تاشكەنتتە قازاقستاندىق م.اۋەزوۆ اتىنداعى ۋنيۆەرسيتەتتىڭ فيليالى اشىلادى

تاشكەنت وبلىسى شىرشىق قالاسىندا م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ كوممەرتسيالىق ەمەس اكسيونەرلىك قوعامىنىڭ فيليالى اشىلادى، دەپ حابارلايدى Kazinform UzA اگەنتتىگىنە سىلتەمە جاساپ.

وسىعان بايلانىستى مينيسترلەر كابينەتىنىڭ ءتيىستى قاۋلىسىنىڭ جوباسى جاريالاندى.

وعان سايكەس، فيليال قىزمەتىنىڭ نەگىزگى باعىتتارى ەكونوميكا سالالارى ءۇشىن جوعارى بىلىكتى مامانداردى دايارلاۋ، ءبىلىم، عىلىم جانە ءوندىرىستىڭ ۇزدىكسىزدىگى مەن جۇيەلىلىگى، سونداي- اق الەمنىڭ بەدەلدى ءبىلىم جانە عىلىم ورتالىقتارىمەن ينتەگراتسيالانۋ قاعيداتتارى نەگىزىندە ماماندار مەن عىلىمي كادرلاردى دايارلاۋ جانە قايتا دايارلاۋ جۇيەسىن جاڭعىرتۋ جوسپارلانعان.

ۋنيۆەرسيتەت فيليالى كادرلارعا دەگەن قاجەتتىلىكتى، ونىڭ ىشىندە عىلىمي- پەداگوگيكالىق كادرلاردى دايارلاۋدى ەسكەرە وتىرىپ، باكالاۆريات ءبىلىم بەرۋ باعىتتارى مەن ماگيستراتۋرا ماماندىقتارى بويىنشا بارلىق دەڭگەيدەگى مامانداردى دايارلاۋدى، قايتا دايارلاۋدى جانە ولاردىڭ بىلىكتىلىگىن ارتتىرۋدى جۇزەگە اسىرادى.

شەشىم جوباسىندا ۋنيۆەرسيتەت زاڭدى تۇلعا مارتەبەسى بار قۇرىلىمدىق بولىمشە بولىپ تابىلادى، ابيتۋريەنتتەردى قابىلداۋ جانە فيليال تۇلەكتەرىن اتتەستاتتاۋدان وتكىزۋ بەلگىلەنگەن تالاپتارعا، تارتىپتەرگە جانە مەرزىمدەرگە سايكەس جۇزەگە اسىرىلادى جانە ۋنيۆەرسيتەتتىڭ ديپلومى وزبەكستان مەن قازاقستاندا جوعارى ءبىلىم تۋرالى قۇجات رەتىندە تانىلۋى كوزدەلگەن.

اۆتور

ءلاززات سەيدانوۆا