تاسقىن بۇلدىرگەن قورا-قوپسىنى دەمەۋشىلەر ارقىلى قالپىنا كەلتىرۋگە بولادى
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ تاسقىننان زارداپ شەككەن شارۋالاردىڭ قورا-قوپسىسىن قالپىنا كەلتىرۋ ماسەلەسى قالاي شەشىلەتىنىن ايتتى.
«وتكەن ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپايەۆ تاسقىن بۇلدىرگەن قور-قوپسىنى قالپىنا كەلتىرۋگە مەملەكەت قارجى بەرمەيتىنىن ايتتى. بۇل ۇستانىممەن سىزە كەلىسەسىز بە؟» - دەپ سۇرادى جۋرناليست ۇكىمەت وتىرىسىنان كەيىن وتكەن بريفينگىدە.
مينيستر قازىر ءبىرىنشى كەزەكتە مال باسىن قالپىنا كەلتىرۋ شارۋاسى تۇرعانىن ايتتى.
«سۋ تاسقىنىنان زارداپ شەككەن شارۋاشىلىقتارى مەن جەكە ءۇي شارۋاشىلىقتارىنىڭ مال سانى تۋرالى دەرەكتەر بار. ال ءسىز بۇگىن قورا جاعىن ايتىپ وتىرسىز. بىزگە ونداي قۇجاتتار تۇسكەن جوق. ال تۇسەتىن بولسا، قاراستىرامىز»، - دەدى مينيستر.
ايداربەك ساپاروۆ «قاراستىرۋ» دەگەن ءسوز قورا-قوپسىنى قالپىنا كەلتىرۋگە قارجى بولۋگە دايىنبىز دەگەن ءسوز ەمەس ەكەنىن ايتا كەتتى.
«ول ءۇشىن بىزگە قۇجات ءتۇسۋ كەرەك. ونىڭ ءبارىن قازىر قۇرىلىس كوميتەتى شەشەدى»، - دەدى ۆەدومستۆو باسشىسى.
مينيستر ونەركاسىپ جانە قۇرىلىس مينيسترلىگىنىڭ ۇستانىمى تۋرالى ناقتى جاۋاپ بەرە المايتىنىن ايتتى.
«بۇل جەردە قاراستىرۋ كەرەك. بۇگىن «كەلىسەمىن» نەمەسە «كەلىسپەيمىن» دەپ تۋرا جاۋاپ بەرە المايمىن. قاي جەردە، قانداي قورا، قاعاز-قۇجاتتارى بار ما؟ سونىڭ ءبارىن دايىنداۋ كەرەك. قۇجات بار قورا دەپ وتىرعانىم رەسمي تىركەلگەن، جەرىنىڭ قۇجاتتارى، قولدانىسقا بەرۋ اكتىسى بار قورانى ايتىپ وتىرمىن. سونداي قورا بولسا، وعان بولۋگە بولادى. ءوتىنىش بەرە الادى، كوميسسيا قارايدى. ال قۇجاتى جوق ادامداردى قاراستىرۋ كەرەك. مۇنى اكىمدىكتەرمەن بىرگە ارنايى قور ارقىلى ما، دەمەۋشىلەر ارقىلى ما، جابۋعا مۇمكىندىكتەر بولاتىن شىعار»، - دەدى اۋىل شارۋاشىلىعى ءمينيسترى.
اۆتور
ەسىمجان ناقتىباي
