سىر وڭىرىندەگى باقاتام كەسەنەسى مەن سىعاناق قالاشىعى قالپىنا كەلتىرىلىپ جاتىر

قازالى اۋدانىنداعى باقاتام كەسەنەسى مەن جاڭاقورعان اۋدانىنداعى سىعاناق قالاشىعىن قالپىنا كەلتىرۋدى «قازقايتاجاڭارتۋ» ر م ك ماماندارى قولعا العان.

- باقاتام كەسەنەسىندەگى جۇمىس تولىق اياقتالدى. رەستاۆراسيا بارىسىندا ەسكەرتكىشتىڭ تەحنيكالىق جاعدايىنا عىلىمي زەرتتەۋ جۇرگىزىلدى. كونسترۋكسيالىق كۇشەيتۋ، جىكتەردى قايتا وڭدەۋ، جوعالعان ساۋلەتتىك بولشەكتەردى عىلىمي نەگىزدە تولىقتىرۋ جانە تاريحي ماتەريالعا سايكەس رەستاۆراتسيالىق كىرپىشپەن قايتا قالاۋ جۇمىسى ورىندالدى. سونىمەن قاتار كۇمبەزدىڭ قورعانىش سىلاق قاباتى جاڭارتىلدى. سۋدان وقشاۋلانىپ، اۋماعى اباتتاندىرىلدى. اتالعان شارالار ەسكەرتكىشتىڭ تاريحي ساۋلەتتىك كەلبەتىن ساقتاي وتىرىپ، ونىڭ ۇزاقمەرزىمدى ساقتالۋىن قامتاماسىز ەتەدى، - دەدى وبلىستىق تاريحي-مادەني مۇرانى قورعاۋ ورتالىعىنىڭ ءبولىم مەڭگەرۋشىسى تالعات بەرديەۆ.

سىعاناق قالاشىعىنا رەستاۆراتسيا جاساۋداعى نەگىزگى ماقسات - تاريحي-مادەني مۇرا نىسانىن ساقتاپ قالۋ، ونىڭ باستاپقى ساۋلەتتىك كەلبەتىن عىلىمي نەگىزدە قالپىنا كەلتىرۋ جانە ارحەولوگيالىق قۇندىلىعىن بولاشاق ۇرپاققا جەتكىزۋ. جوسپارعا سايكەس ارحەولوگيالىق قازبا بارىسىندا ارشىلعان 2 كەسەنە مەن تۇرعىن ءۇي ورنىنىڭ ءبىر بولىگى قالپىنا كەلتىرىلەدى.

- سىعاناق قالاسىنىڭ اتاۋى 10- عاسىردان باستاپ تۇركى جانە پارسى-اراب تاريحشىلارىنىڭ جازبالارىندا كەزدەسەدى. ورتاعاسىرلىق دەرەكتەرگە قاراعاندا قالا 11-13عاسىرلاردا دەشتى- قىپشاق ەلىنىڭ، 13- 14- عاسىرلاردا اق وردانىڭ، 15- 17- عاسىرلاردا قازاق حاندىعىنىڭ ەلورداسى بولعان. ءتۇرلى تاريحي كەزەڭدى باسىنان وتكىزگەن قالا 18-عاسىرعا دەيىن ءومىر سۇرگەن. سىعاناقتىڭ «قىپشاق دالاسىنىڭ ايلاعى» دەپ اتالۋى ايگىلى ۇلى جىبەك جولى بويىنداعى قالانىڭ شارۋاشىلىعى مەن الەۋمەتتىك-ەكونوميكالىق الەۋەتى جوعارى دەڭگەيدە دامىعانىن اڭعارتادى، - دەدى تالعات بەرديەۆ.