبىرىن سىناپ، ولار ازاماتتاردىڭ سايلاۋعا قاتىسۋىن قيىنداتۋى مۇمكىن ەكەنىن مالىمدەدى.

ا ق ش- تا ارالىق سايلاۋ 2026 -جىلعى 3-قاراشادا وتەدى. سايلاۋشىلار وكىلدەر پالاتاسىنىڭ بارلىق مۇشەسىن جانە سەنات قۇرامىنىڭ شامامەن ۇشتەن ءبىرىن تاڭدايدى. سونىمەن قاتار ءبىرقاتار شتاتتا گۋبەرناتور سايلاۋى وتەدى. قازىر كونگرەستىڭ قوس پالاتاسىندا دا رەسپۋبليكاشىلدار باسىمدىققا يە.

ايتا كەتەيىك، دونالد ترامپ 24 -قازاندا فلوريدا شتاتىندا كونگرەسكە ارالىق سايلاۋدا مەرزىمىنەن بۇرىن داۋىس بەرگەنىن مالىمدەدى.