تۇرمەدەن شىعارىپ بەرەم: استانادا 57 ميلليون تەڭگەدەن استام اقشا العان الاياققا سوت ۇكىمى شىقتى
استانا. KAZINFORM - استانادا تانىسىن قىلمىستىق جاۋاپتىلىقتان بوساتۋعا كومەكتەسەمىن دەپ 27 ميلليون تەڭگە مەن 30 مىڭ دوللار العان ەر ادام 6 جىل 10 ايعا سوتتالدى. سوتتالۋشى اقشانى يەمدەنگەنى ءۇشىن كىنالى دەپ تانىلدى.
بۇل تۋرالى استانا قالاسىنىڭ قىلمىستىق ىستەر جونىندەگى اۋدان ارالىق سوتى ءمالىم ەتتى.
سوت ماتەريالدارىنا سايكەس، بۇعان دەيىن بىرنەشە رەت الاياقتىق جاساعانى ءۇشىن سوتتالعان ا. ەسىمدى ازامات د. -عا قاتىستى قىلمىستىق ءىستىڭ تەرگەلىپ جاتقانىن بىلگەن. سونداي-اق ونىڭ تۋىستارى ءىستىڭ وڭ شەشىلۋىنە مۇددەلى ەكەنىن اڭعارعان.
وسى جاعدايدى پايدالانعان ول جابىرلەنۋشى گ. -نىڭ اقشاسىن يەمدەنۋدى جوسپارلاعان. 2023 -جىلعى قاڭتاردا ورتاق تانىسى ارقىلى گ. -مەن كەزدەسىپ، ءوزىنىڭ بايلانىستارى بار ەكەنىن جانە قىلمىستىق ءىستىڭ بارىسىنا ىقپال ەتە الاتىنىن ايتقان. د. -نى قىلمىستىق جاۋاپتىلىقتان بوساتۋعا كومەكتەسەتىنىن ايتىپ، قىزمەتى ءۇشىن 27 ميلليون تەڭگە تالاپ ەتكەن.
ۋادەسىنە سەنگەن گ. 2023 -جىلعى 20 -قاڭتاردا دەلدال ارقىلى ا. -عا اتالعان سومانى بەرگەن.
الايدا د. كەيىن 2 جىل 6 ايعا باس بوستاندىعىنان ايىرىلعان. وسىدان سوڭ ا. جابىرلەنۋشىگە تاعى دا حابارلاسىپ، اپەللياتسيالىق ساتىدا د. -نى اقتاپ الۋعا كومەكتەسە الاتىنىن ايتقان. بۇل جولى ول 30 مىڭ ا ق ش دوللارىن تالاپ ەتكەن.
ناتيجەسىندە گ. 2023 -جىلعى 10 -ىركۇيەكتە 20 مىڭ دوللار، ال 24 -قىركۇيەكتە قالعان 10 مىڭ دوللاردى بەرگەن.
وسىلايشا، ا. جابىرلەنۋشىنىڭ 27 ميلليون تەڭگەسى مەن 30 مىڭ دوللارىن يەمدەنىپ، وعان اسا ءىرى مولشەردە ماتەريالدىق زالال كەلتىرگەن. كەيىن جابىرلەنۋشىگە 39 ميلليون 132 مىڭ 900 تەڭگە قايتارىلعان.
سوت قانداي شەشىم شىعاردى؟
سوت وتىرىسىندا پروكۋرور ا. -نى 8 جىلعا باس بوستاندىعىنان ايىرۋدى سۇرادى. ال سوتتالۋشى ءوز كىناسىن مويىنداماي، ءوزىن اقتاۋدى تالاپ ەتتى.
قىلمىستىق كودەكستىڭ 190-بابى 4-بولىگىنىڭ 2) تارماعىندا مۇنداي قىلمىس ءۇشىن 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
سوت جازانى جەڭىلدەتەتىن ءمان-جايلار رەتىندە سوتتالۋشىنىڭ اسىراۋىندا كامەلەتكە تولماعان بالالارى بار ەكەنىن جانە كەلتىرىلگەن زالالدى ءىشىنارا وتەگەنىن ەسكەردى. ال قىلمىستىڭ قايتالانۋى جازانى اۋىرلاتاتىن ءمان-جاي دەپ تانىلدى.
ءىستىڭ ءمان-جايىن، قىلمىستىڭ سيپاتى مەن اۋىرلىعىن، سونداي-اق جابىرلەنۋشىنىڭ پىكىرىن ەسكەرە وتىرىپ، سوت ا. -عا قىلمىستىق كودەكستىڭ 60-بابى بويىنشا تۇپكىلىكتى 6 جىل 10 اي مەرزىمگە باس بوستاندىعىنان ايىرۋ جازاسىن تاعايىندادى.
جابىرلەنۋشىنىڭ ازاماتتىق تالابى قاناعاتتاندىرىلدى.
سوت ۇكىمى ازىرگە زاڭدى كۇشىنە ەنگەن جوق.
بۇعان دەيىن استانادا 15 ادامدى الداپ، 21 ميلليون تەڭگەدەن استام اقشا العان جالعان جوندەۋشى سوتتالعان بولاتىن.
