تالدىقورعاندا «التىن ساقا» ەرتەگىسى العاش رەت 3D فورماتتا ساحنالاندى
تالدىقورعان. KAZINFORM - جاڭا فورماتتاعى ەرتەگى قويىلىمىنىڭ جارناماسى كوپشىلىكتىڭ قىزىعۋشىلىعىن تۋعىزدى.
ءبىر اپتا بۇرىن ەرتەگىنىڭ باس كەيىپكەرلەرى مىنگەن كابريولەت كولىگى قالانى ارالاپ، ەرتەگىنىڭ پرەمەراسىن حابارلاعان بولاتىن. سودان دا بولار، تەاتر زالىنا جينالعان كورەرمەننىڭ قاراسى قالىڭ.
قويىلىمدا رەجيسسەر دىبىستىق جانە ۆيزۋالدى ارنايى ەففەكتىلەردى قولدانعان. سونداي اق، جاڭا فورماتتاعى سپەكتاكل ءتۇرلى-ءتۇستى دەكوراتسياسىمەن، ەرەكشە كوز تارتارلىق كيىم ۇلگىسىمەن دە كىشكەنتاي كورەرمەندەردى ءتانتى ەتتى.
«بۇگىنگى بالالاردى بىردەڭەمەن تاڭعالدىرۋ قيىن. دەگەنمەن التىن ساقانى فەنتەزي جانرىندا 3D فورماتتا قويعان ءجون دەپ شەشتىك. اكتەرلىك شەبەرلىك ءوز الدىنا، سپەكتاكلدە زاماناۋي تەحنيكالىق مۇمكىندىكتەردى مولىنان پايدالاندىق. قويىلىمدى كورەرمەندەر جاقسى قابىلدادى»، - دەيدى رەجيسسەر مەرەي اجىبەكوۆ.
ايتا كەتەيىك، بۇل ەرتەگى ءدال وسى تەاتردا 1979 -جىلى قويىلعان ەدى. ول كەزدە كورەرمەنگە مۇحتار قامباروۆتىڭ رەجيسسەرلىعىمەن ۇسىنىلعان. ەندى 45 جىل وتكەندە جاڭا فورماتتا قايتا جاڭعىردى.
اۆتور
ديانا تۇرلىبەك
