تانىمال بلوگەر قايسار قامزا ۆەتنامنان ەكستراديسيالاندى

تەرگەپ-تەكسەرۋ ورگانىنىڭ نۇسقاسى بويىنشا 2025 -جىلعى قاڭتاردا ول الەۋمەتتىك جەلىلەر مەن مەسسەندجەرلەردەگى اۋقىمدى اۋديتوريانى پايدالانا وتىرىپ، سىياقى ءۇشىن زاڭسىز ينتەرنەت-كازينو جارناماسىن ورنالاستىرعان جانە قازاقستان ازاماتتارىن قۇمار ويىندارىنا قاتىسۋعا تارتقان.

ينتەرنەت-كازينونى ناسيحاتتاعانى ءۇشىن ونىڭ كريپتوۆاليۋتالىق ءاميانىنا 200 مىڭ ا ق ش دوللارى تۇسكەن.

— قىلمىستىق توپتىڭ قاتىسۋشىلارى 2021 -جىلدان باستاپ 2025 -جىلدى قوسا ەسەپتەگەن مەرزىمدە قازاقستاندا بىرنەشە زاڭسىز ونلاين-كازينونىڭ قىزمەتىن ۇيىمداستىرىپ، تولەم تەرمينالدارى ارقىلى 106 ميلليارد تەڭگەدەن استام قاراجاتتى زاڭسىز يەمدەنگەن، — دەلىنگەن حابارلامادا.

وسى ورايدا، قىلمىستىق توپتىڭ 9 سىبايلاس قاتىسۋشىسى قاماۋعا الىنعانىن، ال قالعاندارىن، ونىڭ ىشىندە جوعارىدا اتالعان كۇدىكتىگە دە حالىقارالىق ىزدەستىرۋ جاريالانعانىن اتاپ وتكەن ءجون.

— بيىل ماۋسىم ايىندا ىشكى ىستەر مينيسترلىگىنىڭ ينتەرپول ۇلتتىق ورتالىق بيۋروسىنىڭ ساۋالى بويىنشا ول ۆەتنام اۋماعىندا ۇستالىپ، باس پروكۋراتۋرانىڭ سۇراۋ سالۋى نەگىزىندە قازاقستانعا ەكستراديسيالاندى، — دەپ حابارلادى باس پروكۋراتۋرادان.

قازىرگى ۋاقىتتا كۇدىكتى تەرگەۋ يزولياتورىندا كۇزەتپەن قاماۋعا الىندى.

كۇدىكتىگە تاعىلىپ وتىرعان ايىپ بويىنشا وعان سول ارەكەتتى جاساعانى ءۇشىن مۇلكى تاركىلەنىپ، جەتى جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىنداۋ كوزدەلگەن.

ەسكە سالا كەتەيىك، ءى ءى م زاڭسىز ويىن بيزنەسىن ۇيىمداستىرعانى ءۇشىن حالىقارالىق ىزدەۋدە جۇرگەن بلوگەر قايسار حامزا ءساۋىر ايىندا ۇستالعان بولاتىن.

ال ماۋىسمدا ق ر سىرتقى ىستەر مينيسترلىگى زاڭسىز ويىن بيزنەسىن ۇيىمداستىرعانى ءۇشىن حالىقارالىق ىزدەۋ جاريالانعان بلوگەر قايسار قامزانىڭ ۆەتنامدا قاماۋدا وتىرعانىن مالىمدەدى.