تاعى ءبىراز سۇراق قويار ەدىم، اياعىمنان تارتادى

استانا. قازاقپارات - شىڭعىسحان بۇكىل ەۆرازيا قۇرلىعىن جاۋلاپ العاننان كەيىن، جۇزدەگەن حاندىقتاردىڭ جاعدايىن ءبىلۋ ءۇشىن، قاراقورىمنان ارنايى دەلەگاسيا جىبەرىپ تەكسەرىپ تۇرادى ەكەن.

ول كەزدە حان تەك حان تۇقىمىنان بولۋى شارت ەكەن. ءبىر حاندىقتىڭ حانى ءولىپ قالىپ، ونىڭ ورنىنا اقىل-ەسى كەمىستەۋ ۇلىن حان سايلاپ جىبەرىپتى.

ءبىر كۇنى سول حانعا دا حابار كەلەدى. سول كەزدە كەڭەسشىلەرى حانعا بىلاي دەيدى: - پروتوكول بويىنشا، كەلگەن قوناقتارعا ءۇش سۇراق قوياسىز، ەگەر لاعىپ كەتىپ بارا جاتساڭىز... اياعىڭىزعا ءجىپ بايلاپ قويامىز، تاقتىڭ استىندا وتىرعان بالا ءجىپتى تارتىپ قالعاندا قابىلداۋدى توقتاتاسىز، - دەپ، ۇيرەتىپ قويادى.

دەلەگاسيانى ۋازىرلەرى قابىلداپ، حانعا الىپ كەلەدى. حان: - ەلدەرىڭىزدە جاڭبىر كوپ پە؟ - دەپ، سۇراق قويادى. كەلگەن قوناقتار ونى جاقسىلققا جورىپ: - ءيا، - دەپ، جاۋاپ قاتادى. ەكىنشى سۇراقتى: - ەلدەرىڭىزدە تىشقان كوپ پە؟، - دەپ، قويادى. كەلگەن دەلەگاسيا مۇشەلەرى ءبىر -بىرىنە قاراپ: - ءيا، تىشقان بار ەدى...! - دەيدى.

وسى كەزدە تاقتىڭ استىندا وتىرعان بالا اياعىنا بايلاۋلى جىپتەن تارتىپ قالادى. سول كەزدە حان: - تاعى ءبىراز سۇراق قويار ەدىم، اياعىمنان تارتادى، - دەيدى. ساحاداي ساي تۇرعان حاننىڭ ۋازىرلەرى: - وسىمەن قابىلداۋ ءبىتتى، - دەپ قوناقتاردى قوناق ۇيگە الىپ كەتەدى.

قاراقورىمعا كەلگەننەن سوڭ، دەلەگاسيا باسشىسى بولعان جاعدايدى ۇلى حانعا باياندايدى. ءبىرىنشى سۇراعى جاڭبىرعا بايلانىستى بولعاندىقتان، جاقسىلىققا جوريدى. ەكىنشى سۇراعى تىشقانعا بايلانىستى بولعاندىقتان، ەلىمىزدە تىڭشىلار بار ما ەكەن، - دەگەن جورامال جاسايدى. ءۇشىنشى سۇراعىنا ەلدەگى بۇكىل اقىلماندار مەن فيلوسوفتار جينالىپ جاۋاپ بەرە الماپتى... تاعى بىردەمە جازايىن دەسەم، اياعىمنان تارتادى، دوستار!!!

P.S.

ەل باسقارۋ مۇراگەرلىك جولمەن بەرىلسە، وسىنداي وقيعا ورىن الۋى ابدەن مۇمكىن، دەگەن ويمەن جازىلعان ءاپسانا ەدى،- دەدى كونە كوز قاريا.

سوبەتقازى نۇرسيلا