ەسىل مەن تورعاي وزەنىن قوسۋ جوباسى قارالىپ جاتىر

استانا. قازاقپارات - كەيىنگى جىلدارى ەرتىس وزەنىنىڭ سۋىن سىردارياعا جەتكىزۋ جوباسى تۋرالى ءجيى ايتىلىپ ءجۇر. بۇل ماسەلە پارلامەنت قابىرعاسىندا دا كوتەرىلىپ، ۇكىمەتكە دەپۋتاتتىق ساۋال جولداندى، دەپ حابارلايدى 24kz.

كەشەندى جوبانىڭ ءبىر بولىگى رەتىندە ەسىل مەن تورعاي سۋ باسسەيىندەرىن بىرىكتىرەتىن كانال سالۋ ۇسىنىلدى. مامانداردىڭ ايتۋىنشا، بۇل شولەيت ايماقتاردا سۋ تاپشىلىعىن جويۋعا ىقپال ەتەدى. مەملەكەت باسشىسى سۋ شارۋاشىلىعى ينفراقۇرىلىمىن جاڭعىرتۋ ەلىمىز ءۇشىن باسىم باعىت دەپ ايقىنداپ بەردى. كوپ ۇزاماي سۋ رەسۋرستارىن باسقارۋ جۇيەسىن دامىتۋدىڭ 2024-2030 -جىلدارعا ارنالعان تۇجىرىمداماسى قابىلداندى. وسى قۇجاتقا سايكەس، ەسىل وزەن بويىندا بۇزىلىق سۋ قويماسىن سالۋ بەلگىلەنگەن.

دەپۋتاتتار: «ەندى ول جەردەن تورعايدىڭ سالاسى سارى وزەنگە دەيىن كانال نەمەسە تۋننەل تارتۋ جايىن قاراستىرسا» دەگەن ۇسىنىس ايتتى.

ەربولات ساۋرىقوۆ، ق ر پارلامەنتى ءماجىلىسىنىڭ دەپۋتاتى:

- بۇزىلىق سۋ قويماسىن سالۋ كەزىندە ەسىل جانە تورعاي باسسەيىندەرىن بىرىكتىرۋ ارقىلى تورعاي باسسەيىندەگى اۋىل شارۋاشىلىق القاپتارىن سۋارۋعا ءبىر ميلليون تەكشە كيلومەتردەن استام سۋدى بەرۋگە مۇمكىندىك بولادى. اكادەميك چوكيننىڭ باعالاۋ بويىنشا بۇل ورتالىق قازاقستاندا سۋارمالى جەرلەردى قوسىمشا 1,5 ميلليون گەكتارعا ارتتىرۋعا، سونداي-اق قورلارى بار تورعاي قوڭىر كومىر باسسەيىنىن يگەرۋدى قامتاماسىز ەتەدى.

قوستاناي وبلىسىندا شامامەن 300-گە جۋىق وزەن بار. سونىڭ ىشىندە ەڭ ءىرىسى توبىل مەن تورعاي سۋ ايدىنى. كەيدە اسىپ-تاسىپ، قاۋىپ توندىرەتىن، ەندى ءبىر جىلدارى تارتىلىپ، تاۋسىلۋعا شاق قالاتىن ەكى سۋ ارتەرياسىنىڭ ءوڭىردىڭ تىرشىلىگى ءۇشىن ماڭىزى زور. سوندىقتان ەسىل مەن تورعاي وزەندەرىن كانال ارقىلى قوسۋ كەرەك دەگەن ۇسىنىستى مۇنداعى جۇرت قولدايدى.

سۋ شارۋاشىلىعى سالاسىنىڭ ارداگەرى عايىپنازار قويشىنىڭ ايتۋىنشا، ول جوبا ىسكە اسسا، تورعايدا كەبەرسىگەن كولدەر تولىعىپ، شاڭى شىعىپ جاتقان جەرلەر كوك شالعىنعا اينالادى. الايدا ول ءۇشىن الدىمەن جاڭا بوگەتتەر سالىپ، وزەن ارناسىن تازارتۋ كەرەك.

عايىپنازار قويشى، سۋ شارۋاشىلىعى سالاسىنىڭ ارداگەرى:

- كوپ جەردە قايىرلاپ، ارنانى بەكىتىپ تاستاعان جەرلەر بار توپىراقپەن، ولار ارشىلمايدى. وعان كۇتىم جوق. سوعان بايلانىستى سۋ قاۋپى ءارقاشاندا بولادى. تورعايدىڭ ارناسىنىڭ بىتەلىپ قالۋىنا بايلانىستى سۋدىڭ «كريۆايا دەپرەسسيا» دەگەن بولادى. تومەنگى ۇيلەردى قازىر تۇز باسىپ كەتتى.

ازىرگە ەسىل مەن تورعايدى جالعايتىن كانال سالۋعا قاتىستى ناقتى شەشىم جوق. سۋ رەسۋرستارى جانە يرريگاتسيا مينيسترلىگىنىڭ وكىلى قازىرگى كەزدە كەشەندى زەرتتەۋ جۇمىستارى جۇرگىزىلىپ جاتقانىن ايتتى.

سەرگەي دوبرىنين، ق ر سۋ رەسۋرستارى جانە يرريگاتسيا مينيسترلىگىنىڭ باس ساراپشىسى:

- بۇل زەرتتەۋلەردىڭ ماقساتى - قورشاعان ورتاعا اسەردى باعالاۋ جانە سۋ تاسقىنىنىڭ تەرىس سالدارىن ازايتۋ بويىنشا ىقتيمال شارالاردى انىقتاۋ. سونىمەن قاتار جوبا ماتەريالدارىن مينيسترلىك جانىنداعى عىلىمي- تەحنيكالىق كەڭەستىڭ قاراۋىنا ۇسىنىلادى. عىلىمي-تەحنيكالىق كەڭەستىڭ ۇسىنىستارىمەن قورىتىندىلار نەگىزىندە مينيسترلىك جوبانى ءارى قاراي ىسكە اسىرۋدىڭ ورىندالۋى تۋرالى شەشىم قابىلدايدى. كەشەندى جوسپارعا سايكەس قوستاناي وبلىسىندا 2024-2028 -جىلدار ارالىعىندا 4 سۋ قويماسىن، 2 بوگەتتى كۇردەلى جوندەۋدەن وتكىزۋ جوسپارلانعان. قالعان گيدروتەحنيكالىق قۇرىلىمداردا جان-جاقتى زەرتتەۋ جۇرگىزىلەدى.