«تالدىقورعان-ءۇشارال» گاز قۇبىرىنىڭ قۇرىلىسى كەستەدەن وزىپ كەلەدى
استانا. KAZINFORM - جەتىسۋ وبلىسىندا «تالدىقورعان-ءۇشارال» ماگيسترالدى گاز قۇبىرىن سالۋ جوسپارلى تۇردە جالعاسىپ كەلەدى. بۇل جۇمىستى «QazaqGaz» ۇلتتىق كومپانياسى اتقارىپ جاتىر.
اۋقىمدى جوبا مەملەكەت باسشىسىنىڭ تاپسىرماسىمەن ۇكىمەتتىڭ 2024 -جىلعى ەكونوميكالىق ءوسىمدى قامتاماسىز ەتۋ جونىندەگى ءىس-شارالار جوسپارىنا ەنگەن.
تالدىقورعاننان ءۇشارالعا دەيىنگى 300 شاقىرىمنىڭ 100 كيلومەترىنە گاز قۇبىرى تارتىلدى. اۋقىمدى جوبا قۇرىلىسىمەن وبلىس اكىمىنىڭ ورىنباسارى اسەت قاناعاتوۆ پەن «ينتەرگاز ورتالىق ازيا» ا ق باس ديرەكتورى ماناس تاسىبايەۆ تانىستى. ەكى اۋىسىممەن قارقىندى تۇردە جۇرگىزىلىپ جاتقان جۇمىسقا 130 ادام مەن 90 ارنايى تەحنيكا تارتىلعان.
مەدەلحان مىرزاحانوۆ، «ينتەرگاز ورتالىق ازيا» ا ق «الماتى» فيليالىنىڭ باس ينجەنەرى:
- كۇردەلى تەحنيكالار بارلىعى قامتاماسىز ەتىلگەن. الدىمىزدا اگرس گاز تاراتۋ ستانسىلارى زاكاز بەرىلگەن. ۋاقىتىلى ولاردىڭ پوستاۆكاسىن كەلەسى جىلدىڭ مامىر ايىندا كۇتىپ وتىرمىز. وسى قارقىندا جۇمىستار جۇرە بەرەتىن بولسا، كەلەسى جىلدىڭ جەلتوقسان ايىنا دەيىن ءبىتىرۋدى جوسپارلاپ وتىرمىز. بۇل بەلگىلەنگەن مەرزىمنەن ەرتە بىتىرۋگە مۇمكىندىك بەرەدى.
«تالدىقورعان- ءۇشارال» ماگيسترالدى گاز قۇبىرىنىڭ قۇرىلىسى ۇكىمەت باسشىسى ولجاس بەكتەنوۆتىڭ تامىز ايىنداعى ءىسساپارىندا باستالعان. اۋقىمدى جوبا ايماقتى گازداندىرۋدىڭ ەكىنشى كەزەڭى بوپ سانالادى. العاشقىسى الداعى جىلى اياقتالۋى كەرەك.
اسەت قاناعاتوۆ، وبلىس اكىمىنىڭ ورىنباسارى:
- 2025 -جىلدىڭ سوڭىنا دەيىن 126 ەلدى مەكەندى گازداندىرۋىمىز كەرەك. قازىر 50 اۋىلعا تابيعي گاز تارتىلعان. بيىل تاعى 13 اۋىلدى كوگىلدىر وتىنعا قوسامىز. ايماقتى گازداندىرۋدىڭ العاشقى كەزەڭىندە 400 مىڭ ادام تابيعي گازعا قول جەتكىزەدى. «تالدىقورعان-ءۇشارال» گاز قۇبىرىنىڭ قۇرىلىسى اياقتالعاندا اقسۋ، سارقان، الاكول اۋداندارىنا كوگىلدىر وتىن جەتكىزىلەدى. وسىلايشا، 124 مىڭ ادام وركەنيەت يگىلىگىن پايدالانۋ مۇمكىندىگىنە يە بولادى.
24.kz
