سيريانىڭ ۋاقىتشا پرەزيدەنتى ساۋد ارابياسىنا باردى
استانا. KAZINFORM - بۇل - احمەد اش-شارانىڭ سيريانىڭ ۋاقىتشا پرەزيدەنتى رەتىندەگى العاشقى شەتەلدىك ساپارى. جەكسەنبىدە ول ەر-ريادتا ساۋد ارابياسىنىڭ مۇراگەر حانزاداسى مۇحاممەد بەن سالمانمەن كەزدەستى.

Kazinform اگەنتتىگىنىڭ مەنشىكتى ءتىلشىسى اتالعان كەزدەسۋ جاڭا سيريانىڭ بولاشاعىنا قالاي اسەر ەتەتىنىن باعامداپ كوردى.
جەكسەنبى كۇنى سيريا پرەزيدەنتى ەر-ريادتاعى كورول حاليد اۋەجايىنا كەلىپ، ونى ەل استاناسى گۋبەرناتورىنىڭ ورىنباسارى حانزادا مۇحاممەد بين ابدۋلراحمان بين ابدۋلازيز قارسى الدى.
ايتا كەتەيىك، وتكەن اپتادا «حايات تاحرير اش-شام» (ح ت ش قازاقستاندا تىيىم سالىنعان ۇيىم) توبىنىڭ باسشىسى، بۇرىن ءابۋ مۇحاممەد ءال-دجۋلاني دەگەن اتپەن بەلگىلى احمەد اش-شارا سيريانىڭ پرەزيدەنتى بولىپ جاريالانعان ەدى. ساپار اياسىندا ساۋد ارابياسىنىڭ تاق مۇراگەرى مۇحاممەد بين سالمانمەن كەزدەسۋ ءوتتى.
ەر-ريادتاعى كەلىسسوزگە سيريا پرەزيدەنتىمەن بىرگە سيريانىڭ سىرتقى ىستەر ءمينيسترى اساد ءال-شايباني دە باردى. كەزدەسۋدەن كەيىن اش-شارابين سالمانمەن جۇزدەسۋ ساۋد ارابياسىنىڭ «سيريانى بولاشاعىن قۇرۋدا قولداۋعا شىن نيەتى بارىن» كورسەتكەنىن ايتتى.

اش-شارا جازباشا مالىمدەمەسىندە مۇراگەر حانزادامەن گۋمانيتارلىق جانە ەكونوميكالىق ىنتىماقتاستىقتى، سونىمەن قاتار «ەنەرگەتيكا، تەحنولوگيا، ءبىلىم جانە دەنساۋلىق سالالارىنداعى اۋقىمدى بولاشاق جوسپارلارىن» تالقىلاعانىن ايتتى.
- بۇگىن ءبىز ۇزاق كەزدەسۋ وتكىزدىك. باسقوسۋ بارىسىندا سيريانىڭ بولاشاعىن قۇرۋعا قولداۋ كورسەتۋگە دەگەن شىنايى نيەتتى، سونداي-اق سيريا حالقىنىڭ ەرىك-جىگەرىن، ونىڭ اۋماقتارىنىڭ بىرلىگى مەن تۇتاستىعىن قولداۋعا دەگەن ۇمتىلىستى سەزىندىك جانە ەستىدىك، - دەدى سيريا كوشباسشىسى.
ساۋد ارابياسى اقپارات اگەنتتىگىنىڭ حابارلاۋىنشا، پرەزيدەنتتەر ەكىجاقتى قارىم-قاتىناستاردى جاقسارتۋ جانە ايماقتىق دامۋ ماسەلەلەرىن تالقىلادى.

بۇقارالىق اقپارات قۇرالدارىنىڭ حابارلاۋىنشا، اش-شارا دۇيسەنبى كۇنى مۇسىلمانداردىڭ قاسيەتتى قالاسى مەككەگە بارۋ ءۇشىن كورولدىكتە قالادى. ول ساۋد ارابياسىندا دۇنيەگە كەلگەن جانە بالالىق شاعىنىڭ ءبىر بولىگىن سوندا وتكىزگەن.

اش-شارا 8-جەلتوقساندا ەلدەگى جاپپاي شابۋىلدان كەيىن پرەزيدەنت باشار اسادتى بيلىكتەن تايدىرعان سيريالىق وپپوزيتسيانى باسقاردى. سودان بەرى سيريانىڭ جاڭا اكىمشىلىگى ايماقتىق جانە حالىقارالىق زاڭدىلىققا قول جەتكىزىپ، باتىستىڭ سيرياعا قارسى سانكسيالارىنىڭ جويىلۋىنا قول جەتكىزۋگە تىرىستى.
اۆتور
ەركەجان سماعۇلوۆا