تاسقىننان جاپا شەككەن 6 وڭىردە قانشا ءۇي سالىنىپ، نەشە مەكتەپ جوندەلدى

استانا. KAZINFORM - ۆيتسە-پرەمەر تۇرعىن ءۇي قورىن، الەۋمەتتىك نىسانداردى، جول جانە ينجەنەرلىك ينفراقۇرىلىمدى، ەلەكتر ەنەرگەتيكا، بايلانىس، شاعىن جانە ورتا بيزنەس نىساندارىن قالپىنا كەلتىرۋ ماسەلەلەرى بويىنشا كەڭەس وتكىزدى.

Қанат Бозимбаев
Фото: ҚР Ҳукумати

كەڭەسكە بەيىندى مينيسترلىكتەردىڭ وكىلدەرى، اقمولا، اقتوبە، اتىراۋ، باتىس قازاقستان جانە سولتۇستىك قازاقستان وبلىستارىنىڭ اكىمدەرى قاتىستى.

اقمولا وبلىسىندا بۇگىنگى تاڭدا 273 تۇرعىن ءۇي قۇرىلىسى ءجۇرىپ جاتىر. اتباسار قالاسىندا كوپپاتەرلى ۇيلەر سالىنۋدا، وندا قازان ايىندا 165 وتباسى قونىستانۋدى جوسپارلاپ وتىر.

بۇدان بولەك، سۋ تاسقىنىنان زارداپ شەككەن ءۇش اۋداندا 108 جەكە ءۇي سالىنىپ جاتىر. 143 وتباسى ءۇشىن تۇرعىن ءۇي ساتىپ الىندى. رەسىمدەۋ ساتىسىندا تاعى 45 پاتەر بار. وبلىستا ەكى مەكتەپ پەن بالاباقشا قالپىنا كەلتىرىلۋدە.

اقتوبە وبلىسىندا بارلىق زارداپ شەككەن ۇيلەرگە باعالاۋ جۇرگىزىلدى، 1840 ءۇي بويىنشا زالال وتەلدى. 250 ءۇي ساتىپ الىندى، تاعى 88- ءى ءبىر اپتا ىشىندە ساتىپ الىنادى. وڭىردە 22 الەۋمەتتىك نىساندى قالپىنا كەلتىرۋ قاجەت.

ەكى مەكتەپ پەن ءۇش بالاباقشا قۇرىلىسى جۇرگىزىلۋدە. جول ينفراقۇرىلىمى مەن كوپىرلەر قالپىنا كەلتىرىلۋدە. الداعى ۋاقىتتا 76 شوب سۋبەكتىسىنە كومەك كورسەتۋ قاجەت.

اتىراۋ وبلىسىندا زارداپ شەككەن 2663 ءۇيدىڭ 2599-ى بويىنشا زالالدى وتەۋگە شارتتار جاسالعان. 69 شوب سۋبەكتىسىنە كومەك كورسەتىلدى.

زارداپ شەككەن مالعا كەلتىرىلگەن زالال تولىعىمەن وتەلدى. ينجەنەرلىك ينفراقۇرىلىم بويىنشا پروبلەمالار جويىلدى، جولدار جوندەلۋدە، ءۇش مەكتەپ قالپىنا كەلتىرىلۋدە، تاعى ءبىر مەكتەپ قايتا سالىنادى.

باتىس قازاقستان وبلىسىندا 13 الەۋمەتتىك نىسان جوندەلۋدە. جولدار مەن كوپىرلەر قالپىنا كەلتىرىلۋدە. 570 ساياجاي ءۇيىن زەرتتەۋ جالعاسۋدا.

قوستاناي وبلىسىندا بارلىعى 468 ءۇي جوندەۋگە جاتپايدى. 153 جاڭا ءۇي سالىنۋدا، قالعان زارداپ شەككەندەرگە ءبىر اپتا ىشىندە تۇرعىن ءۇي ساتىپ الىنادى.

ارقالىق قالاسىندا 50 پاتەرلى ءۇي سالىنۋدا. وسىلايشا، تۇرعىن ءۇي قورى بويىنشا بارلىق جۇمىستار 1 -قىركۇيەككە دەيىن اياقتالادى. ينجەنەرلىك جانە جول ينفراقۇرىلىمى جوندەلۋدە، اينالما بوگەت سالىنۋدا.

سولتۇستىك قازاقستان وبلىسىندا سۋ تاسقىنىنان 165 ش و ب سۋبەكتىسى زارداپ شەكتى، زالالدى وتەۋگە وتىنىمدەر قابىلدانۋدا. 620 ءۇيدىڭ قۇرىلىسى باستالدى.

100 ءۇي بەرىلىپ، 391 وتباسىعا پاتەر ساتىپ الىپ بەرگەن. پەتروپاۆلداعى جولدار مەن سورعى ستانسيانىڭ جوندەۋى باستالدى.

ەسەپتەردى تىڭداپ، قانات بوزىمبايەۆ سۋ تاسقىنى سالدارىن جويۋ قارقىنىن باسەڭدەتپەۋدى تاپسىردى.

اقتوبە، اتىراۋ جانە باتىس قازاقستان وبلىستارىنىڭ اكىمدەرىنە ۆيتسە-پرەمەر زارداپ شەككەندەرگە تۇرعىن ءۇي تاپسىرۋ مەرزىمىن بۇزباۋ جونىندە ەسكە سالدى.

مەكتەپتەر مەن بالاباقشالاردى وقۋ جىلىنىڭ باسىندا پايدالانۋعا بەرۋ دە ەرەكشە باقىلاۋدا.

اكىمدىكتەر قالپىنا كەلتىرۋ قارقىنى بويىنشا ەسەپتەردى كۇندەلىكتى نەگىزدە تاپسىرۋى ءتيىس.

اۆتور

جانات قاپالبايەۆا

سوڭعى جاڭالىقتار