سيريانىڭ جاڭا كوشباسشىسى ەلدەن اسكەردى شىعارۋ ءۇشىن يزرايلگە قىسىم جاساۋدى تالاپ ەتەدى
استانا. KAZINFORM - اش-شاراا يزرايلدىڭ ءىس-ارەكەتىن بۇكىل ايماقتاعى قاۋىپسىزدىك پەن بەيبىتشىلىككە تىكەلەي قاۋىپ دەپ اتادى.
سيريا پرەزيدەنتىنىڭ ۋاقىتشا مىندەتىن اتقارۋشى احمەد اش-شاراا حالىقارالىق قاۋىمداستىقتى يزرايلدىڭ اسكەرلەرىن سيريانىڭ وڭتۇستىگىنەن دەرەۋ شىعارۋ ءۇشىن قىسىم جاساۋعا شاقىردى.
قازىر يزرايل ارمياسى بۋفەرلىك ايماقتى ۇستاپ، ودان تىس جەرلەرگە باسىپ كىرۋدە. يزرايل بۇنى سيريانىڭ جاڭا باسشىلىعىنان قورعاۋعا باعىتتالعان ارەكەت دەپ سانايدى.
- ءبىز حالىقارالىق قاۋىمداستىقتى سيريانىڭ قۇقىقتارىن قولداۋ جانە يزرايلگە سيريانىڭ وڭتۇستىگىنەن اسكەرلەردى دەرەۋ شىعارۋعا قىسىم جاساۋ ارقىلى ءوزىنىڭ قۇقىقتىق جانە مورالدىق مىندەتتەمەلەرىن ورىنداۋعا شاقىرامىز، - دەدى اش-شاراا كايردەگى اراب ليگاسىنىڭ سامميتىندە.
اش-شاراا سيريا بيلىگى اۋىسقاننان كەيىنگى اراب ليگاسىنىڭ ءبىرىنشى سامميتىنە قاتىستى.
ول «دۇشپاندىق ەكسپانسيا سيريانىڭ ەگەمەندىگىن بۇزۋ عانا ەمەس، سونىمەن قاتار بۇكىل ايماقتاعى قاۋىپسىزدىك پەن بەيبىتشىلىككە تىكەلەي قاتەر» دەپ قوستى.
سامميت اياسىندا اش-شاراا العاش رەت مىسىر پرەزيدەنتى ابدەل فاتتاح ءال-سيسيمەن كەزدەستى. مىسىر پرەزيدەنتتىك كەڭسەسىنىڭ مالىمدەمەسىندە بۇل كەزدەسۋدە ءال-سيسي اش-شاراانى ەشبىر تاراپتى سىرتقا شىعارماي، بارلىق سيريالىقتاردى قامتيتىن ينكليۋزيۆتى ساياسي پروتسەستى باستاۋعا شاقىرعانى ايتىلدى.
سيريا پرەزيدەنتى احمەد اش-شاراا، بۇرىن ءابۋ موحامماد ءال-دجۋلاني دەگەن اتپەن بەلگىلى، 2024 -جىلى جەلتوقساندا داماسكىگە جاسالعان اۋقىمدى شابۋىل كەزىندە سيريانىڭ بۇرىنعى پرەزيدەنتى باشار اسادتىڭ بيلىكتەن كەتۋىنە اكەلگەن «حايات تاحرير اش-شام» (ح ت ش، قازاقستاندا تىيىم سالىنعان ۇيىم) ۇيىمىنىڭ جەتەكشىسى.
كورشى ەلدەگى بيلىك اۋىسقاننان كەيىن يزرايل 1974 -جىلدان بەرى گولان جوتاسىنداعى يزرايل مەن سيريا كۇشتەرىن ءبولىپ تۇرعان ب ۇ ۇ پاترۋلدىك بۋفەرلىك ايماققا اسكەرلەرىن ورنالاستىردى.
قۇرلىق شابۋىلدارىنان بولەك، يزرايل كۇشتەرى سوڭعى كۇندەرى سيريانىڭ اسكەري نىساندارىنا بىرنەشە رەت اۋەدەن شابۋىل جاسادى.
يزرايل سولتۇستىك شەكارالارىنىڭ قاۋىپسىزدىگىنە الاڭدايدى. قاڭتار ايىندا يزرايلدە ءتىپتى سيريا بويىنشا حالىقارالىق كونفەرەنسياعا شاقىرۋ تۋرالى ۇسىنىستار دا بولدى، ونىڭ بارىسىندا ەلدى ءارتۇرلى اكىمشىلىك بىرلىكتەرگە ءبولۋ ماسەلەسى قارالاتىن بولدى.
وتكەن اپتادا سيريانىڭ ساياسي بولاشاعىن انىقتاۋعا كومەكتەسۋ ءۇشىن داماسكىدە ۇلتتىق ديالوگ كونفەرەنسياسى ءوتتى. وندا اش-شاراا ەلدىڭ اۋماقتىق تۇتاستىعىن قورعاۋعا شاقىردى.
وسىعان دەيىن ە و- نىڭ سيرياداعى جاعدايدى تۇراقتاندىرۋ ءۇشىن سانكسيالاردى توقتاتاتىنى تۋرالى جازدىق.
