سىناما، سالىق، سالماق، پايدا: التىن قۇيما الۋشىلار نەنى ءبىلۋى كەرەك
استانا. KAZINFORM - التىن قۇيمانى ەل ازاماتتارىنا ساتۋ جوباسى 2017 -جىلدان بەرى جۇزەگە اسىرىلىپ كەلەدى. تاجىريبە كورسەتكەندەي، التىنعا ينۆەستيتسيا سالۋعا ىنتالىلار از ەمەس.
وسى ورايدا، ۇلتتىق بانكتەن الىنعان دەرەكتەر نەگىزىندە التىن قۇيما الاتىن ادام ءبىلۋى ءتيىس مالىمەتتەر توپتاماسىن ازىرلەدىك.
اففينيرلەنگەن التىن قۇيمالار سالماعىنا قاراي بەس تۇرگە بولىنەدى: 5 گرام، 10 گرام، 20 گرام، 50 گرام جانە 100 گرامدىق.
تەك جوعارى سىنامادا ساتىلادى
بارلىق ولشەنگەن قۇيمادا باعالى مەتالدىڭ قۇرامى - %99,99، ياعني سىناماسى - 999,9.
قاپتاماسىن اشۋعا بولمايدى
ءاربىر قۇيمادا ارنايى قورعانىش ەلەمەنتتەرى بار: بەتى ايناداي تەگىس، ميكروماتىن جازىلعان جانە قىرى بەدەرلى.
قۇيمالار ارنايى قاپتامامەن شىعارىلادى، ول ساپا سەرتيفيكاتى دا بولادى جانە قۇيمالاردى مەحانيكالىق زاقىمدانۋدان قورعايدى.
بىرەگەي قورعانىش قاپتاماسى ونىڭ اشىلعانىن نەمەسە اشىلماعانىن وڭاي انىقتاۋعا مۇمكىندىك بەرەدى. كليەنت ۋلتراكۇلگىن ساۋلە ارقىلى قورعانىش قاپتاماسىنىڭ ءتۇپنۇسقالىعىن وڭاي تەكسەرە الادى. ۋلتراكۇلگىن ساۋلەنى تۇسىرگەندە اشىلماعان قاپتامادا ليۋمينەستسەنتتى جازۋلار ءمولدىر تەرەزە ارقىلى پايدا بولادى، قاپتاما اشىلعان جاعدايدا وزگەرەدى. قۇيمالاردى تۇتاس قورعانىش قاپتاماسىندا ساقتاۋ ۇسىنىلادى.
ارتىقشىلىعى نەدە؟
وتىمدىلىگى جوعارى
سالىمنىڭ ۇزاقمەرزىمدى ءتۇرى
ينفلياتسيا مەن ەكونوميكالىق داعدارىستاردان قورعايدى
كليەنتكە «سول كۇنى» اقشا تولەي وتىرىپ، كەرى ساتىپ الۋ (قورعانىش قاپتاماسىنىڭ تۇتاستىعى ساقتالعان جاعدايدا) كەپىلدەندىرىلگەن.
قايدان الۋعا جانە ساتۋعا بولادى؟
قازىرگى ۋاقىتتا ولشەنگەن التىن قۇيمالاردى Halyk Bank، ەۋرازيالىق بانك، Jusan Bank پەن بانك سەنتركرەديتتەن، سونداي-اق بانككە جاتپايتىن كەي ايىرباستاۋ پۋنكتەرىنەن ساتىپ الۋعا جانە قايتادان ساتۋعا بولادى.
شەتەلگە شىعارۋعا بولا ما؟
پرەزيدەنتتىڭ №830 جارلىعىنا سايكەس، قازاقستان رەسپۋبليكاسىنىڭ ۇلتتىق بانكى شىعاراتىن اففينيرلەنگەن التىننىڭ 5، 10، 20، 50 جانە 100 گراممدىق التىن قۇيمالارىن، سونداي-اق ماسساسى 100 گرامنان اساتىن اففينيرلەنگەن التىندى شەتەلگە شىعارۋعا تىيىم سالىنادى.
قالاي ساقتاۋ كەرەك؟
ءاربىر ولشەنگەن قۇيما ارنايى قاپتامادا ساتىلادى. ساقتاۋ كەزىندە وسى قاپتامانى اشپاعان ءجون. سەبەبى، قاپتاما ونىڭ ساپا سەرتيفيكاتى رەتىندە دە سانالادى. ونىڭ اشىلعانى نەمەسە اشىلماعانى وڭاي انىقتالادى.
قاپتاما اشىلماسا، ەكىنشى دەڭگەيلى بانكتەر التىن قۇيمانى ۇزاق تەكسەرىستەن وتكىزبەي-اق ساتىپ الۋعا مىندەتتى بولادى.
سالىق سالىنا ما؟
ۇلتتىق بانك شىعاراتىن ينۆەستيتسيالىق قۇرالدارعا (التىننان جاسالعان ينۆەستيتسيالىق مونەتالار جانە تازارتىلعان التىننىڭ ولشەۋلى قۇيمالارى) قوسىلعان قۇن سالىعى سالىنبايدى.
قاي التىن قۇيمالارى ءوتىمدى؟
2024 -جىلعى 1- جەلتوقسانداعى دەرەككە ساي، قۇيما ساتىپ الۋشىلار اراسىنداعى سۇرانىس:
10 گرامدىق التىن، ونىڭ جالپى ساتۋ كولەمىندەگى ۇلەسى - 51958 دانا نەمەسە %24
100 گرامدىق قۇيما - 47794 دانا نەمەسە %22
5 گرامدىق قۇيما - 47584 دانا نەمەسە %22
20 گرامدىق قۇيما - 38603 دانا نەمەسە %18
50 گرامدىق قۇيما - 29555 دانا نەمەسە %14.
ايتا كەتەيىك، بۇعان دەيىن التىن قۇيماعا ينۆەستيتسيا سالاردا نەنى ەسكەرۋ كەرەگىن جازعان ەدىك.
- التىنعا ينۆەستيتسيا سالعان كەزدە، التىن باعاسى وزگەرىپ وتىراتىنىن، ياعني ءوسۋى دە، ءتۇسۋى دە مۇمكىن ەكەنىن ەستە ۇستاعان ءجون. دەمەك، ينۆەستيتسيالاۋدىڭ كەز كەلگەن ءتۇرى سياقتى، التىنعا بايلانىستى ينۆەستيتسيالاردا دا تولىققاندى ەسكەرىلۋى قاجەت تاۋەكەلدەر بار، - دەلىنگەن ۇلتتىق بانكتىڭ جاۋابىندا.
ۇلتتىق بانك كۇن سايىن 1 گرام التىننىڭ باعاسىن جاريالاپ وتىرادى. ونداعى دەرەكتەرگە سۇيەنسەك، كەيىنگى 3 ايدا التىن باعاسى 4 مىڭ تەڭگەگە جۋىق وسكەن.
سونداي-اق، ۇلتتىق بانك ەل ازاماتتارى بۇگىنگە دەيىن قانشا التىن قۇيماسىن ساتىپ العانىن مالىمدەگەن بولاتىن.
اتاپ ايتقاندا، 2025 -جىلعى 1-قاڭتارداعى دەرەككە ساي، ۇلتتىق بانك ەكىنشى دەڭگەيلى بانكتەر مەن بانككە جاتپايتىن ايىرباستاۋ پۋنكتەرىنە جالپى سالماعى 6,8 توننا ولشەنگەن قۇيما ساتقان. ساتۋ جانە قايتا ساتىپ الۋ ءتارتىبى بانكتەر جانە ايىرباستاۋ پۋنكتتەرىمەن جاسالعان شارت ارقىلى رەتتەلەدى.
اۆتور
ەربول جانات
