تەمىرجولدى دۇرىس كەسىپ وتپەگەندەر 9 ايعا كولىك جۇرگىزۋ قۇقىعىنان ايىرىلۋى مۇمكىن
استانا. KAZINFORM - تەمىرجولدى كەسىپ ءوتۋ ەرەجەسىن بۇزعاندار 9 ايعا كولىك جۇرگىزۋ قۇقىعىنان ايىرىلۋى مۇمكىن. اكىمشىلىك كودەكسكە وسىنداي وزگەرىس ەنگىزۋ ۇسىنىلىپ وتىر.
بۇل تۋرالى ءماجىلىس دەپۋتاتى ءۇنزيلا شاپاق زاڭ جوباسىنىڭ ءبىرىنشى وقىلىمىندا ايتتى.
«زاڭ جوباسىنىڭ اياسىندا تەمىرجول وتپەلەرىنەن ءوتۋ قاعيدالارىن بۇزعانى ءۇشىن قولدانىلاتىن جازانى قاتاڭداتۋدى كوزدەيتىن وزگەرىستەر كوزدەلەدى. كەيىنگى جىلداردا تەمىر جولدا وسىنداي 58 جول-كولىك وقيعاسى تىركەلگەن. ونىڭ كوبى اۋىر زارداپتارعا، ادام ولىمىنە اكەلەدى. سونىمەن قاتار مال جايۋ، باعۋ بارىسىندا تەمىرجول وتكەلى ارقىلى ايداۋ كەزىندە جول-كولىك وقيعالارى بولىپ جاتادى. وسىنداي وقيعالاردىڭ كوبەيگەنىنە بايلانىستى كودەكستە ايىپپۇل مولشەرى كوتەرىلدى. سونداي-اق، جول-كولىك وقيعاسى سالدارىنان كولىك قۇرالدارى نەمەسە جول قۇرىلىستارى بۇلىنسە، توعىز اي مەرزىمگە كولىك جۇرگىزۋ قۇقىعىنان ايىرۋ قاراستىرىلادى»، - دەدى ءۇنزيلا شاپاق.
اۆتور
ەسىمجان ناقتىباي
