تاۋەلسىزدىك العالى 1 ميلليون 200 مىڭعا تارتا اعايىن ەلگە ورالدى
استانا. قازاقپارات - تاۋەلسىزدىك العالى 1 ميلليون 200 مىڭعا تارتا اعايىن ەلگە ورالدى. دەنى - ەڭبەككە جارامدى جاستاعى ازاماتتار. ياعني ەكونوميكالىق، الەۋمەتتىك، مادەني باعىتتا دامۋىمىزعا ۇلەس قوسىپ كەلەدى. مەملەكەت تە اعايىننىڭ ورتاعا سىڭۋىنە، ءوزىن جاتسىنباۋىنا بارىنشا جاعداي جاساپ كەلەدى.
تاۋەلسىزدىك العان بەتتە شەكارا اشىلىپ، سىرتتاعى اعايىن ەلگە لاپ قويدى. تۇرمىس تاۋقىمەتىنە قاراعان ەشكىم جوق. سول بەتتە ازىن-اۋلاق كومەك العانى الىپ، الماعانى تۋعان جەردى كورگەنىنە تاۋبە ەتىپ، ءسىڭىسىپ كەتتى. سودان بەرى ءىشىنارا بولماسا كوش توقتاعان جوق. تاۋەلسىزدىك العالى اتامەكەنگە 1,2 ميلليون ادام ورالعان. ەڭبەك جانە حالىقتى الەۋمەتتىك قورعاۋ مينيسترلىگى كەيىنگى جىلدارى كۆوتا الۋعا نيەتتى جاندار قاتارى ارتىپ جاتقانىن ايتادى. ال قانداس مارتەبەسى ىقتيارحات پەن ازاماتتىقتى تەزىرەك راسىمدەۋگە كومەكتەسەدى.
ءالجان ءشارىپوۆ، «وتانداستار قورى» ك ە ا ق باسپا ءسوز حاتشىسى:
- العاشقى تاۋەلسىزدىك جىلدارى وتباسىمەن وتە كوپ كەلدى. ياعني، بىلاي ايتقاندا، العاشقى 10 جىلدىقتا قانداستارىمىز وتە كوپ كوشىپ كەلدى. كەيىنگى جىلدارى ءالى دە كوشىپ كەلىپ جاتىر، ءبىراق كەيىنگى جىلدارى وڭىرلىك كۆوتالار ەنگىزىلە باستادى. ياعني، سولتۇستىك وڭىرلەرگە، شىعىس وڭىرلەرگە كوشىپ كەلۋ دەگەن سياقتى. ول كۆوتالار دا جىل سايىن يگەرىلەدى، ءبىراق سونىمەن قاتار كۆوتاسىز دا باسقا وڭىرلەرگە كوشىپ جاتقان قانداستارىمىز بار. الەۋمەتتىك قولداۋلار كوپ جاعدايدا سول وڭىرلىك كۆوتا ارقىلى جۇزەگە اسادى. جاڭاعى ايتىپ وتكەن سولتۇستىك وڭىرلەرگە، شىعىس وڭىرلەرىنە كوشىپ بارعان قانداستارىمىزعا، ياعني ءبىر رەتتىك تولەمدەر، ودان كەيىن جۇمىسقا ورنالاستىرۋ مىندەتتى، وسىنداي كومەكتەر كورسەتىلەدى.
ەلگە ورالعان ازاماتتاردىڭ جارتىسىنان كوبى ەڭبەككە قابىلەتتى. ماسەلەن، بيىل كەلگەن ەرەسەك قانداستاردىڭ 13 پايىزىنىڭ جوعارى ءبىلىمى بار. ولار جۇمىس كۇشى جەتىسپەيتىن ايماقتارعا كوشىرىلىپ جاتىر. كوشىپ كەلگەندەرمەن بەس جىلعا الەۋمەتتىك كەلىسىمشارت جاسالادى.
ءيا، قانداستاردىڭ كوبى كورشىلەس ەلدەردەن كەلەدى. ءبىراق تەندەنسيا وزگەرىپ تۇرۋى مۇمكىن. كەي جىلدارى وزبەكستاننان كوشىپ كەلگەندەر كوپ بولسا، كەيدە قىتاي نەمەسە موڭعوليادان كەلەتىندەردىڭ ۇلەسى ارتادى.
ال ەسىمگۇل لي - وڭتۇستىك كورەيا تۇرعىنى. بۇل جاقتان 20 جىل بۇرىن كەتكەن. سول جاقتا وتباسىن قۇردى. قوس قىزىن ءوسىرىپ، جەتىلدىردى. ەندى ەلگە ورالۋ نيەتى بار. كەيىپكەرىمىز قازىر كورەيادا قازاقتار ايتارلىقتاي كوبەيگەنىن ايتادى. سول سەبەپتى باس كونسۋلدىق اشىلعان. ەسىمگۇلدىڭ ءوزى ەلگە ارنايى كەلىپ، «وتانداستار قورىنىڭ» تاجىريبەسىن پىسىقتاپ ءجۇر.
ەسىمگۇل لي، وڭتۇستىك كورەياداعى قانداس:
- ءبىز كەلىپ وتىرعان باعدارلاما «كيەلى قازاقستان» دەپ اتالادى. ول ەندى ءبىزدىڭ تاۋەلسىزدىك العانىمىزعا 35 جىلعا دا وراي جانە دە شەتەلدە جۇرگەن قازاقتاردىڭ ءوزىنىڭ تاريحىن ءبىلۋى ءۇشىن، تەرەڭ قانداي وزگەرىستەر بولۋ ءۇشىن بولىپ جاتقانىن تانۋ ءۇشىن جاساپ جاتقان جوبا. سوعان ەندى ءبىز كەلدىك، ارينە، قۋانىپ جاتىرمىز. جاڭا باسقا قاتىسۋشىلار، 12 مەملەكەتتەن 20 قاتىسۋشى كەلدى. بىرەۋى جىلاپ، بىرەۋى قۋانىپ، سونداي اسەر الىپ جاتىر، مەن دە سونداي جاعدايدامىن.
«كيەلى قازاقستان» سىندى باعدارلامالار قانداستارعا اتامەكەنىن كورۋ ءۇشىن ەمەس، ءبىرجولا كوشىپ كەلۋگە مۇمكىندىك بەرەدى. جىل سايىن قازاقستاننىڭ ءار ايماعىندا ۇيىمداستىرىلعان بىرەگەي جوبا بيىل شىمكەنت جانە تۇركىستان وبلىسىندا ءوتتى.
24.kz