سيريا وپپوزيتسياسى داماسكىنىڭ اساد رەجيمىنەن ازات ەتىلگەنىن جاريالادى
استانا. KAZINFORM - سيريانىڭ قارۋلى وپپوزيتسياسى ەل استاناسى داماسكىنى جاۋلاپ العانىن، ال پرەزيدەنت باشار اساد ەلدەن قاشقانىن مالىمدەدى،
دەپ حابارلايدى Kazinform اگەنتتىگى Al Jazeera-عا سىلتەمە جاساپ.
كوماندير حايات تاحرير اش-شام ءابۋ مۇحاممەد ءال-جۋلاني بارلىق مەملەكەتتىك مەكەمەلەر رەسمي تۇردە تاپسىرىلعانشا پرەمەر-مينيستر مۇحاممەد عازي ءال-جالالي باقىلاۋىندا بولاتىنىن ايتتى. ول مالىمدەمەسىندە وپپوزيتسيا 8-جەلتوقساندى «جاڭا ءداۋىردىڭ باستاماسى» دەپ اتاپ، «جاڭا سيريا» بارلىق سيريالىقتاردىڭ «بەيبىت مەكەنىنە» اينالاتىنىن جەتكىزدى.
بۇل مالىمدەمە وپپوزيتسيالىق توپتاردىڭ جىلدام شابۋىلمەن بىرنەشە قالانى باسىپ العاننان كەيىن بىرنەشە ساعاتتان سوڭ جاسالدى. كەيىن مۇحاممەد عازي ءال-جالالي حالىق سايلاعان كەز كەلگەن ۇكىمەتپەن ىنتىماقتاسۋعا دايىن ەكەنىن ءبىلدىردى.
- بۇل ەل ءوز كورشىلەرىمەن جانە الەممەن جاقسى قاتىناستار ورناتاتىن قالىپتى ەل بولۋى مۇمكىن... ، ءبىراق بۇل ماسەلە جاڭا باسشىلىققا بايلانىستى. ءبىز ونىمەن ىنتىماقتاستىققا دايىنبىز، - دەدى ول.
ءال-جالالي ءوزىنىڭ «لاۋازىمدار مەن ارتىقشىلىقتارعا» ەمەس، سيريا ۇكىمەتىنىڭ ينستيتۋتتارىن ساقتاۋعا مۇددەلى ەكەنىن اتاپ ءوتىپ، ەلدەن كەتۋدى جوسپارلامايتىنىن ايتتى.
- ءبىز بۇل ەل قاراماعىنداعى ەشكىمگە زيان كەلتىرمەيمىز دەپ ايتقان وپپوزيتسياعا قول ۇشىن سوزامىز، - دەدى ول Al Jazeera-عا.
بۇعان دەيىن قاتار، ساۋد ارابياسى، يوردانيا، مىسىر، يراك، يران، تۇركيا جانە رەسەي بىرلەسكەن مالىمدەمە جاساپ، داعدارىستى «قاۋىپتى وقيعالاردىڭ دامۋى» دەپ اتاپ، ساياسي شەشىمگە شاقىردى.
اقپاراتتى Al Jazeera اگەنتتىگى ارنايى Kazinform ءۇشىن ۇسىندى.
بۇعان دەيىن حابارلانعانداي، سيريا پرەزيدەنتى باشار اساد جەكسەنبىدە ەل استاناسىنان بەلگىسىز باعىتقا ۇشىپ كەتكەن. سيرياداعى ادام قۇقىقتارى بويىنشا مونيتورينگ ورتالىعى ونىڭ قالادان سەنبى كۇنى كەشكى ساعات 10-دا كەتكەنىن حابارلادى.
ايجان سەرىكجان قىزى
اۆتور
