سپورت سالاسىنا تۇبەگەيلى وزگەرىس قاجەت: پرەزيدەنت بولىنەتىن قاراجاتتىڭ قايتارىمى تومەندىگىن ايتتى
مەملەكەت باسشىسى ازيا ويىندارىنىڭ جۇلدەگەرلەرىن قابىلداپ، سپورتشىلاردى جۇلدەلەرىمەن قۇتتىقتادى. سونداي- اق جۋىردا ريزابەك ايتمۇحان ەركىن كۇرەستەن قازاقتان شىققان تۇڭعىش الەم چەمپيونى بولعانىن ەسكە سالدى، دەپ حابارلايدى Kazinform.
باسەكە وتە جوعارى بولعان ازيادا ويىندارىندا ەل قۇراماسى 10 التىن، 22 كۇمىس، 48 قولا مەدال يەلەندى. اتلەتتەرىمىز نىسانا كوزدەۋ، ەسكەك ەسۋ، ۆەلوجارىس، دجيۋ- دجيتسۋ سپورتىنان ۇزدىك شىقتى. مەملەكەت باسشىسى كاراتەدەن جالپى كوماندالىق ەسەپتە ءبىرىنشى ورىن العان قازاقستان قۇراماسىن ەرەكشە اتاپ ءوتىپ، وسى سپورت تۇرىنەن ازياداعا قاتىسقان 8 سپورتشىنىڭ ءبارى جەڭىس تۇعىرىنا كوتەرىلگەنىنە نازار اۋداردى.
قاسىم- جومارت توقايەۆ سپورتشىلارىمىزدىڭ جەڭىسكە جەتۋىنە باپكەرلەر جانە باسقا دا ماماندار ايرىقشا ۇلەس قوسقانىنا توقتالدى. وسى ورايدا مەملەكەت باسشىسى سپورتتا جەڭىس پەن جەڭىلىس قاتار جۇرەتىنىن اتاپ ءوتتى.
- قاجىرلى ەڭبەك پەن جەڭىسكە دەگەن مۇقالماس ەرىك- جىگەردىڭ ارقاسىندا ءارقايسىڭىز جوعارى ناتيجەگە قول جەتكىزدىڭىزدەر. الايدا ەلىمىزدىڭ جالپى كورسەتكىشى وتكەن وليمپيادا مەن ازيادا ويىندارىنان دا وتە جاقسى بولۋى مۇمكىن ەدى. مۇنى اشىق ايتۋىمىز كەرەك. بوكس، اۋىر اتلەتيكا، ەركىن جانە گرەك- ريم كۇرەسى ءداستۇرلى تۇردە ەل قۇراماسىنىڭ قورجىنىنا جۇلدە سالىپ، ايتارلىقتاي ۇلەس قوساتىن. جەڭىل اتلەتيكا، سپورتتىڭ كوماندالىق تۇرلەرى جانكۇيەرلەرىمىزدى كوبىرەك قۋانىشقا بولەيتىن. بارلىق سپورت ءتۇرى بويىنشا كەتكەن قاتەلىكتەردى تۇزەتۋ ءۇشىن اۋقىمدى جۇمىس اتقارۋ قاجەت، - دەدى پرەزيدەنت.
قاسىم- جومارت توقايەۆ سپورت سالاسى ءاردايىم مەملەكەتتىڭ نازارىندا بولاتىنىن ايتتى. جىل سايىن سپورتتى دامىتۋ ءۇشىن قوماقتى قارجى بولىنەدى. الايدا، پرەزيدەنتتىڭ پىكىرىنشە، ەلىمىزدىڭ كاسىبي سپورتتاعى كورسەتكىشتەرى اسا جوعارى دەڭگەيدە ەمەس.
- اشىعىن ايتۋىمىز كەرەك، ناتيجەمىز مەملەكەتتەن ءبولىنىپ جاتقان قاراجاتتىڭ بارىنشا ءتيىمدى جۇمسالمايتىنىن كورسەتەدى. مۇنداي جاعدايعا جول بەرۋگە بولمايدى. سپورت سالاسىنا تۇبەگەيلى وزگەرىستەر، ياعني رەفورما قاجەت. ءتيىستى مينيسترلىك وسى ماسەلەنى جان- جاقتى قاراپ، سپورتتى دامىتۋدىڭ مۇلدە جاڭا جولدارىن ۇسىنۋى كەرەك، - دەدى قاسىم- جومارت توقايەۆ.
مەملەكەت باسشىسى جۋىق ارادا سپورتتى دامىتۋ ءۇشىن قابىلدانۋعا ءتيىس ناقتى شارالارعا توقتالدى. پرەزيدەنتتىڭ ايتۋىنشا، ەڭ الدىمەن، كاسىبي سپورت تۇرلەرىنە بولىنەتىن قاراجاتتىڭ قايتارىمىن تۇبەگەيلى ارتتىرۋعا كوڭىل بولگەن ءجون. وڭىرلەردىڭ ەرەكشەلىكتەرىنە سايكەس ناقتى سپورت تۇرلەرىنە باسا نازار اۋدارىپ، قارجىنى نەگىزسىز جۇمساۋ تاجىريبەسىن توقتاتۋ قاجەت. سونىمەن قاتار بۇقارالىق سپورت پەن دەنە شىنىقتىرۋدى دامىتۋعا كوڭىل بولە وتىرىپ، اتالعان سالانى قارجىلاندىرۋ مودەلىن قايتا قاراعان دۇرىس.
پرەزيدەنت سپورت سالاسىن باسقارۋ ساپاسىن جاقسارتۋدى كەلەسى باسىمدىق رەتىندە اتاپ ءوتتى.
- تۋريزم جانە سپورت مينيسترلىگى، ۇلتتىق وليمپيادا كوميتەتى (ۇ و ك) جانە فەدەراتسيالار اراسىندا ۇيلەسىم جوق. سپورتتى باسقارۋ ينستيتۋتتارىنىڭ قىزمەتى مەن ءوزارا ىقپالداستىعىنا قاتىستى بۇكىل جۇيەنى قىسقا مەرزىمدە قايتا قاراۋ قاجەت. ۇ و ك- ءنىڭ قىزمەتىن جەتىلدىرۋ ىسىنە دە نازار اۋدارۋ كەرەك. تۋريزم جانە سپورت مينيسترلىگى، ۇ و ك جانە فەدەراتسيالاردىڭ جۇمىسىن ۇيلەستىرۋدى تۇبەگەيلى جولعا قويۋ كەرەك. ءتيىمدى بايلانىستىڭ، ىقپالداستىقتىڭ جانە ءوزارا جاردەمدەسۋدىڭ بولماۋى جاقسى ناتيجەگە جەتكىزبەيدى، ياعني، جەڭىلىسكە اكەپ سوقتىرادى. پاريج وليمپياداسى قارساڭىندا مۇنداي كەلەڭسىزدىككە جول بەرۋگە بولمايدى. مەملەكەتتىڭ بيۋدجەتىنەن قارجىلاندىرىلاتىن سپورت فەدەراتسيالارىنىڭ قىزمەتىنە ريەۆيزيا جاساۋ قاجەت، - دەدى قاسىم- جومارت توقايەۆ.
پرەزيدەنت ۇلتتىق قۇرامانىڭ دايىندىق دەڭگەيىن ارتتىرۋ ماسەلەسىن نەگىزگى مىندەتتىڭ ءبىرى رەتىندە اتادى. مەملەكەت باسشىسىنىڭ پىكىرىنشە، اتلەتتەرىمىزدىڭ جوعارى دەڭگەيدە دايىندالۋى ءۇشىن سپورت مەديتسيناسى مەن فارماكولوگيا باعىتىنداعى زاماناۋي ينفراقۇرىلىممەن جابدىقتاۋ ماڭىزدى. بۇل جەردە ۇلتتىق سپورت ۋنيۆەرسيتەتى نەگىزگى ءرول اتقارادى. سوندىقتان ونىڭ قۇرىلىسىن جىلدامداتۋ كەرەك. سپورت سالاسىندا الەمدىك دەڭگەيدەگى تورەشىلەردى دايىنداۋعا كۇش سالۋ قاجەت. سونداي- اق جاتتىقتىرۋشىلار مەن باسقا دا سپورت ماماندارىنىڭ جالاقىسىن كوتەرىپ، قوسىمشا الەۋمەتتىك قولداۋ شارالارىن قابىلداعان ءجون.
مەملەكەت باسشىسى سپورتشىلاردىڭ رەزەرۆىن دايارلاۋ ماسەلەسىنە ارنايى توقتالىپ، ۇكىمەت پەن اكىمدەر دارىندى ءارى بولاشاعىنان زور ءۇمىت كۇتتىرەتىن اتلەتتەرگە قولايلى جاعداي جاساۋعا ءتيىس ەكەنىن ايتتى.
- ەلىمىزدە ۇزدىك ناتيجەگە قول جەتكىزۋ ءۇشىن بارىن سالىپ، ەڭبەك ەتۋگە ءازىر قىز- جىگىتتەر جەتكىلىكتى. لەگيونەرلەرگە يەك ارتا بەرمەي، ءوزىمىزدىڭ سپورتشىلارعا جول اشۋىمىز كەرەك. فاۆوريتيزم مەن ادىلەتسىزدىكتىڭ كەز كەلگەن تۇرىنە توسقاۋىل قويىپ، ىرىكتەۋدىڭ اشىق جانە شىنايى وتكىزىلۋىن قامتاماسىز ەتۋ اسا ماڭىزدى. حالىقارالىق جارىستاردا ەل نامىسىن ۇزدىكتەردىڭ ۇزدىگى عانا قورعاۋى كەرەك. وتاندىق سپورتتا ادىلەتتىلىك قاعيداتى مەن باسەكەنىڭ شىنايىلىعى ءبىرىنشى ورىندا تۇرۋعا ءتيىس، - دەدى پرەزيدەنت.
جيىندا 2023 -جىلعى XIX جازعى ازيا ويىندارىنىڭ ستەند اتۋدان ەكى دۇركىن جەڭىمپازى جانە قولا جۇلدەگەرى اسەم ورىنباي، كانوە جانە بايداركا ەسۋدەن XIX جازعى ازيا ويىندارىنىڭ جەڭىمپازى جانە كۇمىس جۇلدەگەرى سەرگەي ەمەليانوۆ، ەركىن كۇرەستەن الەم چەمپيونى ريزابەك ايتمۇحان، كاراتەدەن XIX جازعى ازيا ويىندارىنىڭ جەڭىمپازى نۇرقانات ءاجىقانوۆ، نىسانا كوزدەۋ سپورتىنان ۇلتتىق قۇرامانىڭ باس باپكەرى ولگا دوۆگۋن ءسوز سويلەدى.
مەملەكەت باسشىسى ءسوزىنىڭ سوڭىندا وتكەن جارىستارداعى ولقىلىقتاردان ناقتى ساباق الىپ، الداعى پاريج وليمپياداسىنا تىڭعىلىقتى دايىندالۋعا شاقىردى. پرەزيدەنت سپورتشىلارعا جانە باپكەرلەر كورپۋسىنىڭ جۇمىسىنا تابىس تىلەدى. سودان كەيىن قاسىم- جومارت توقايەۆ ءبىرقاتار سپورتشىعا قازاقستان رەسپۋبليكاسى پرەزيدەنتىنىڭ قۇرمەت گراموتالارىن تابىستادى.
اۆتور
اسحات رايقۇل
