تبيليسيدە ارنايى جاساق شەرۋشىلەردى سۋاتقىشتار جانە كوزدەن جاس اعىزاتىن گاز قولدانىپ، تاراتتى
استانا. KAZINFORM - گرۋزيا استاناسىنداعى جاپپاي نارازىلىقتىڭ ونىنشى كۇنى ارنايى جاساق شەرۋشىلەردى سۋاتقىشتار مەن كوزدەن جاس اعىزاتىن گاز قولدانىپ، تاراتتى، دەپ حابارلايدى DW.
گرۋزيا استاناسىندا ارنايى جاساق سوڭعى ءۇش كۇندە العاش رەت سۋاتقىشتار مەن كوزدەن جاس اعىزاتىن گاز قولدانىپ، رۋستاۆەلي داڭعىلىندا شەرۋگە شىققانداردى تاراتا باستادى. بۇل تۋرالى 7-جەلتوقسان، سەنبىگە قاراعان ءتۇنى «Грузия Online» پورتالى حابارلادى. باسىلىمنىڭ مالىمەتىنشە، تاراتۋعا شەرۋشىلەردىڭ پيروتەحنيكالىق زاتتاردى قولدانۋى سەبەپ بولعان.
گرۋزيا پارلامەنتى ورنالاسقان داڭعىلداعى شەرۋدى پوليتسيا تاراتا باستاعاننان ەكى جارىم ساعات وتكەن سوڭ ەشكىم قالمادى. كەيبىر نارازىلىق بىلدىرۋشىلەر قالا جاعالاۋىنا كوشتى. سوندا دەمونسترانتتار مەن بەلگىسىز ادامدار اراسىندا توبەلەس بولعان.
گرۋزيا پرەزيدەنتى سالومە زۋرابيشۆيلي X الەۋمەتتىك جەلىسىندە پرەمەر-مينيستر يراكلي كوباحيدزەنىڭ تبيليسي كوشەلەرىندەگى زورلىق-زومبىلىق توقتادى دەگەن سوزىنە پىكىر ءبىلدىردى.
- وتىرىك پەن سينيزم! ەگەر «كوشەدەگى زورلىق-زومبىلىق توقتاسا»، وندا بۇگىنگى قاتىگەزدىكتىڭ ءمانى نەدە؟ اناسىنان بالالاردى ۇرلاۋ ما؟ ايەلدەردەن كەك الۋ ما؟ - دەپ جازدى ول.
گرۋزين وپپوزيتسياسى بيلىكتىڭ ە و- عا كىرۋ جونىندەگى كەلىسسوزدەردى 2028 -جىلعا دەيىن توقتاتۋ تۋرالى شەشىمىنە نارازىلىق ءبىلدىرىپ جاتىر.
ەلميرا ورالبايەۆا
