«تازا قازاقستان» اكسياسىنا 7 ميلليون ادام قاتىسىپ، 130 مىڭ گەكتار جەر تازارتىلدى - پرەزيدەنت
استانا. KAZINFORM - «تازا قازاقستان» ەكولوگيالىق باستاماسى ەل كولەمىندە اۋقىمدى قوعامدىق قوزعالىسقا اينالدى. جىل باسىنان بەرى 600 دەن استام ەكولوگيالىق ءىس-شارا وتكىزىلىپ، وعان 7 ميلليون ادام قاتىستى.
وسى كەزەڭدە 130 مىڭنان استام گەكتار جەر تازارتىلىپ، 1,3 ميلليون تال ەگىلگەن. بۇل تۋرالى مەملەكەت باسشىسى قاسىم-جومارت توقايەۆ پرەزيدەنت ساياباعىندا وتكەن تازا قازاقستان» ەكولوگيالىق اكسياسىندا ايتتى.
پرەزيدەنتتىڭ ايتۋىنشا، «تازا قازاقستان» جوباسىنىڭ ماقساتى - ەلىمىزدى كوركەيتۋ، ۇلتىمىزدى ورتاق ىسكە جۇمىلدىرۋ ارقىلى ىنتىماق-بىرلىگىمىزدى كۇشەيتۋ.
- بۇگىندە قازاقستاننىڭ ءار ايماعىندا اۋقىمدى جۇمىس ءجۇرىپ جاتىر. جىل باسىنان بەرى ەلىمىز بويىنشا 600 دەن استام ءتۇرلى ەكولوگيالىق ءىس شارا ءوتتى. وسى ماڭىزدى جۇمىسقا 7 ميلليون ادام قاتىستى، 130 مىڭنان استام گەكتار جەر تازارتىلدى. ەلىمىزدە 1,3 ميلليون تال ەگىلدى. مۇنىڭ ءبارى از شارۋا ەمەس، شىن مانىندە كوپ جۇمىس ىستەلىپ جاتىر. بۇل ازاماتتارىمىزدىڭ وتانىمىزعا دەگەن تازا نيەتى، شىنايى قامقورلىعى جانە ەڭ باستىسى ەڭبەكقورلىق، - دەدى قاسىم-جومارت توقايەۆ پرەزيدەنت ساياباعىندا.
وسى ورايدا مەملەكەت باسشىسى ناقتى ىسكە بەلسەنە اتسالىسقان بارلىق ازاماتقا العىس ايتتى.
- وسىنداي ناعىز وتانشىل، پاتريوت ازاماتتاردى مەملەكەتىمىز ماراپاتتاۋ كەرەك. الدىمىزدا كەلە جاتقان تاۋەلسىزدىكتىڭ مەرەيلى تويىندا بۇل قۇرمەتتى مىندەتتى ورىندايمىن، - دەدى پرەزيدەنت.
ايتا كەتەيىك، مەملەكەت باسشىسى قاسىم-جومارت توقايەۆ «تازا قازاقستان» ەكولوگيالىق اكسياسىنا قاتىستى جانە جاس ەكوبەلسەندىلەرمەن بىرگە پرەزيدەنت ساياباعى اۋماعىندا اعاش ەكتى.
بۇعان دەيىن ق. توقايەۆ ەلىمىزدىڭ ءاربىر ازاماتى بۇگىن دە، ەرتەڭ دە تازا قازاقستاندا جايلى ءومىر ءسۇرۋى كەرەكتىگىن ايتقان ەدى.
