Temu ا ق ش- تاعى تابىسىنىڭ كۇرت تومەندەگەنىن حابارلادى
استانا. قازاقپارات - Temu بيۋدجەتتىك ماركەتپلەيسىنىڭ يەسى PDD Holdings سوڭعى توقساندا ا ق ش- تاعى تابىسىنىڭ شامامەن %40- عا ازايعانىن مالىمدەدى.
حولدينگتىڭ رەسمي ەسەبىنە سايكەس، Temu- ءدىڭ 2025 -جىلدىڭ ءبىرىنشى توقسانىنداعى ا ق ش- تاعى پايداسى 2,22 ميلليارد دوللاردى قۇرادى. بۇل 2024 -جىلدىڭ ءبىرىنشى توقسانىمەن سالىستىرعاندا %38- عا تومەن. ماماندار مۇنداي كۇرت قۇلدىراۋدى ترامپ ەنگىزگەن سالىقتارمەن بايلانىستىرادى.
اتاپ ايتقاندا، بيىلعى ءساۋىر ايىندا ا ق ش پرەزيدەنتى 800 دوللاردان تومەن بولاتىن تاۋارلارعا سالىق سالىنبايتىن de minimis زاڭىن جويدى. بۇدان كەيىن ترامپ اكىمشىلىگى قىتايدان كەلەتىن يمپورتتىق تاۋارلارعا سالىناتىن سالىقتى %145- عا دەيىن كۇرت كوتەردى. بۇعان جاۋاپ رەتىندە Temu ا ق ش اۋماعىندا قىتايدان تىكەلەي جەتكىزىلەتىن تاۋارلاردى ساتۋدان باس تارتتى. ونىڭ ورنىنا، كومپانيا ەندى تەك ا ق ش قويمالارىندا ورنالاسقان تاۋارلاردى عانا امەريكالىق تۇتىنۋشىلارعا ۇسىناتىنىن مالىمدەدى.
PDD Holdings كومپانياسىنىڭ نەگىزىن قالاۋشىلاردىڭ ءبىرى ءارى قوسالقى اتقارۋشى ديرەكتورى لي چەننىڭ ايتۋىنشا، Temu تابىسىنىڭ كۇرت تومەندەۋىنە قىتاي ىشكى نارىعىنداعى باسەكەلەستىكتىڭ كۇشەيۋى دە اسەر ەتكەن.
ايتا كەتەيىك، Temu- ءدىڭ قازاقستانداعى تابىسى تۋرالى PDD Holdings ەشقانداي ەسەپ بەرمەيدى. بيىلعى جىلدىڭ باسىندا «اق جول» پارتياسىنىڭ دەپۋتاتتارى بۇل ماسەلەگە نازار اۋدارىپ، شەتەلدىك ماركەتپلەيستەردەن قوسىلعان قۇن سالىعىن (ق ق س) الۋدى ۇسىندى. ولار تەك 2023 -جىلى عانا مەملەكەت قازىناسىنا شەتەلدىك پلاتفورمالاردان ق ق س تۇرىندەگى 60 ميلليارد تەڭگەدەن استام قاراجات تۇسپەگەنىن ايتتى.
2025 -جىلدىڭ اقپان ايىندا Temu باسقا شەتەلدىك ماركەتپلەيستەرمەن بىرگە قازاقستاندا سالىقتىق تىركەۋدەن ءوتتى. دەگەنمەن، قازاقستاندىقتاردىڭ بۇل ساۋدا پلاتفورماسىنا قانشالىق تابىس اكەلىپ وتىرعانى تۋرالى اشىق ءارى ناقتى ەسەپتەر ءالى كۇنگە دەيىن جاريالانعان جوق.
