سينگاپۋردا ەسىرتكى ساتقاندار ءولىم جازاسىنا كەسىلەدى
استانا. قازاقپارات - امەريكاندىقتار ەسىرتكىمەن كۇرەسكە جىل سايىن ءبىر جارىم تريلليون دوللار جۇمسايدى. ا ق ش ەكونوميكاسىنا بۇل ايتارلىقتاي سالماق. 10 كۇننەن كەيىن پرەزيدەنت قىزمەتىنە كىرىسەتىن دونالد ترامپ ەسىرتكىمەن كۇرەستى كۇشەيتپەك.
ال اۋعانستان بيلىگى بۇل باعىتتا العاشقى جەتىستىككە جەتتى. مۇنى حالىقارالىق قاۋىمداستىق مويىنداپ وتىر. الەم ەلدەرىندە ەسىرتكىمەن كۇرەس قالاي جۇرگىزىلەدى؟
اۋعانستان اپيىننىڭ ەڭ ءىرى وندىرۋشىلەرىنىڭ ءبىرى. الەمدىك قارا نارىقتاعى ۇلەسى 80 پايىزعا جۋىقتايدى. ءبىراق 2021-جىلى بيلىك باسىنا تالىپتەر كەلگەلى ەسىرتكى وندىرىسىنە قاجەتتى كوكنار وسىرەتىن القاپتاردىڭ اۋدانى 22 ەسە كىشىرەيدى. ءسويتىپ، 2023 -جىلى اپيىن ءوندىرىسى 95 پايىزعا ازايدى. ب ۇ ۇ-نىڭ وكىلدەرى مۇنى ءىرى جەتىستىككە بالاپ وتىر.
ءبىراق بىلتىر جاعداي وزگەردى. نەگىزگى تابىس كوزىنەن ايىرىلعان فەرمەرلەر بيلىكتىڭ تىيىم سالۋىنا قاراماستان قايتادان كوكنار وسىرە باستاعان. سوندىقتان حالىقارالىق ۇيىمدار ەسىرتكى ساۋداسىنا توسقاۋىل قويۋ ءۇشىن جەرگىلىكتى شارۋالارعا قارجىلاي كومەك كورسەتۋدى ۇسىنىپ وتىر.
د. ترامپ ەسىرتكىمەن كۇرەستى كۇشەيتپەك
ال ا ق ش- تا 50 جىلدان بەرى «ەسىرتكىمەن كۇرەس» اتتى مەملەكەتتىك باعدارلاما ىسكە اسادى. ءبىراق كەيىنگى جىلدارداعى ستاتيستيكا ونىڭ ءتيىمسىز ەكەنىن كورسەتىپ وتىر. مىسالى، بىلتىر امەريكالىقتار اراسىندا كەڭ تاراعان فەنتانيلدەن ەلدە 107 مىڭ ادام كوز جۇمعان. ال كەيىنگى 5 جىلدا سينتەتيكالىق ەسىرتكىدەن كىسى ءولىمى 4 ەسە ارتقان. سول ءۇشىن جاڭادان سايلانعان پرەزيدەنت دونالد ترامپ مەكسيكادان كەلەتىن بارلىق تاۋارعا 25 پايىز باج سالىعىن ەنگىزەمىن دەپ وتىر. ويتكەنى فەنتانيلدىڭ كوپ بولىگى وسى ەلدەن كەلەدى. ساياساتكەر بۇل ەسىرتكىمەن كۇرەستى كۇشەيتىپ قانا قويماي، زاڭسىز ميگرانتتاردىڭ نوپىرىنە توتەپ بەرۋ ءۇشىن قاجەت دەيدى.
سينگاپۋردا ەسىرتكى ساتقاندار ءولىم جازاسىنا كەسىلەدى
ەسىرتكىمەن كۇرەستە قاتاڭ جازا قولداناتىن ەلدىڭ ءبىرى سينگاپۋر. مۇندا تىيىم سالىنعان زات ساۋداسىمەن اينالىسقاندار ءولىم جازاسىنا كەسىلەدى. بيلىك وسىنداي قاتاڭ ءتارتىپتىڭ ارقاسىندا سيپگاپۋر الەمدەگى ەڭ قاۋىپسىز مەملەكەتتەردىڭ قاتارىنا كىرەتىنىن ايتادى. ءبىراق حالىقارالىق قاۋىمداستىق بۇل ادام قۇقىقتارىن بۇزۋ دەپ بيلىكتىڭ ۇستانىپ وتىرعان ساياساتىن قاتاڭ سىنعا الادى.
حالىقارالىق ەمنەستي ينتەرنەينشل ۇيىمىنىڭ دەرەگىنشە 1991-2011 -جىلدار ارالىعىندا ەلدە 450-گە جۋىق ادام ءولىم جازاسىنا كەسىلگەن. سولاردىڭ 70 پايىزى ەسىرتكىگە قاتىستى قىلمىس ءۇشىن سوتتالعاندار.
24.kz
