تارازدا ەسىرتكى كۋرەرى مەفەدرونمەن ۇستالدى

تاراز. KAZINFORM - «توسقاۋىل» جەدەل-پروفيلاكتيكالىق ءىس-شاراسى اياسىندا جامبىل وبلىسى پ د ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەفەدرون جەتكىزۋ ارناسىنىڭ جولىن كەسۋ بويىنشا ارنايى وپەراتسيا جۇرگىزدى.

ءى ءى م باسپا ءسوز قىزمەتىنىڭ مالىمەتىنشە، ەسىرتكى زاتتارىن اسا ءىرى مولشەردە ساقتادى دەگەن كۇدىكپەن الماتى وبلىسىنىڭ 26 جاستاعى تۇرعىنى ۇستالدى. ءتىنتۋ كەزىندە ەر ادامنان ىشىندە ەرەكشە ءيىستى ۇساق كريستالدى ۇنتاق زات بار، يزولەنتامەن ورالعان 35 ورام تاركىلەندى. سونداي-اق ونىڭ جالعا العان پاتەرىنەن مەرري قىزمەتتىك ءيتىنىڭ كومەگىمەن 430 ورالعان پاكەت تابىلدى.

سوت-حيميالىق ساراپتاماسىنىڭ قورىتىندىسىنا سايكەس تاركىلەنگەن زاتتار جالپى سالماعى 978 گرام بولاتىن مەفەدرون پسيحوتروپتىق زاتى بولىپ شىقتى. ياعني پوليتسەيلەر كەم دەگەندە 3260 دوزانى قۇرايتىن ەسىرتكىنىڭ تارالۋىنا جول بەرمەدى. ونىڭ قارا نارىقتاعى قۇنى شامامەن 36 ميلليون تەڭگە تۇرادى.

جاۋاپ الۋ كەزىندە كۇدىكتى زاڭسىز بيزنەسكە قاتىسى بار ەكەنىن مويىنداپ، مەسسەندجەر ارقىلى ەسىرتكى ساتاتىن كۋرەر بولىپ جۇمىسقا ورنالاسقانىن ايتتى. ول الماتىدان ەسىرتكى پارتياسىن الىپ، تارازداعى جالدامالى پاتەردە ولاردى بۋىپ-ءتۇيىپ، جاسىرىن ورىندارعا قويىپ شىققان.

«كۇدىكتى ءوز قىزمەتىن ينتەرنەت-دۇكەندەردىڭ كومەگىمەن جۇزەگە اسىرعان. وندا ۇيلەستىرۋشىنىڭ نۇسقاۋى بويىنشا الماتى، تاراز، شىمكەنت، قوستاناي قالالارىندا تاراتۋ ءۇشىن «تاۋار» الىپ وتىرعان جانە تارازدا بىرنەشە ورىنعا مەفەدرون قويىپ ۇلگەرگەن. ونىڭ ەسىرتكى ساتاتىن ينتەرنەت-دۇكەن اكىمشىسىمەن حات الماسۋىن جانە جاسىرىن ورىنداردىڭ كوورديناتتارىن كورسەتكەن فوتوسۋرەتتەردى تەكسەرگەننەن كەيىن قىزمەتكەرلەر مەفەدروننىڭ تاعى 7 ورامىن تاپتى. قازىرگى ۋاقىتتا پوليتسيا قىلمىستىق تىزبەكتىڭ قالعان قاتىسۋشىلارىن انىقتاپ جاتىر»، - دەدى جامبىل وبلىسى پوليتسيا دەپارتامەنتى باستىعىنىڭ ورىنباسارى نۇرجان راحمەتۋللايەۆ.