تايلاندتا ياحتانىڭ جارىلۋى: زارداپ شەككەن قازاقستاندىقتار وقيعانىڭ ءمان-جايىن ايتتى
پحۋكەت. KAZINFORM - پحۋكەتتەن 9 شاقىرىم جەردەگى مايتون ارالىندا ورتەنگەن ياحتادا بولعان قازاقستان ازاماتى دۋمان بايكەن وسى وقيعانىڭ ءمان-جايىن ايتىپ بەردى.
- ءدال قازىر جاعدايىمىز جاقسى. ءورت بولعان كەزدە مەن ياحتادا بولدىم، ال زايىبىم (باقىتگۇل بايكەن) سۋدا ءجۇزىپ ءجۇردى. جالپى، ياحتادا تەحنيكالىق اقاۋ بار ەكەنىن الدىن الا سەزدىك. سەبەبى جولعا شىققان كەزدە، 10 مينۋتتان كەيىن بەنزين ءيسى سەزىلىپ، ياحتانىڭ ءبىر قوزعالتقىشى ىستەن شىقتى. ەكىنشى قوزعالتقىشىمەن ارەڭ دەگەندە جاقىندا تۇرعان ارالعا جەتتىك… ەكيپاج مۇشەلەرى قايىقتى جوندەۋگە كىرىستى. ال جولاۋشىلاردىڭ كەيبىرى جاعالاۋدا بولسا، كەيبىرى سۋدا بولدى. سول كەزدە مەن دە ياحتانىڭ جانىندا سۋدا ءجۇزىپ جۇرگەن ەدىم. 20 مينۋتتان سوڭ كيىمىمدى اۋىستىرۋ ءۇشىن ياحتاعا كوتەرىلىپ كەلە جاتقاندا جارىلىس بولدى، - دەدى د. بايكەن تايلاندتاعى دەمالىس ۇيىنەن ونلاين رەجيمدە Jibek Joly تەلەارناسىنا بەرگەن سۇحباتىندا.
ونىڭ ايتۋىنشا، ءورت كەزىندە ول سۋعا سەكىرىپ، ايەلىمەن بىرگە جاعالاۋعا شىققان. جارىلىس سالدارىنان قولى كۇيىپ قالعان. جارتى ساعاتتان كەيىن تۋريستەردى قۇتقارۋشىلار الىپ كەتكەن. ياحتادا شامامەن 37 ادام، ونىڭ تورتەۋى - قازاقستان ازاماتى.
- بۇل جەردە پوليتسيا مەن اۋرۋحانا قىزمەتكەرلەرى جاقسى قابىلداپ، كۇتىم جاسادى، العاشقى كومەگىن ۇسىندى. ال ۆولونتەرلەر بىزگە تەز ارادا كيىم جەتكىزىپ، تاماقتاندىردى. ياحتادا قازاقستاننان 4 ادام بولدىق، ەكەۋى الماتىدان. الماتىلىق جىگىتتىڭ اياعىن كۇيىك شالدى، ال قىزدىڭ شاشى كۇيىپ قالدى. ەرتەڭ گوسپيتالگە تاعى بارامىز. وسى ەلدەگى كونسۋل بىزبەن بايلانىسقا شىقتى، قازىر ءبىز ورنالاسقان قوناق ۇيگە كەلەدى، - دەدى دۋمان بايكەن.
ونىڭ سوزىنە قاراعاندا، ياحتاداعى زاتتارى مەن قۇجاتتارى ورتەنىپ كەتكەن. كونسۋلدىق قۇجاتتاردى دايارلاۋعا كومەكتەسەدى.
- ءبىز وسىندا 30-ناۋرىزدا كەلدىك. دەمالىسىمىز 7 -ساۋىرگە دەيىن جوسپارلانعان، - دەدى ول.
بۇعان دەيىن تايلاندتا قازاقستاندىقتار مىنگەن ياحتا جارىلعانىن جازعان ەدىك.
اۆتور
رۋسلان عابباسوۆ
