سيريا تۇرىك تاۋارلارىنا كەدەندىك باج سالىعىن كۇرت ارتتىردى

استانا. KAZINFORM - جاڭا شارالار ءىس جۇزىندە ەلدەر اراسىنداعى ساۋدانى ىركىلتتى، بۇل تۇرىك ەكسپورتتاۋشىلارىن كۇردەلى ماسەلەلەرگە اكەپ سوقتىردى.

Сирия резко повысила таможенные пошлины на турецкие товары
Фото: Anadolu ajansı

سيريانىڭ وتپەلى ۇكىمەتى تۇرىك تاۋارلارىنا كەدەندىك باج سالىعىن ايتارلىقتاي ۇلعايتىپ، ونى 300-500 پايىزعا دەيىن ارتتىردى.

2024 -جىلى جەلتوقساندا باشار اساد رەجيمى قۇلاعاننان كەيىن قۇرىلعان سيريانىڭ وتپەلى ۇكىمەتى تۇركيادان كەلەتىن يمپورتقا ايتارلىقتاي اسەر ەتەتىن شەشىم قابىلدادى.

وسىلايشا، جاڭا اكىمشىلىك تۇركيا شەكاراسى ارقىلى وتەتىن يمپورتتىق تاۋارلارعا كەدەندىك باج سالىعىن 300- 500 پايىزعا دەيىن ارتتىردى. بۇل شەشىم ەكى ەل اراسىنداعى ساۋدانىڭ توقتاۋىنا اكەلدى. تۇرىك ەكسپورتتاۋشىلارى مەن سيريالىق يمپورتتاۋشىلار ەكونوميكانىڭ كوپتەگەن سالالارىندا ۇلكەن قيىندىقتارعا تاپ بولدى. اسىرەسە سيريانىڭ سولتۇستىگىندەگى وپپوزيتسيالىق كۇشتەردىڭ باقىلاۋىنداعى شەكارالىق وتكەلدەر ارقىلى جۇزەگە اسىرىلاتىن ساۋدادا كۇردەلى ماسەلەلەر تۋىندادى.

وڭتۇستىك- شىعىس انادولى ەكسپورتشىلارى قاۋىمداستىعىنىڭ پرەزيدەنتى دجەلال كادووگلۋ جاڭا باج سالىعى ەنگىزىلگەنگە دەيىن تۇركيادان سيرياعا اي سايىنعى ەكسپورت شامامەن 30 ميلليون دوللاردى قۇراعانىن ايتتى، الايدا جاڭا كەدەندىك مولشەرلەمەلەر ەكسپورتتى ەكونوميكالىق تۇرعىدان ءتيىمسىز ەتىپ، ساۋدانى تولىعىمەن توقتاتىپ، شەكاراداعى ۇزىن-سونار كەزەككە الىپ كەلدى.

- جاعداي اسىرەسە سيرياعا جەتكىزۋگە ماماندانعان كومپانيالار ءۇشىن اۋىر بولدى، ويتكەنى ولار ءوز تاۋارلارىن باسقا نارىقتارعا تەز باعىتتاي المايدى. تاريفتەردىڭ كۇرت كوتەرىلۋى ەلگە ەكسپورتتالاتىن تاۋارلاردىڭ بارلىق تۇرلەرىنە اسەر ەتتى. بۇل ەلدىڭ وڭتۇستىك- شىعىس ايماقتارىنداعى كومپانيالار ءۇشىن ەلەۋلى ەكونوميكالىق شىعىندارعا اكەلۋى مۇمكىن، - دەدى دجەلال كادووگلۋ.

تۇرىك ساراپشىلارى جازعانداي، بۇل ماسەلە ساياسي كۇن تارتىبىنە قويىلدى. تۇركيا سىرتقى ىستەر ءمينيسترى حاكان فيدان سيريانىڭ وتپەلى ۇكىمەتىنىڭ وكىلدەرىمەن كەزدەسۋدە تاريف ماسەلەسىن تالقىلايدى دەپ كۇتىلۋدە.

قازىر كوپتەگەن ەكسپورتتاۋشىلار ساۋدانى قالپىنا كەلتىرۋ جانە شىعىندى ازايتۋ ءۇشىن ماسەلەنىڭ جىلدام شەشىمىن كۇتۋدە.

ايتا كەتەيىك، بۇعان دەيىن 52 مىڭنان استام بوسقىن تۇركيادان سيرياعا ورالعانى تۋرالى جازعان ەدىك.

اۆتور

جاراسقان نۇرىبايەۆ

سوڭعى جاڭالىقتار