تاسقىن سۋ اتىراۋ ماڭىنداعى سوكولوك كانالىنىڭ بوگەتىن بۇزىپ كەتتى
اتىراۋ. KAZINFORM - تاسقىن سۋ اتىراۋ قالاسىنىڭ ماڭىنداعى سوكولوك كانالىنىڭ بوگەتىن جارىپ كەتتى.
بۇل تۋرالى الەۋمەتتىك جەلى مەن TikTok ،WhatsApp مەسسەندجەرىندە ۆيدەو جۇكتەلدى. ۆيدەودا كانالدان سۋ اعىپ جاتقانى تۇسىرىلگەن.
اتىراۋ وبلىسىنىڭ جەدەل شتابىنان ءمالىم ەتكەندەي، بۇگىن سۋدىڭ كوپتىگى مەن قاتتى جەلدىڭ سالدارىنان سوكولوك كانالى بويىنداعى بوگەت بۇزىلعان.
«سوكولوك كانالى - جايىق وزەنى ارقىلى اتىراۋ قالاسىنا قاراي اعىپ كەلەتىن مول سۋدى رەتتەۋدىڭ نەگىزگى تارماعى. قالانى تاسقىن سۋدان قورعاۋ ءۇشىن كانال بويىنداعى العاشقى بوگەتكە ەكىنشى قورعانىس نىسانى سالىنعان. ەكىنشى قورعانىس بوگەتىنىڭ بەرىكتىگىن قامتاماسىز ەتۋ ماقساتىندا توپىراق تولتىرىلعان قاپپەن نىعايتۋ جۇمىسى جۇرگىزىلدى. بوگەتتىڭ بيىكتىگى بالتىق جۇيەسىنىڭ دەڭگەيىنە سايكەس ۇلعايتىلدى. بۇل ۋچاسكەدە تاۋلىك بويى كەزەكشىلىك ۇيىمداستىرىلىپ وتىر. قازىر كانالداعى بۇزىلعان بوگەتتى قالپىنا كەلتىرۋ ءۇشىن قوسىمشا تەحنيكالار جىبەرىلدى»، - دەپ حابارلادى وبلىستىق جەدەل شتابتان.
ەسكە سالا كەتەلىك، بۇدان بۇرىن جايىق وزەنىندەگى مول سۋ سوكولوك كانالىمەن كاسپي تەڭىزىنە قۇيىلاتىنىن جازعان ەدىك.
اۆتور
جولداسبەك شوپەعۇل
