تارازدا 17 ميلليون تەڭگەنىڭ التىن بۇيىمىن ۇرلاعان ەكى ادام ۇستالدى
استانا. KAZINFORM - تارازدا پاتەرگە زاڭسىز كىرىپ، 17 ميلليون تەڭگەدەن استام اقشا مەن باعالى بۇيىمداردى ۇرلاعان ەكى كۇدىكتى ۇستالدى.
پوليتسيانىڭ «102» نومىرىنە تاراز تۇرعىنى حابارلاسىپ، پاتەرىنەن 30 دان استام التىن بۇيىم، گاۋھار تاستار جانە 830 مىڭ تەڭگە قولدى بولعانىن ايتقان.
كۇدىكتىلەر ۇيدە ەشكىم جوق كەزدە ەسىك قۇلپىن بۇزىپ، پاتەرگە كىرگەن. ۇرلانعان اقشانىڭ اراسىندا قىرعىز سومى، ەۋرو جانە قىتاي يۋانى بولعان.
جالپى شىعىن كولەمى 17 ميلليون تەڭگەدەن اسقان.
جەدەل-ىزدەستىرۋ شارالارى بارىسىندا پوليتسيا ەكى ەر ادامدى انىقتاپ، ۇستادى. ولاردىڭ ءبىرى تۇركىستان وبلىسىنىڭ تۇرعىنى بولىپ شىقتى. ءتىنتۋ كەزىندە ەكەۋىنەن دە قىلمىسقا قاتىسى بار زاتتاي دالەلدەر تابىلعان. كۇدىكتىلەر ۇرلانعان بۇيىمداردىڭ ءبىر بولىگىن ساتىپ ۇلگەرگەن.
قازىر اسا ءىرى مولشەردە ۇرلىق جاساۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر.
