تاسقىننان قاۋىپسىز جەرگە كوشىرىلگەندەر سانى 100 مىڭعا جاقىندادى

استانا. KAZINFORM - توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش تاسقىنمەن كۇرەسكە تارتىلعان اۋە كەمەلەرىنىڭ سانى 17-گە جەتكەنىن ايتتى.

«سۋ تاسقىنى باستالعالى بەرى ازاماتتىق قورعانىس قىزمەتتەرى 99869 ادامدى، ونىڭ ىشىندە 36591 بالانى قاۋىپسىز جەرلەرگە جەتكىدى. ۋاقىتشا ورنالاسۋ پۋنكتتەرىنە 6 586 ادام، ونىڭ ىشىندە 3 197 بالا ورنالاستى. 9 ميلليون تەكشە مەتر ەرىگەن قار سۋى سورىپ شىعارىلدى، 1,6 ميلليون قاپشىق جانە 1,2 ميلليون توننا ينەرتتى ماتەريال توسەلدى. بۇگىنگى تاڭدا اۆاريالىق- قۇتقارۋ جۇمىستارىندا 34 272 ادام، 4 مىڭ تەحنيكا، 17 اۋە كەمەسى جۇمىلدىرىلدى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.

ونىڭ سوزىنشە، اتىراۋ، اقتوبە، اقمولا، قوستاناي، شىعىس قازاقستان، سولتۇستىك قازاقستان وبلىستارىندا 3 563 جەر ءۇي، 563 اۋلا مەن 1 778 ساياجاي ءۇيى سۋ استىندا قالىپ وتىر. 3 052 ءۇي مەن 1 935 اۋلادان سۋ بۇرىلعان.

«ەلىمىزدىڭ اقتوبە، قوستاناي، باتىس قازاقستان، اقمولا، قاراعاندى، اتىراۋ، سولتۇستىك قازاقستان جانە ۇلىتاۋ وبلىستارىندا جەرگىلىكتى اۋقىمداعى 34 توتەنشە جاعداي رەجيمى ارەكەت ەتەدى. مينيسترلىك ازاماتتاردى اسا مۇقيات بولۋعا، سۋ تاسقىنى كەزەڭىندە قاۋىپسىزدىك شارالارىن مۇلتىكسىز ساقتاۋعا، ۇيلەردەن جانە ەۆاكۋاتسيالاۋ پۋنكتتەرىنەن ءتيىستى رۇقساتسىز كەتپەۋگە شاقىرادى»، - دەدى ول.

اۆتور

ەسىمجان ناقتىباي