سىيلىققا پاتەر الىپ، جالعان جوبالارعا رۇقسات بەرگەن: باسقارما باسشىسىنا قانداي ايىپ تاعىلدى
الماتى. KAZINFORM - الماتى سوتىندا قالالىق جوسپارلاۋ جانە ۋربانيستيكا باسقارماسىنىڭ بۇرىنعى باسشىسىنا قاتىستى الدىن الا تىڭداۋ باستالدى. قىلمىستىق ءىس الماتىنىڭ قىلمىستىق ىستەر جونىندەگى مامانداندىرىلعان سوتىندا قارالىپ جاتىر.
سوت الدىندا 6 ايىپتالۋشى جاۋاپ بەرەدى. ولاردىڭ قاتارىندا الماسحان احمەدجانوۆتان باسقا بۇرىن قالانىڭ جەر قاتىناستارى باسقارماسىنىڭ باسشىسى بولعان ارداق سامامبەتوۆ تە بار.
ديناستيا تۇرعىن ءۇي كەشەنى
تەرگەۋ احمەدجانوۆ 2020-2023 -جىلدارى قۇزىرەتىنە ساۋلەت-جوسپارلاۋ تاپسىرمالارىن بەرۋ جانە ەسكيزدىك جوبالاردى ماقۇلداۋ قىزمەتتەرى كىرەتىن لاۋازىمدى اتقارعان تۇستا ءوزىنىڭ جانە وزگە ۇيىمدار مەن تۇلعالاردىڭ پايداسى ءۇشىن، اتاپ ايتقاندا، م. ابديبايەۆا جانە «MDi-Max Group» ج ش س- نا «ەرمەنساي» ىقشام اۋدانى، 4-مەكەنجايى بويىنشا (ج ك ديناستيا) نىسانالى ماقساتىن وزگەرتپەي ءارى كاداسترلىق قۇنىن تولەمەي قۇرىلىس باستاۋعا رۇقسات قاعازدارىن بەرگەنىن انىقتادى.
- ايتىلعان ءىس-ارەكەتتەردىڭ كەسىرىنەن مەردىگەر قۇنى 152 ميلليون تەڭگە بولاتىن كاداسترلىق تولەمدى تولەگەن جوق، - دەدى پروكۋرور.
Regis Hills كوتتەدج قالاشاعى
سول ۋاقىتتا احمەدجانوۆ «ەرمەنساي» ىقشام اۋدانى، 3- مەكەنجايىندا Regis Hills كوتتەدج قالاشاعىنىڭ قۇرىلىسىن باستاۋ ءۇشىن «BI Almaty Project» ج ش س- ىنا (جاڭا اتاۋى «BIDevelopment Almaty») نىسانالى ماقساتىن وزگەرتپەي ءارى كاداسترلىق قۇنىن تولەمەي رۇقسات قاعازدارىن بەردى. كوتتەدج قالاشاعىنىڭ جوسپارىنا 11 تاۋنحاۋس، 3 كوتتەدج، 2 ۆيللا جانە 1 قوناق ءۇي كىرگەن. اتالعان ءىس-ارەكەتتەردىڭ كەسىرىنەن مەردىگەر كومپانيا 111 ميلليون تەڭگە كاداسترلىق تولەم تولەمەگەن.
«River park» تۇرعىن ءۇي كەشەنى
سونداي-اق، كوپتەگەن زاڭبۇزۋشىلىقتاردى بىلە تۇرا احمەدجانوۆ ءوزىنىڭ قىزمەتىن پايدالانىپ، قالادا 5 كوپقاباتتى تۇرعىن ءۇي كەشەنىن سالۋعا رۇقسات بەرگەن. ال مەردىگەر كومپانيالاردان ءوز پايداسى ءۇشىن زاڭسىز سالىنىپ جاتقان تۇرعىن ۇيلەردەن پاتەر تالاپ ەتكەن. وسىلايشا قولدانىسقا بەرىلگەن 3 تۇرعىن ءۇيدىڭ ءارقايسىسىنان ونىڭ تۋىستارىنا ءبىر-ءبىر پاتەردەن بەرىلگەن. ولاردىڭ ءبىرى - مەدەۋ اۋدانىندا تيان-شانسكايا كوشەسى، 9 گ مەكەنجايىندا «كورپوراتسيا ارت مەديا» ج ش س- ى قۇرىلىس جۇرگىزگەن «River park» تۇرعىن ءۇي كەشەنى.
- 2019 -جىلى احمەدجانوۆ «كورپوراتسيا ارت مەديا» ج ش س قۇرىلىسشىسىنا تيان-شانسكايا كوشەسى، 9 گ بويىنداعى تۇرعىن ءۇي كەشەنىنىڭ قۇرىلىسىنا ارحيتەكتۋرالىق-جوسپارلاۋ تاپسىرماسىن بەردى. سول جىلى قۇرىلىس نورمالارىنىڭ بۇزىلۋى مەن ەسكيزدىك جوبانىڭ ءىس جۇزىندە سايكەس كەلمەۋىن بىلە تۇرا قۇرىلىسشىعا «River Park» ت ك قۇرىلىسىنا ارنالعان ەسكيزدىك جوبانى نەگىزسىز ماقۇلدايدى. سونىمەن قاتار ول باس مەردىگەردەن ءوزىنىڭ كۇيەۋ بالاسى ي. ءۇشىن سالىنىپ جاتقان تۇرعىن ءۇي كەشەنىندەگى پاتەرگە ايتارلىقتاي جەڭىلدىك تالاپ ەتتى. وسىلايشا مەملەكەتتىك بيلىكتىڭ بەدەلىنە نۇقسان كەلتىردى، - دەدى مەملەكەتتىك ايىپتاۋشى.
تەرگەۋ دەرەكتەرى بويىنشا، «كورپوراتسيا ارت مەديا» ج ش س مەن ي. اراسىندا 9,6 ميلليون تەڭگەگە «River Park» ت ك- دەگى ءۇش بولمەلى پاتەردى (70,5 شارشى مەتر) ساتىپ الۋ- ساتۋدىڭ الدىن الا شارتى جاسالعان. 2023 -جىلى مۇنداي پاتەر 31,5 ميلليون تەڭگەگە باعالانعان.
«Elite life»تۇرعىن ءۇي كەشەنى
2021 -جىلى احمەدجانوۆ قاجىمۇقان كوشەسى بويىندا «Elite life» تۇرعىن ءۇي كەشەنىنىڭ قۇرىلىسىن باستاۋعا «اتريۋم پليۋس» ج ش س- نىڭ ساۋلەت-جوسپارلاۋ تاپسىرماسىنا كەلىسىم بەردى. تەرگەۋ مالىمەتىنە سايكەس، ايىپتالۋشى وبەكتىنىڭ قۇرىلىسى «قىزىل جولاقتا» ورنالاسقان جەر ۋچاسكەسىندە سالۋ جوسپارلانعانىن، سونداي-اق عيمارات بيىكتىگى مەن وزگە دە نورمالارىنىڭ بۇزىلعانىن بىلگەن.
- بۇل رەتتە احمەدجانوۆ قۇرىلىس كومپانياسى باسشىلارىنىڭ ءبىرى چ. -مەن كەزدەسكەندە ءوزىنىڭ قىزمەتتىك جاعدايىنىڭ ماڭىزدىلىعىن ءتۇسىنىپ، ودان سالىنىپ جاتقان تۇرعىن ۇيدەگى پاتەرگە ايتارلىقتاي جەڭىلدىك تالاپ ەتتى، - دەدى پروكۋرور.
وسىدان كەيىن كومپانيانىڭ قۇرىلتايشىسى «Elite life»كەشەنىنەن احمەدجانوۆقا پاتەر سىيلايدى. تەرگەۋ مالىمەتتەرى بويىنشا، 2021 -جىلدىڭ 27 -مامىرىندا «اتريۋم پليۋس» ج ش س مەن احمەدجانوۆتىڭ اكەسى اراسىندا 38,2 ميلليون تەڭگەگە «Elite life»تۇرعىن ۇيىندە پاتەردى ساتىپ الۋ-ساتۋ شارتى جاسالعان. ءبىراق بۇل قاراجات ساتىپ الۋشى تاراپىنان تولەنبەگەن. سونداي-اق مەملەكەتتىك ايىپتاۋشى 2022 -جىلى احمەدجانوۆتىڭ اناسى جانە كۇيەۋ بالاسى 38 ميلليون جانە 25 ميلليونعا ەكى پاتەردىڭ ساتىپ الۋ-ساتۋ شارتىن «اتريۋم پليۋس» كومپانياسىمەن تەك قاعاز جۇزىندە جاساعانىن اتاپ ءوتتى.
جالعان ينۆەستيتسيالىق جوبالار
تەرگەۋ مالىمەتتەرى بويىنشا، الماسحان احمەدجانوۆ پەن ارداق سامامبەتوۆ 2020-2023 -جىلدارى وڭىرلىك ۇيلەستىرۋ كەڭەسىن اينالىپ ءوتىپ، جەكەلەگەن كاسىپكەرلەردىڭ مۇددەلەرىن قولداپ، ولارعا مەملەكەتتىك قوردان جەر ۋچاسكەسىن زاڭسىز يەمدەنۋگە جاردەم كورسەتتى. جەر ۋچاسكەلەرىنە ساۋدا-ساتتىق راسىمدەرى جاسالماي، كاداسترلىق قۇنى بويىنشا ساتىلعان.
- كاسىپكەرلەر وزدەرىن قىزىقتىراتىن ۋچاسكەلەردى تاڭداپ، 2020 -جىلى ءوز باقىلاۋىنداعى «ابز اقتاس» ج ش س، «T Super Service» ج ش س، «ТМТ Invest» ج ش س كومپانيالاردىڭ اتىنان الماتى اكىمدىگىنە وزدەرى ويلاپ تاپقان ينۆەستيتسيالىق جوبالاردىڭ (حالىققا قىزمەت كورسەتۋ وبەكتىلەرى، مەديتسينالىق ورتالىق، ساۋىقتىرۋ ورتالىقتارى) قۇرىلىسىنا اتالعان جەر ۋچاسكەلەرىن ءبولۋ تۋرالى حات جولدادى. احمەدجانوۆ ولاردىڭ ينۆەستيتسيالىق جوباعا جاتپايتىنىن بىلە تۇرا وڭىرلىك ۇيلەستىرۋ كەڭەسىمەن اقىلداسپاي، قالالىق جوسپارلاۋ جانە ۋربانيستيكا باسقارماسىنىڭ اتىنان ولارعا ينۆەستيتسيالىق جوبا رەتىندە كەلىسىم بەردى جانە ونى باسقارمانىڭ ەلتاڭبالى مورمەن بەكىتتى، - دەدى پروكۋرور.
ءارى قاراي ءۇش كاسىپكەر ءوز جوبالارىن جەر قاتىناستارى باسقارماسىنا جىبەردى. باسقارما باسشىسى ارداق سامامبەتوۆ جەر كودەكسىنىڭ 48-بابىن بۇزا وتىرىپ، وڭىرلىك ۇيلەستىرۋ كەڭەسىنىڭ كەلىسىمىن الماي، جەر كوميسسياسىنىڭ وڭ قورىتىندىسىنىڭ جوباسىن دايىنداۋدى تاپسىرادى.
- جەر كوميسسياسىندا سامامبەتوۆ پەن احمەدجانوۆ ينۆەستيتسيالىق جوبالار سىلتاۋىمەن جوعارىدا اتالعان جەر ۋچاسكەلەرىن «ابز اقتاس» ج ش س، «T Super Service» ج ش س، «ТМТ Invest» ج ش س- ىنا جالعا بەرۋگە داۋىس بەردى. ەكى باسشىنىڭ ۇستانىمىن ەسكەرە وتىرىپ، جەر كوميسسياسىنىڭ قالعان مۇشەلەرى دە بۇل شەشىمگە قوسىلادى. ناتيجەسىندە مالىمدەگەن جوبالاردى سالۋ ءۇشىن ءۇش جىل مەرزىمگە ۋاقىتشا وتەۋلى قىسقا مەرزىمدى جەر پايدالانۋ قۇقىعىن بەرۋ تۋرالى شەشىم قابىلداندى، - دەپ اتاپ ءوتتى مەملەكەتتىك ايىپتاۋشى.
تەرگەۋ مالىمەتىنە سايكەس، اتالعان جەر ۋچاسكەلەرى كەيىننەن ءۇش كومپانيانىڭ جەكە مەنشىگىنە ءوتىپ كەتكەن. اتاپ ايتقاندا، «ابز اقتاس» ج ش س «قازاق فيلم» ىقشام اۋدانىنداعى جەر ۋچاسكەسىن نارىقتىق قۇنى 80 ميلليون تەڭگە بولعانىنا قاراماستان، 5,4 ميلليون تەڭگەگە ساتىپ العان. ال «T Super Service» ج ش س اباي-پروكوفيەۆ كوشەلەرىنىڭ قيىلىسىنداعى نارىقتىق قۇنى 118,8 ميلليون تەڭگە بولاتىن اۋماقتى 13,2 ميلليون تەڭگەگە، «ТМТ Invest»ج ش س اۋەزوۆ اۋدانىنداعى نارىقتىق قۇنى 82 ملن تەڭگە بولاتىن جەر ۋچاسكەسىن 7,5 ميلليون تەڭگەگە ساتىپ الدى. الايدا اتالعان اۋماقتاردا جوبادا كورسەتىلگەن حالىققا قىزمەت كورسەتۋ وبەكتىلەرى سالىنعان جوق.
ەسكە سالايىق، 2023 -جىلى الماتىدا زاڭسىز قۇرىلىسقا رۇقسات بەرىپ كەلگەن ۋربانيستيكا باسقارماسىنىڭ باسشىسى ۇستالعان بولاتىن.
اۆتور
دوسبول اتاجان
