Toyota-دان شيكىلىك شىقتى: اۆتوكولىكتەردى ساتۋ كەزىندە قوسىمشا جابدىقتاردى ماجبۇرلەپ العىزعان
استانا. KAZINFORM - ايگىلى Toyota كومپانياسىنىڭ قازاقستانداعى رەسمي ديللەرىنىڭ زاڭسىز ارەكەتى اشكەرە بولدى.
الماتى قالاسىنداعى باسەكەلەستىكتى قورعاۋ جانە دامىتۋ اگەنتتىگى دەپارتامەنتى «Toyota Tsusho Kazakhstan Auto» ج ش س- ءنىڭ مونوپوليالىق جاعدايدى تەرىس پايدالانۋ بەلگىلەرى بويىنشا تەرگەۋ جۇرگىزدى.
ءمالىم بولعانداي، 2020-2021 -جىلدارى الماتىدا ساتىلعان اۆتوكولىكتەردىڭ %82- دان استامىندا جابدىقتار قوسىمشا اقىعا ساتىلعانى انىقتالدى.
اگەنتتىكتىڭ مالىمەتىنشە، بۇل جابدىقتىڭ قۇنى 3 ميلليون تەڭگەگە دەيىن جەتكەن، ال كەيبىر ساناتتار بويىنشا ۇستەمە باعا %200- دان اسىپ كەتكەن. وسىلايشا، كومپانيا جاڭا اۆتوكولىكتەردى ساتۋ كەزىندە كليەنتتەرگە قوسىمشا جابدىقتاردى ءماجبۇرلى تۇردە العىزعانى انىقتالىپ وتىر.
- تەرگەۋ ناتيجەلەرى كومپانيا تاراپىنان داۋلاۋعا تۇسكەنىمەن، 2024 -جىلدىڭ سوڭىندا قازاقستان رەسپۋبليكاسىنىڭ جوعارعى سوتى دەپارتامەنتتىڭ تەرگەۋىن زاڭدى دەپ تانىدى. الماتى قالاسى بويىنشا اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتتىڭ قاۋلىسىمەن جاڭا جەڭىل اۆتوكولىكتەردى ساتۋ كەزىندە كليەنتتەرگە قوسىمشا جابدىقتاردى ماجبۇرلەپ ۇسىنۋ فاكتىلەرى بويىنشا كومپانياعا مونوپوليستىك قىزمەتتەن تۇسكەن تابىس (پايدا) كولەمىنىڭ %5- ى مولشەرىندە اكىمشىلىك ايىپپۇل سالىندى. اقشالاي تۇردە ايىپپۇل سوماسى 88 ميلليون تەڭگەنى قۇرادى، - دەلىنگەن حابارلامادا.
ءبىرىنشى ينستانتسيا سوتىنىڭ قاۋلىسى زاڭدى كۇشىنە ەنگەن جوق.
ەسكە سالا كەتەيىك، باسەكەلەستىكتى قورعاۋ جانە دامىتۋ اگەنتتىگىنىڭ ماماندارى ستوماتولوگيالىق قىزمەتتەردىڭ قۇنى مەملەكەت تاراپىنان رەتتەلمەيتىنىن، ءبىراق ءبىر قىزمەتكە ەكى ءتۇرلى باعا ۇسىنۋ زاڭعا قايشى ەكەنىن ايتقانىن جازعان بولاتىنبىز.
