ۆەتنام كومپانياسى Qazaq Air- دىڭ 38 ميلليارد تەڭگە قارىزىن جاپتى
استانا. KAZINFORM - كولىك ءمينيسترى مارات قارابايەۆ Qazaq Air اۋە كومپانياسىنىڭ ساتىلۋىنا قاتىستى پىكىر ءبىلدىردى.
«VietJet اۋە كومپانياسىنىڭ ءبىزدىڭ نارىققا كىرۋى باسەكەلەستىكتى ارتتىرا وتىرىپ اۋە بيلەتىنىڭ قۇنىنا اسەر ەتەدى. توتەنشە جاعدايلاردا قازاقستان اۋماعىنداعى بارلىق وبەكتىنىڭ مەملەكەتتىك ورگانداردىڭ باقىلاۋىندا ەكەنىن رەتكە كەلتىرەتىن زاڭ بار، ياعني توتەنشە جاعدايلار بويىنشا جەكە ءتارتىپ بار»، - دەدى مارات قارابايەۆ ءماجىلىس الاڭىندا ب ا ق وكىلدەرىنىڭ ساۋالىنا جاۋاپ بەرە تۇرىپ.
سونداي-اق، جۋرناليستەر ۆەدومستۆو باسشىسىنان «Qazaq Air» كومپانياسىنىڭ اتاۋى وزگەرۋ مۇمكىندىگى جايلى سۇرادى.
«بۇل جاڭا ينۆەستوردىڭ ەركىندە، اتاۋ ماسەلەسىن ءوز بەتىنشە شەشسىن. ءبىر بەلگىلىسى - حالىقارالىق رەيستەر مىندەتتى تۇردە بولادى»، - دەيدى ول.
كولىك ءمينيسترى مارات قارابايەۆ Qazaq Air اۋە كومپانياسىن شەتەلدىك ينۆەستورعا ساتۋدىڭ سەبەپتەرى مەن وڭ تۇستارىن اتادى.
«Vietjet Air كومپانياسى قازىردىڭ وزىندە 184 بورتقا يە جانە بۇل كومپانيانىڭ بىرنەشە مىندەتى بار. ءبىرىنشى، «Qazaq Air» كومپانياسىنىڭ 38 ميلليارد تەڭگە سوماسىنداعى قارىزى تولىعىمەن جابىلدى. ەكىنشى، قازاقستاندا تىركەلەتىن قوسىمشا 20 اۋە رەيسىن ىسكە قوسادى، تۇتاستاي العاندا كومپانيا قازاقستان اۋماعىندا 50 اۋە بورتىنا جەتكىزۋدى جوسپارلاپ وتىر. بۇل دەگەنىمىز 5 جىل ىشىندە قازاقستاندا قوسىمشا جاڭا 50 بورت كەلەدى جانە ينۆەستيتسيا سوماسى 5 ميلليارد تەڭگەدەن كەم بولمايدى. سالىستىرساق، نارىقتا 23 جىل بويى جۇمىس ىستەپ كەلە جاتقان «ەير استانا» اۋە كومپانياسىنىڭ 50 اۋە بورتى بار»، - دەدى ءماجىلىستىڭ الاڭىندا ب ا ق وكىلدەرىنىڭ ساۋالىنا جاۋاپ بەرگەن مارات قارابايەۆ.
ونىڭ ايتۋىنشا، ۆەتنامدىق «VietJet Air» اۋە كومپانياسى ەلىمىزدە قوسىمشا 4 مىڭ جاڭا جۇمىس ورنىن اشادى.
«سول سياقتى ەل ىشىندە عانا ەمەس، حالىقارالىق رەيستەر دە بولادى. سونىمەن قاتار ءبىز كومپانيامەن، ينۆەستورمەن اۋەجايلاردى ۇسىنۋ تۋرالى ماسەلەنى تالقىلايمىز. اۋە بورتى 50-گە دەيىن ۇلعايادى دەسەك، ولاردى ورنالاستىراتىن اۋەجاي بولۋى كەرەك. ءبىز بىرنەشە اۋەجايدى قوسىمشا ينۆەستيتسيالار سالىناتىن شارتتارمەن سەنىمگەرلىك باسقارۋدى بەرۋ ماسەلەسىن قولعا الماقپىز. VietJet Air كومپانياسى اۋەجايعا نەگىزدەلگەن حاب عانا ەمەس، ونى قازاقستانعا جۇكتەردى جەتكىزۋ جانە ونىڭ ىشىندە قازاقستان اۋماعىندا باسقا ەلدەردەن جۇكتەردى جيناۋ ورتالىعى رەتىندە پايدالانۋدى جانە ودان ءارى ونى قازاقستاننان تىس جەردە تاسىمالداۋ جاعىندا قاراستىرامىز. كومپانيا تۇركىستان، قىزىلوردا، شىعىس قازاقستان وبلىسىنداعى جانە باسقا اۋەجايلارعا قىزىعۋشىلىق تانىتۋدا. بۇل ءبىزدىڭ كەلىسسوزدەر ۇستانىمىمىز، سوڭعى شەشىم قوسىمشا حابارلانادى»، - دەيدى ول.
اۆتور
ابىلايحان جۇماشيەۆ
