تاسقىننان قورعايتىن 20 سۋ قويماسى سالىنادى
استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۇكىمەت وتىرىسىندا 2030 -جىلعا دەيىن 70 ەلدى مەكەندى تاسقىننان قورعايتىن 20 سۋ قويماسى سالىناتىنىن ايتتى.
«2030 -جىلعا دەيىن 9 وبلىستىڭ اۋماعىندا 20 جاڭا سۋ قويماسىنىڭ قۇرىلىسى اياقتالادى دەپ جوسپارلانىپ وتىر. 20 سۋ قويماسىن ىسكە قوسۋ حالقىنىڭ سانى 137 مىڭ ادام بولاتىن 70 اۋىلدىق ەلدى مەكەندى سۋ باسۋ قاۋپىن تومەندەتۋگە مۇمكىندىك بەرەدى»، - دەدى مينيستر.
سونداي- اق ول قازىر مينيسترلىك 9 نىسان بويىنشا جوبالىق- سمەتالىق قۇجاتتاما ازىرلەپ جاتقانىن اتاپ ءوتتى.
«بۇعان قوسا 9 وبلىستىڭ اۋماعىنداعى 15 سۋ قويماسىن قايتا جاراقتاۋ جۇمىستارى باستالادى. بۇل 75 مىڭ ادام تۇرىپ جاتقان 64 ەلدى مەكەننىڭ سۋ باسۋ قاۋپىن تومەندەتۋگە مۇمكىندىك بەرەدى»، - دەدى نۇرجان نۇرجىگىتوۆ.
اۆتور
ەسىمجان ناقتىباي
