«تاقتار ويىنىنىڭ» جۇلدىزى قازاقستان تۋرالى اسەرىمەن ءبولىستى
استانا. قازاقپارات - Comic Con Astana 2026 فەستيۆالىنىڭ قوناعى، دانيالىق اكتەر نيكولاي كوستەر- ۆالداۋ قازاقستانعا العاشقى ساپارى جايلى اڭگىمەلەدى.
«تاقتار ويىنى» سەريالىنداعى دجەيمە لاننيستەر رولىمەن تانىلعان اكتەر قازاقستاننىڭ كەڭدىگىنە، ۇلتتىق تاعامدارىنا جانە ەلوردانىڭ كورىكتى ورىندارىنا ءتانتى بولعانىن ايتتى.
- قازاقستانعا العاش رەت كەلىپ وتىرمىن. مۇنداعىنىڭ ءبارى قاتتى ۇنادى. ەلدەرىڭىز كەڭ-بايتاق ەكەن. اسىرەسە ۇلتتىق تاعامدارىڭىز ۇنادى. سونىڭ ىشىندە ەتتىڭ ءدامى ەرەكشە ەكەن. ءتىپتى وسى ءبىر كۇننىڭ وزىندە سوڭعى ءۇش جىلدا جەگەنىمنەن دە كوپ ەت جەپ قويعان شىعارمىن، - دەپ كۇلدى اكتەر.
سونداي-اق اكتەر بايتەرەك مونۋمەنتىنە كوتەرىلىپ، ءداستۇر بويىنشا الاقانىن قويعانىن جەتكىزدى.
- بايتەرەكتىڭ توبەسىنە كوتەرىلىپ، الاقانىمدى قويدىم. سول جەردە تىلەك تە تىلەدىم. ءبىراق قانداي تىلەك تىلەگەنىمدى ايتپايمىن، ول - قۇپيا. ءبىر عانا نارسەنى ايتا الامىن: قازاقستانعا تاعى دا ورالعىم كەلەدى، - دەدى نيكولاي كوستەر-ۆالداۋ.
ەسكە سالايىق، بۇگىن ەلوردادا Comic Con Astana 2026 فەستيۆالى باستالدى.
